Vodafone amosa unha web accesible con información sobre os vieiros verdes estatais

Vodafone España e a Fundación ONCE veñen de anunciar a súa colaboración na elaboración da Guía Vías Verdes Accesibles, desenvolvida por PREDIF e a Fundación de Ferrocarrís Españois co obxectivo de achegar múltiples detalles (accesibilidade física, visual e auditiva) de dez vieiros de diferentes comunidades e máis da oferta turística de cadansúa contorna. A guía, que permite que cada usuario planifique a súa viaxe e elixa o seu destino en función das súas necesidades, dispón de contidos en lectura doada, especialmente concibidos para persoas con diversidades intelectuais, funcionais ou motrices. Achégase nunha web accesible “ao cen por cen”, sinalan as entidades responsables da mesma, que se adapta a todo tipo de dispositivos (computador, tablet ou smartphone).
Segundo explica Vodafone, emprestouse a máxima atención en acadar funcións e contidos empregables para tódalas persoas, en especial para as que teñen diversidades funcionais ligadas á visión. A web manterase viva e en desenvolvemento coa actualización dos datos existentes e a introdución de novos vieiros. Lembrar que as vías verdes son antigos trazados ferroviarios en desuso que foron rehabilitados recentemente como roteiros abertos a camiñantes e ciclistas. Arestora hai en España 100 vieiros destas características, sumando unha lonxitude de 2.000 quilómetros. Na web presentada por Vodafone non foi incluído polo de agora ningún roteiro galego, aínda que agardamos que en vindeiras actualizacións podemos coñecer os detalles dun trazado da nosa terra, amais de amosarllos ao mundo.