Código Cero - Diario Tecnolóxico de Galicia

A IA xenerativa, a 6G e a computación cuántica, protagonistas do SIC'26 na Coruña

S. P. — 2026-07-14T16:24:00Z

A Universidade da Coruña acolleu a pasada semana a décimo terceira edición do Taller Español sobre Procesamento de Sinais, Teoría da Información e Comunicacións (SIC'26 Verán).
Organizado polo investigador do CITIC e catedrático da Universidade da Coruña, Luis Castedo, xunto con Joaquín Míguez Arenas e Matilde Sánchez Fernández, da Universidade Carlos III de Madrid, o encontro reuniu ata o 10 de xullo persoal investigador, docente e profesional procedente de universidades e centros de investigación españois e internacionais para compartir os avances máis recentes nun ámbito clave para o desenvolvemento das comunicacións do futuro.
Durante catro xornadas, o Paraninfo da Reitoría da Universidade da Coruña acolleu un completo programa científico con conferencias plenarias, sesións técnicas, presentacións orais e unha sesión de pósteres na que mozos e mozas investigadoras presentaron os seus traballos, favorecendo o intercambio de coñecemento e a creación de novas colaboracións.
A cita abordou algunhas das liñas de investigación con maior impacto tecnolóxico na actualidade, entre elas o procesamento estatístico de sinais, a aprendizaxe automática, a intelixencia artificial aplicada ás comunicacións, a teoría da información, as redes sen fíos, os sistemas MIMO, o procesamento de imaxes e vídeo, a análise de datos ou as futuras redes de comunicación.
En concreto, o programa científico reuniu destacados investigadores internacionais que ofreceron unha visión dalgúns dos principais desafíos que afrontan as Tecnoloxías da Información e das Comunicacións (as TIC). Wolfgang Utschick, da Universidade Técnica de Múnic, abriu o encontro cunha conferencia centrada no modelado xenerativo baseada en principios físicos para a capa física das comunicacións sen fíos, unha aproximación que combina intelixencia artificial e coñecemento do comportamento electromagnético para mellorar o deseño das futuras redes de comunicación.
A xornada continuou coa intervención de José Rodríguez Piñeiro, da Universidade de Tongji, quen presentou novas estratexias para a modelado e o seguimento de canles de comunicación en vehículos aéreos non tripulados (UAV), con aplicacións tanto nas comunicacións como nos sistemas de sensórica integrados (ISAC) para as futuras redes 6G. Pola súa banda, Deniz Akyildiz, do Imperial College London, abordou o uso de métodos secuenciais de Monte Carlo para resolver problemas de optimización estocástica e mostraxe en modelos de difusión, ferramentas cun papel crecente no desenvolvemento de algoritmos de aprendizaxe automática e modelos xerativos.
O encontro tamén dedicou unha xornada a algúns dos avances máis recentes en intelixencia artificial e tecnoloxías cuánticas. Isabel Valera, da Universidade de Saarland (Alemaña), afondou nos modelos xenerativos causais e na súa capacidade para realizar inferencia causal a partir de datos observacionais, unha liña de investigación con aplicacións en ámbitos como a saúde, a mercadotecnia ou o desenvolvemento de sistemas de intelixencia artificial máis transparentes e explicábeis.
A continuación, Gabriel Senno, investigador do Institute of Photonic Sciences (ICFO) e de Quside Technologies, presentou os fundamentos teóricos da xeración cuántica de números aleatorios, unha tecnoloxía esencial para reforzar a seguridade dos sistemas criptográficos e das comunicacións do futuro.
O programa completouse co titorial impartido por Wolfgang Utschick, An Introduction to the Principles of Generative Modeling for Signal Processing, no que ofreceu unha introdución aos principais modelos xerativos empregados actualmente en intelixencia artificial (como as redes xerativas antagónicas - GAN, os autoencoders variacionais, os normalizing flows e os modelos de difusión) e mostrou como poden integrarse en técnicas avanzadas de procesamento de sinais e estimación estatística para aplicacións en comunicacións sen fíos.
O SIC'26 Verán contou ademais co respaldo da Rede Temática ComonSens, unha iniciativa que reúne grupos de investigación españois especializados en comunicacións, procesamento de sinais, teoría da información e áreas afíns. A rede promove a cooperación científica entre universidades e centros de investigación, impulsa a organización de actividades formativas e facilita a transferencia de coñecemento cara ao tecido produtivo, contribuíndo a fortalecer o ecosistema investigador español nas TIC.

O Viveiro e Centro de Negocios de Redondela achegará servizos avanzados para a dixitalización das empresas

S. P. — 2026-07-14T15:33:00Z

Este 14 de xullo escenificouse en Redondela un importante avance para o futuro Viveiro e Centro de Negocios do concello que impulsa a Zona Franca de Vigo na histórica edificación da rúa Subida á Estación. Nunha visita á zona, o delegado do Estado, David Regades, acompañado da alcaldesa, Digna Rivas, confirmou que nos próximos días “daremos un paso definitivo coa saída a licitación das obras” e que “xa temos licencia do Concello e luz verde de Patrimonio polo que, se todo vai ben, poderíamos comezar os traballos a finais de ano ou principios de 2027”.
Explicaron que o inmóbel transformarase “nun vangardista equipamento, revitalizando por completo a contorna estratéxica da estación ferroviaria”. Esta “ambiciosa intervención” terá un orzamento de case 1,7 millóns de euros e suporá, indicaron, “a posta en valor dun edificio en ruína e a creación dun motor de transformación económica, empresarial e social para o concello, dando resposta á demanda do tecido empresarial, que reclamaba espazos adaptados ás novas dinámicas de traballo flexible e conectividade”.
Regades e Rivas presentaron as principais liñas do proxecto de execución, redactado pola UTE Díaz y Díaz Arquitectos S.L.P. xunto a Castroferro Arquitectos S.C.P., que dotará á vila dunha área de coworking, postos individuais e salas multiusos en pleno centro de Redondela.
Os puntos clave son os tradicionais muros de granito exteriores de 50 cm, e a restauración e mantemento das galerías de madeira orixinais, que convivirán con solucións técnicas contemporáneas.
Amais reconfiguraranse os espazos interiores nunha volumetría de planta baixa e dúas plantas elevadas, expandindo a súa superficie útil ata os 469,54 m² e alcanzando unha superficie construída total de 612,06 m², dotando a Redondela dunha área de coworking e salas multiusos preparadas para albergar a persoas autónomas, emprendedores e micropemes.
No ámbito máis tecnolóxico, o proxecto destaca por “unha proposta de enxeñería de primeiro nivel”, explicaron, engadindo que “que o centro será a infraestrutura competitiva que as empresas locais necesitan para dixitalizarse e expandirse no mercado global”. Os espazos contarán cun sistema avanzado de climatización para garantir a eficiencia coa máxima calidade do aire e cun consumo enerxético mínimo. Así mesmo, dispoñerá dunha rede de telecomunicacións de última xeración, capaz de fornecer ata 192 tomas de datos de alta velocidade nos postos de traballo, con puntos de acceso Wi-Fi distribuídos estratexicamente por todas as plantas. Destacar que a iluminación do complexo será “cen por cen sostíbel”, empregando luminarias LED gobernadas por un avanzado sistema de regulación dixital DALI e sensores de achega de luz natural.

Consolídase a transformación da CRTVG na CSAG

Redacción — 2026-07-14T15:13:00Z

Esta mañá a Corporación de Servizos Audiovisuais de Galicia presentou na Comisión Permanente de Control do Parlamento de Galicia a Memoria de Servizo Público correspondente ao exercicio 2025, un documento que certifica a consolidación da transformación da CRTVG na CSAG como un ecosistema audiovisual público adaptado ao consumo multimedia, ás novas tecnoloxías e á evolución dos hábitos da cidadanía.
A memoria recolle un exercicio marcado pola entrada en vigor da Lei 1/2025 de servizos dos medios públicos de comunicación audiovisual de Galicia para a sociedade dixital e pola constitución da nova CSAG. Segundo a directora xeral, Concepción Pombo, este cambio «vai máis alá da denominación institucional e responde á evolución do servizo público audiovisual cara a un modelo integrado, capaz de producir, distribuír e medir contidos en todas as plataformas relevantes para a sociedade galega».

Innovación e tecnoloxía como piares da nova Corporación

A memoria pon o foco na modernización das infraestruturas e dos sistemas de produción e distribución. Entre os principais fitos de 2025 figura o lanzamento de TVG-UHD, a primeira canle autonómica española en Ultra Alta Definición a través da TDT, xunto co desenvolvemento de proxectos de intelixencia artificial, subtitulado automático, sistemas de recomendación intelixente, tecnoloxías inmersivas XR e ferramentas de análise avanzada de audiencias como o DataHub de Konodrac.

Motor da industria audiovisual galega

O documento reafirma o papel da CSAG como principal impulsora da produción audiovisual en galego mediante a contratación de produción independente, coproducións e colaboración co tecido empresarial galego ao longo de 2025, favorecendo a creación de emprego cualificado, a innovación e a internacionalización do sector.
No plano económico e da xestión, a Corporación pechou o seu décimo sétimo exercicio consecutivo con superávit, mantivo estabilizado o cadro de persoal e, tras completar os procesos de consolidación e regularizar as ofertas públicas de emprego, rexistrou o menor índice de litixiosidade laboral da última década.

Máis de 1.000 millóns de reproducións e consolidación do liderado dixital

A memoria reflicte tamén o avance da estratexia dixital da CSAG. Durante 2025, os contidos da Corporación superaron os 1.000 millóns de reproducións e os 48 millóns de interaccións nas redes sociais, situando a entidade entre os principais operadores públicos estatais no ámbito dixital. O 85 % dos accesos prodúcense xa desde dispositivos móbiles e máis do 90 % do consumo da OTT realízase en televisores conectados e mediante HbbTV.
G24.gal consolidouse como a principal referencia informativa audiovisual en galego no ámbito dixital, con preto de dous millóns de usuarios, unhas cifras de récord que xa quedaron superadas polo forte crecemento rexistrado durante o primeiro semestre de 2026.

Radio Galega: máis podcasts, máis audio dixital e novos públicos

Na presentación da memoria, a directora xeral tamén salientou a evolución da Radio Galega cara a un modelo de audio dixital baseado no podcast, no consumo baixo demanda e na distribución multimedia. Ademais, indicou que a plataforma AGalegaAudio.gal ampliou a súa oferta de contidos especializados, reforzando a presenza do galego no ámbito dixital.
A Memoria de Servizo Público conclúe que a CSAG afronta esta nova etapa como unha organización sólida, saneada e preparada para os desafíos da próxima década, mantendo como eixes a promoción da lingua galega, a innovación, a cohesión territorial e a prestación dun servizo público audiovisual de calidade.

A Deputación de Ourense impulsa a mobilidade sostíbel na Ribeira Sacra en colaboración con AJE Ourense e Mobify

S. P. — 2026-07-14T14:31:00Z

A Deputación xunto a AJE Ourense e Mobify presentaron esta mañá un servizo de mobilidade sostíbel para coñecer a Ribeira Sacra, unha iniciativa que poñerá a funcionar unha frota de 80 vehículos eléctricos que conectarán de forma directa a estación do AVE de Ourense co corazón desta icónica zona ourensán.
O presidente provincial, Luis Menor participou xunto á vicepresidenta primeira, Marta Nóvoa, na estación intermodal de Ourense, na presentación do proxecto EMICOU (Estratexia de Mobilidade Intelixente Conectada de Ourense) que encarna as “liñas estratéxicas” do desenvolvemento turístico da Deputación: un turismo respectuoso co medio ambiente, non masivo e de máxima calidade. No acto de presentación tamén participaron a presidenta de AJE Ourense, Noelia Rodríguez; e a directora de operacións de Mobify, Nuria Iglesias.
Este proxecto pioneiro, que aspira a ser “unha solución integral”, dixo Menor, converterá á provincia nun referente europeo en mobilidade “cero emisións”, ao tempo que revolucionará o modelo turístico e de transporte no medio rural. Neste sentido, Menor destacou a esencia ourensá desta iniciativa que se “fai para Ourense desde Ourense” poñendo de manifesto “o enorme talento que temos na nosa provincia”.
Sinalou que a iniciativa responde a un triplo éxito histórico no territorio: o freo á sangría demográfica con ganancia de poboación segundo os últimos datos do INE, o crecemento exponencial do turismo e o camiño cara ao recoñecemento pola UNESCO da Ribeira Sacra como Patrimonio da Humanidade.
Como “medida complementaria”, a Deputación de Ourense estuda a implantación dun gran centro de reunión de visitantes no concello do Pereiro de Aguiar, situado na entrada da Ribeira Sacra ourensá. Este espazo servirá para canalizar o tráfico particular e ordenar os fluxos de acceso cara a transportes colectivos ou vehículos eléctricos autorizados, evitando saturacións en zonas de alto valor ecolóxico.
Explicaron que Ribeira Sacra Conecta quere solucionar a fenda de mobilidade que existía para os viaxeiros que chegan á estación do AVE de Ourense. A partir de agora, establécese unha conexión directa grazas a unha frota intelixente de 80 vehículos.
A xestión do servizo realizarase mediante unha plataforma multidispositivo contrastada que permite a reserva, apertura e peche da flota sen chaves físicas, eliminando barreiras dixitais. A través da monitoraxe en tempo real e grazas á xeolocalización avanzada 24/7, optimizaranse as rutas e reordenaranse as frotas de xeito algorítmico.
“A nivel técnico, o deseño prevé unha integración estética respectuosa co contorno monumental e a implantación de puntos de entrega e recollida en zonas optimizadas”, sinalaron.
O presidente provincial explicou que este servizo, pensado inicialmente para o ámbito turístico, poderá converterse nunha “infraestrutura viábel” os 365 días do ano grazas ao tecido empresarial e emprendedor do rural.

ChatGPT volve a WhatsApp

Marcus Fernández — 2026-07-14T14:01:00Z

A finais de 2024 ChatGPT estreouse en WhatsApp de xeito que podiamos conversar co chatbot de OpenAI sen ter que instalar a súa aplicación móbil, simplemente engadindo na axenda do teléfono o número 1 (800) 2428478, pero o ano pasado Meta mudou as normas de WhatsApp Business, expulsando da aplicación a servizos como ChatGPT, Copilot e LuzIA, levando a que a Comisión Europea iniciase unha investigación que concluíu ordenando a Meta restablecer o acceso de balde aos asistentes de IA de propósito xeral á API de WhatsApp Business.
Finalmente ChatGPT volve estar dispoñible en WhatsApp dentro do territorio europeo, facilitando así a posibilidade de conversar mediante texto, enviar notas de voz, analizar e editar imaxes, buscar información, realizar traducións e resumir textos longos directamente dende a aplicación de mensaxería instantánea, comunicándonos con ChatGPT como se fose unha persoa máis, o que pode resultar práctico en moitas ocasións.

Xa é posible instalar a aplicación de Bizum Pay

Marcus Fernández — 2026-07-14T11:46:01Z

A moi anticipada aplicación Bizum Pay chegou hoxe ás tendas de aplicacións de Android e de iOS, facilitando así o uso de Bizum como método de pagamento en establecementos comerciais tradicionais, trasladando as facilidades desta plataforma aos pagamentos presenciais, como unha alternativa aos pagamentos contactless das grandes plataformas de tarxetas bancarias.
Cómpre salientar que estamos simplemente ante un primeiro paso para achegar Bizum Pay ao público, pois queda agora a despregadura entre os sistemas de pagamento con tarxeta dos establecementos comerciais, que podería tardar varios meses en completarse (actualmente estaría dispoñible no 60% do parque de terminais bancarios). A incorporación de entidades bancarias á aplicación tamén será progresiva.
Este sistema de pagamento destaca por ser unha operación que se realiza directamente entre as contas bancarias dos consumidores e das tendas, sen mediar unha entidade de tarxeta bancaria polo medio. Tal operación sería como unha transferencia bancaria instantánea, o que pode reducir os riscos de fraude e impagamento para os establecementos comerciais, aínda que non está nada claro que iso supoña unha vantaxe para o consumidor (máis aló do feito de non precisar dunha tarxeta bancaria para realizar un pagamento contactless).
Para que a nova aplicación resulte máis práctica, non só ofrece a posibilidade de pagar con Bizum, senón que tamén pode asociarse a outras tarxetas bancarias que teñamos, de xeito que pode establecerse como aplicación de pagamento predeterminada dende a que escoller se pagamos con tarxeta ou con Bizum.

O Eurosistema escolle a Abanca para un desenvolvemento piloto do euro dixital

S. P. — 2026-07-14T11:30:00Z

A entidade galega Abanca é unha das entidades seleccionadas no proxecto piloto do euro dixital impulsado polo Eurosistema, dentro dunha alianza que tamén inclúe a Ibercaja, Unicaja, Cecabank, Bizum e Deloitte. Este equipo de traballo busca nesta fase de desenvolvemento do euro dixital transformar o ecosistema europeo de pagamentos e sentar as bases para unha nova xeración de servizos financeiros dixitais.
Abanca explica que o euro dixital é un dos proxectos máis importantes impulsados polo Eurosistema para fortalecer a soberanía monetaria e a competitividade do sistema financeiro da zona do euro, impulsar a innovación nos pagamentos e ofrecer unha alternativa dixital ao diñeiro en efectivo. O seu principal obxectivo é “garantir que os cidadáns e as empresas poidan seguir accedendo ao diñeiro do banco central nunha contorna cada vez máis dixitalizada, respondendo ás novas necesidades da economía europea”.
Na fase actual do proxecto no que participa Abanca, o Eurosistema ten previsto realizar probas beta nunha contorna de produción para validar funcionalidades, procesos operativos e experiencia de usuario.
Durante esta fase, avaliaranse varios casos de uso, incluíndo pagamentos entre particulares (P2P), pagamentos en comercio electrónico e pagamentos en establecementos físicos (P2B), así como escenarios de pagamento offline para analizar o rendemento da solución cando os usuarios carecen de conectividade a Internet. O programa piloto, que se espera que dure aproximadamente doce meses, está previsto que comece na segunda metade de 2027 coa participación de empregados de bancos centrais do Eurosistema e comercios seleccionados por eles mesmos.
“A participación nesta iniciativa reflicte o compromiso coa innovación financeira das entidades e compañías participantes e contribuirá ao desenvolvemento do euro dixital e dos futuros servizos asociados a esta nova infraestrutura europea”, sinala Abanca, engadindo que “a selección recoñece a fortaleza dunha alianza que reúne capacidades complementarias ao longo de toda a cadea de valor dos pagamentos”.
O consorcio integra tres entidades financeiras líderes nos seus respectivos mercados cunha presenza significativa no mercado español -ademais de Abanca, tamén están Ibercaja e Unicaja-; Cecabank, provedor europeo de infraestruturas financeiras, servizos de pagamento maioristas e tecnoloxía especializada para o sector financeiro; Bizum, líder nacional e internacional en pagamentos dixitais e unha das iniciativas de pagamento instantáneo de máis rápido crecemento en Europa; e Deloitte, unha firma global líder en transformación financeira.

OnePlus podería despedirse de Europa esta mesma semana

Marcus Fernández — 2026-07-14T11:16:47Z

OnePlus está a piques de poñer fin á súa actividade comercial en Europa e EE.UU., segundo avanzan diversas informacións publicadas por medios especializados alemáns. O anuncio oficial podería producirse ao longo desta semana como parte dunha reorganización estratéxica impulsada pola súa matriz, Oppo.
Os rumores sobre este movemento comezaron a circular a primeiros de 2026, cando distintas filtracións apuntaban á desaparición progresiva da marca nos mercados occidentais. Naquel momento, OnePlus negou oficialmente esas informacións, aínda que nos meses posteriores multiplicáronse os indicios de que a compañía estaba a reducir a súa presenza internacional.
Durante a primavera transcendía que OnePlus estaba a desmantelar parte da súa estrutura en Europa e EE.UU., con empregados que abandonaban a empresa ou pasaban a desempeñar funcións dentro de OPPO. Paralelamente, a firma comezou a revisar a súa estratexia rexional e, nas últimas semanas, intensificou a redirección dos visitantes das súas páxinas web europeas cara aos portais de Oppo.
Oppo asumirá directamente a presenza comercial que ata agora mantiña OnePlus en Europa, aproveitando tamén o seu regreso a diversos mercados tras resolver os conflitos legais relacionados coas patentes que limitaran a comercialización dos seus dispositivos nalgúns países europeos.
A retirada afectaría unicamente aos novos lanzamentos. OnePlus e Oppo trasladaron recentemente a representantes da prensa que os usuarios actuais seguirán recibindo asistencia técnica e actualizacións de software durante todo o ciclo de vida comprometido para cada dispositivo. Porén, non está previsto introducir novos produtos OnePlus en Europa nin en EE.UU.
Os teléfonos e demais dispositivos que aínda permanecen nas canles de distribución venderanse ata esgotar existencias, sen previsión de reposición. De feito, boa parte do catálogo xa aparece esgotado nas tendas en liña europeas da marca.
A situación noutros mercados, como China ou a India, continúa sen aclararse. OnePlus podería continuar existindo neses territorios como unha gama de produtos integrada dentro de Oppo, especialmente centrada na gama media e económica.
Fundada en 2013, OnePlus gañou unha forte reputación entre os entusiastas de Android grazas ao lanzamento do OnePlus One en 2014, un dispositivo que popularizou o concepto de flagship killer ao ofrecer prestacións propias da gama alta a un prezo sensiblemente inferior ao da competencia. Ademais, destacaba por incorporar CyanogenMod, unha versión moi personalizable de Android que contribuíu ao éxito inicial da marca. Os detalles que distinguían os móbiles de OnePlus dos de Oppo foron diluíndose nos últimos anos, percibíndose OnePlus como unha gama de Oppo en vez dunha marca realmente independente.

Hisense sorprende cun curioso smartphone con pantalla de tinta electrónica

Marcus Fernández — 2026-07-14T10:50:08Z

Mentres en moitos establecementos en liña venden pantallas de tinta electrónica que poden acoplarse magneticamente á parte traseira do smartphone para dotalo de funcións de lector de libros electrónicos, dende Hisense estarían a traballar xusto no contrario.
O fabricante chinés vén de presentar o Hisense A10, un smartphone con Android 16, procesador Qualcomm, conectividade 5G e Wi-Fi 6 e, como detalle diferenciador, unha pantalla principal de tinta electrónica cunha diagonal de 6,13 polgadas, que ofrecería unha experiencia de lectura como a de calquera lector de libros electrónicos e, para quen queira ver fotografías ou outros contidos nos que a cor teña importancia, permite engadir magneticamente unha pantalla LCD secundaria.
Unha proposta moi rechamante, que dificilmente sairá do mercado chinés, pero que podería resultar interesante para todos os defensores da desconexión dixital (xa que as pantalla de tinta electrónica desincentivan o consumo de contidos de vídeo vertical de desprazamento infinito).

Deixa de funcionar o acurtador de ligazóns de Telegram

Marcus Fernández — 2026-07-14T10:17:35Z

A aplicación de mensaxería Telegram emprega de xeito intensivo un acurtador de ligazóns da Internet baixo o nome dominio t.me que deixou de operar nas últimas horas sen unha explicación aparente. O dominio figura como Server Hold, ou sexa, que non pode resolverse de ningún xeito (nin sequera empregando servidores de DNS alternativos ou VPN), levando ao propio Pavel Durov a pedir explicacións ao rexistrador do dominio de primeiro nivel de Montenegro.
Actualmente o dominio t.me emprégase para establecer ligazóns a usuarios e a canles, polo que a súa suspensión supón un serio problema, que podería ser consecuencia da aplicación de medidas de bloqueo desproporcionadas. Iso enténdese da casualidade de que onte mesmo a Oficina de Control de Activos Estranxeiros (OFAC) dos EE.UU. ampliou a Listaxe de Nacionais Especialmente Designados e Persoas Bloqueadas (SDN) no marco dunha serie de bloqueos relativos a Cuba, entre os que se incluiría a First VPN Service e o enderezo t.me/FirstVPNService, o que podería ter provocado a suspensión de t.me como dano colateral.
Queda agora agardar a que se solucione o incidente, pero de confirmarse que estamos ante un bloqueo abusivo por parte da OFAC, abriríase unha vez máis o debate sobre os mecanismos de bloqueo aplicados na Rede e os prexuízos causados indiscriminadamente.

Optare participa nun proxecto internacional que garante a seguridade e o control da IA nas operadoras

S. P. — 2026-07-14T08:11:01Z

A firma galega Optare Solutions presentou detalles dun relevante proxecto tecnolóxico no que participa, Zero-Trust Agents: unha iniciativa colaborativa internacional que recibiu o premio ao mellor Moonshot Catalyst na categoría de Intelixencia Artificial Confiábel durante o encontro global DTW Ignite 2026 celebrado en Copenhague. O galardón (entregado pola alianza global da industria das telecomunicacións TM Forum no marco dos premios Open Innovation and Moonshot Catalyst Awards) recoñeceu a excelencia dun ecosistema de colaboración deseñado para achegar solucións críticas e revolucionarias á industria global.
A iniciativa aborda un punto de inclusión e de inflexión crítico para o sector: pasar da experimentación teórica con intelixencia artificial á execución real, segura e con marxe de medición en redes de produción. Para responder as esixencias normativas e de control dos operadores, o proxecto propón un patrón de gobernanza de confianza cero denominado modelo IPOE (Identidade, Política, Observabilidade e Evidencia). A través deste marco neutral, avalíanse en tempo real as interaccións dos axentes autónomos de IA e acóutase o seu alcance para previr riscos críticos como a inxección de prompts, a suplantación de identidade ou o desvío das tarefas asignadas.
A galega Optare salienta que esta contribución internacional é “o resultado directo dunha estreita cooperación multidisciplinar orientada a resolver os retos de enxeñería máis complexos do sector”. O consorcio está promovido por Orange S.A., Telefónica, Telstra Corporation e Vodafone Group en calidade de Champions ou líderes do proxecto, e conta co co-desenvolvemento tecnolóxico de Solo.io, Minsait (Indra), Iquall Networks e a propia Optare Solutions como participantes.
“A solución conxunta demostrou que a gobernanza estandarizada axiliza os procesos de validación técnica, permitindo reducir o tempo de posta en produción de compoñentes de semanas a escasas horas”, salienta Optare, concretando que dentro da distribución da agrupación industrial de traballo, achegou a súa experiencia técnica en contornas de aseguramento e observabilidade da man de Fernando Lamela e Santiago Rodríguez. Ambos os profesionais, que en paralelo tamén participaron activamente no Catalyst Boosting NPS beyond network KPIs with agentic AI (Catalyst URN C26.0.935), levaron a cabo a contribución técnica da firma nesta iniciativa galardoada. Especificamente, o equipo de Optare colaborou con Vodafone no despregamento dos axentes de vixilancia dentro da contorna de supervisión, garantindo que as propias ferramentas de control estivesen reguladas baixo a pasarela de enlace (gateway) de políticas da arquitectura. Así mesmo, facilitáronse interfaces de aseguramento remoto conectados de forma protexida ao perímetro do operador para validar a reacción automatizada do fluxo ante escenarios de degradación do servizo.
Para o grupo Optare Solutions, participar neste fito dentro de DTW Ignite 2026 reforza o seu “firme compromiso estratéxico por manterse á vangarda tecnolóxica na aplicación práctica, consciente e medíbel da IA”. Alíñase ademais á dirección corporativa xa emprendida co lanzamento da súa división especializada Augura Tech, consolidando o seu posicionamento como un actor que prioriza de maneira absoluta a seguridade, a soberanía e a privacidade do dato en contornas empresariais de alta esixencia.

Novo número da nosa edición impresa

Marcus Fernández — 2026-07-13T21:59:00Z

Como todos os meses, chega outro número de Código Cero na súa edición impresa, que se pode achegar de balde nunha completa rede de puntos de distribución, podéndose descargar tamén en formato PDF ou ler en dispositivos móbiles a través da aplicación de quiosco dixital Magzter.
Nesta nova entrega dedicamos unha especial atención aos 25 anos que cumpre a nosa páxina web. Tamén abordamos os seguintes temas:
— O CITIC conecta A Coruña co MIT e prepara xa a IX edición do seu congreso XoveTIC
— Conclúe EDIH DataLife con máis de 600 profesionais formados en novas tecnoloxías en Galicia
— Vitae avaliou nunha xornada a utilidade da IA Xenerativa no desenvolvemento de software
— A Noite do CPEIG celebrou o papel transformador da Enxeñaría Informática
— Galicia mantén o quinto posto estatal en número de empresas do sector TIC cun total de 3.179
— En marcha o Laboratorio e Centro Demostrador de Ciberseguridade
— O lecer dixital medra en Galicia ao ritmo do streaming, a música online e as redes sociais
— O Plan Director da Industria das TIC dará un novo impulso ao noso sector tecnolóxico
— A USC fixo unha proclama para garantir contornas dixitais seguras para os menores
— As actividades polo bo uso das TIC do Plan Director xuntaron en Galicia 155.738 participantes
— Feiraco e a Secretaría da Lingua entregaron os premios XIV Certame de Microrrelatos
— Entrevistamos a Manuel Rego (Igalia), coordinador do evento Web Engines Hackfest

Novos auriculares de Razer para Xbox e PlayStation

Redacción — 2026-07-13T21:00:00Z

Razer ampliou a súa gama de auriculares sen fíos para videoxogos coa presentación dos Hammerhead V3 X HyperSpeed para Xbox e dos Hammerhead V3 X HyperSpeed para PlayStation, dous modelos de auriculares orientados tanto ao xogo competitivo como ao uso cotián en múltiples plataformas, que chegan ao mercado a un prezo oficial de 109,99 euros.
Os novos auriculares empregan a tecnoloxía Razer HyperSpeed Wireless de 2,4 GHz para ofrecer unha conexión de baixa latencia, complementada con Bluetooth 5.3. Esta combinación permite utilizalos en consolas, ordenadores, dispositivos móbiles e consolas portátiles, alternando entre ambos os modos de conexión mediante a tecnoloxía SmartSwitch Dual Wireless.
Un dos elementos diferenciais é o HyperSpeed Case, un estoxo de carga que tamén funciona como receptor sen fíos de 2,4 GHz. Ao conectalo á consola ou a outro dispositivo compatible, os auriculares poden aproveitar a conexión de baixa latencia sen necesidade dun adaptador independente, mentres continúan cargándose cando non están en uso.
A conectividade de 2,4 GHz está deseñada para ofrecer unha resposta de son practicamente instantánea, facilitando a identificación de pasos, disparos ou outros sons relevantes durante as partidas competitivas. Pola súa banda, Bluetooth 5.3 mellora a eficiencia enerxética, a estabilidade da conexión e reduce a latencia respecto a versións anteriores do estándar.
Os Hammerhead V3 X HyperSpeed ofrecen unha autonomía de ata 10 horas cunha soa carga, que pode ampliarse ata un máximo de 35 horas empregando o estoxo de carga.
A compatibilidade con audio espacial adapta a experiencia a cada plataforma. Na versión para Xbox inclúese soporte para Windows Sonic, mentres que o modelo para PlayStation é compatible con 3D Audio. En PC tamén poden aproveitar THX Spatial Audio para unha maior sensación de inmersión.
Entre as súas características tamén figuran certificación IPX4 de resistencia ás salpicaduras, controis táctiles integrados e un deseño compacto pensado para facilitar o seu transporte e uso tanto en sesións de xogo como no día a día.

Novo éxito de participación do Rianxo Gaming, que chegou á súa IV edición

S. P. — 2026-07-13T20:51:46Z

A cuarta edición do Rianxo Gaming celebrouse o pasado sábado na praza de Castelao, no Campo de Arriba da vila rianxeira. Segundo confirmou a organización, o evento foi un rotundo éxito de participación e converteu o espazo urbano nun gran punto de encontro de lecer dixital cunha entrada totalmente gratuíta. Pola cita pasaron centos de persoas, especialmente xente nova (seareiros/as das novas tecnoloxías e dos videoxogos).
“Ano a ano o Rianxo Gaming vaise consolidando como unha das feiras da cultura do videoxogo máis destacadas do panorama galego”, explicou o Concello.
O programa veu con múltiples actividades para seareiros dos videoxogos ou para visitantes en xeral: xogo libre (Arcade, VR Arena, PC, Retro), mostra de xogos retro, arcades, tendas, xantar, música e unha ampla variedade de torneos.
O programa incluíu tamén a presentación de tres videoxogos galegos (na Zona Indie): Golpes e Broucazos, Pis-To-Le-Ro e Fraga. Os asistentes puideron probar estes títulos en diferentes fases de desenvolvemento e charlar directamente cos seus creadores.
O evento está promovido polo Concello de Rianxo e a produción técnica é de Lúa Gaming, a empresa galega de deportes en liña e eventos.

California lidera unha demanda para bloquear a fusión entre Warner Bros. e Paramount

Redacción — 2026-07-13T20:06:00Z

O fiscal xeral de California, Rob Bonta, encabezou unha coalición de 12 fiscais xerais estatais que presentou unha demanda para impedir a adquisición de Warner Bros. Discovery por parte de Paramount Skydance, unha operación valorada nuns 110.000 millóns de dólares. Ademais de California, participan na demanda Arizona, Colorado, Connecticut, Massachusetts, Minnesota, Nevada, Nova Jersey, Novo México, Nova York, Oregón e Washington.
A acción xudicial sostén que a fusión vulneraría a lexislación antimonopolio dos Estados Unidos ao reducir de maneira substancial a competencia nos mercados do cine e da televisión, contradicindo a abraiante resolución do Departamento de Xustiza dos EE.UU., que na súa investigación aseguraba que a fusión non prexudicaría a competencia nin aos consumidores.
A demanda, presentada ante o Tribunal Federal do Distrito Norte de California, argumenta que a integración das dúas empresas eliminaría a competencia entre dous dos cinco principais distribuidores cinematográficos de Hollywood e entre dous dos cinco maiores propietarios de canles de televisión por cable básica. Segundo os demandantes, a nova entidade controlaría preto dun terzo da distribución cinematográfica en salas nos EE.UU. e unha proporción similar da programación de televisión por cable básica.
Os fiscais xerais solicitaron ás empresas que non completen a operación ata que remate o proceso xudicial. No caso de que non acepten esa petición, anuncian que pedirán unha orde xudicial temporal para paralizar a fusión.
Bonta afirmou que a operación provocaría «prezos máis altos, menor calidade e menos contidos» tanto para o cinema como para a televisión, ademais de prexudicar as salas de exhibición, os operadores de televisión de pago e, finalmente, os espectadores. Tamén advertiu de que unha maior concentración reduciría as oportunidades para desenvolver novas historias e diminuiría a diversidade de perspectivas dispoñibles para o público.
A demanda lembra que Warner Bros. e Paramount levan máis dun século competindo como estudios independentes e destaca o seu catálogo de producións. Paramount distribuíu títulos como Titanic, Braveheart, e O Padriño, ademais de sagas como Top Gun e Transformers. Warner Bros. conta con películas como Barbie, Casablanca e Matrix, así como franquías como Batman, Harry Potter e O Señor dos Aneis. Entre os seus activos televisivos figuran canles e contidos como CNN, MTV, HGTV, Cartoon Network, Nickelodeon, March Madness e as retransmisións da Major League Baseball.
A coalición considera que a operación incumpre a sección 7 da Lei Clayton, que prohibe as fusións susceptibles de reducir substancialmente a competencia ou favorecer a creación dun monopolio.
Segundo a demanda, a fusión afectaría especialmente a tres mercados. No da distribución cinematográfica de grande estrea, a empresa resultante concentraría arredor do 27 % do mercado, mentres que só tres distribuidoras controlarían o 75 % das grandes estreas. No segmento das producións de maior recadación prevista, o novo grupo superaría o 30 % da cota de mercado e catro empresas acumularían máis do 90 % das superproducións. No mercado das licenzas de canles de televisión por cable básica, Warner Bros. e Paramount sumarían tamén arredor do 27 % da actividade.
Os fiscais sosteñen que a competencia actual entre ambas as compañías beneficia tanto ás salas de cine como aos operadores de televisión de pago, xa que lles permite negociar mellores condicións económicas e favorece o investimento en novos contidos. Coa desaparición desa rivalidade, aseguran, aumentarían os prezos, reduciríase a variedade da oferta audiovisual e podería verse afectada a exhibición cinematográfica.

Apple detalla as malas prácticas polas que demanda a OpenAI

Redacción — 2026-07-13T19:40:00Z

A revelación do contido íntegro da demanda presentada por Apple ante o Tribunal do Distrito Norte de California o pasado 10 de xullo de 2026 achega novos detalles de extrema gravidade sobre o alcance deste presunto caso de espionaxe industrial. O texto xudicial non só confirma a fuga de información, senón que describe con precisión un elaborado sistema de infiltración que inclúe o uso de fallos informáticos, a subtracción de pezas físicas e a manipulación de provedores exclusivos de Apple.
Un dos elementos máis rechamantes que revela o documento é o método empregado polo enxeñeiro Chang Liu para facerse coa propiedade intelectual de Apple. Segundo a denuncia, tras incorporarse a OpenAI en xaneiro de 2026, Liu descubriu e explotou unha vulnerabilidade de autenticación pouco común nos servidores de Apple que lle permitiu manter o acceso directo aos repositorios confidenciais de enxeñaría da súa antiga empresa. Lonxe de alertar sobre o erro, o enxeñeiro celebrouno a través de mensaxes privadas cunha compañeira que aínda traballaba en Apple, Yu-Ting Alyssa Peng, exclamando «LOL, descubrín que podo acceder, que divertido», ao que ela respondeu de inmediato cun «estou lista».
A través deste acceso non autorizado, Liu descargou ducias de arquivos que contiñan máis de mil páxinas de especificacións técnicas de circuítos complexos e metodoloxías de probas para as placas base de futuros dispositivos. Peng tamén acabou abandonando Apple para unirse a OpenAI en abril de 2026.
A demanda tamén detalla a participación de Tang Tan, actual xefe de hardware de OpenAI. Apple acusa a Tan de esixir aos candidatos procedentes da firma de Cupertino que acudisen ás entrevistas de traballo cargando con pezas físicas e prototipos de Apple (como baterías, encapsulados de circuítos SIP, placas base mlb, blindaxes e carcasas de vidro traseiro de diferentes cores) para utilizalos como material de demostración en sesións de show and tell. A audacia do proceso de selección alarmou a algún dos propios candidatos, que chegou a admitir por chat que non sabía que estivese permitido sacar ese material das oficinas.
Para facilitar estas prácticas e garantir que os enxeñeiros puidesen extraer a maior cantidade de datos antes de marchar, a cúpula de OpenAI distribuía entre os futuros contratados un documento confidencial de Apple catalogado como Need to Know. Este ficheiro detallaba os protocolos internos que os xestores de Apple activan cando un traballador presenta a súa dimisión. Con esta información en man, OpenAI instruíaos sobre como evitar a entrega das dúas semanas de aviso para esquivar o temido paseo de saída no que a seguridade de Apple lles retiraría de golpe o acceso aos sistemas.
Finalmente, a denuncia estende a acusación de espionaxe á cadea de subministración global de Apple. O documento relata como OpenAI enganou a un socio industrial especializado no deseño e modelado de metais que traballa en exclusiva para Apple. A tecnolóxica dirixida por Sam Altman fixo crer ao provedor que contaba co permiso explícito de Cupertino para que este lle aplicase aos novos prototipos de OpenAI un método secreto de pulido e acabado que Apple tardara anos en perfeccionar. Do mesmo xeito, OpenAI utilizou terminoloxía interna e segredos de deseño para abordar a outro fabricante clave de compoñentes de alimentación e baterías, realizándolle preguntas técnicas moi específicas que só un membro do equipo interno de Apple podería coñecer.
Segundo a demanda presentada por Apple, o transvasamento de profesionais cara á firma dirixida por Sam Altman converteuse nun fluxo constante nos últimos anos. A compañía de Cupertino estima formalmente que o goteo de talento supera xa os 400 traballadores que deixaron Apple para incorporarse ás filas de OpenAI.
Este volume de transferencias reforza a tese de Apple de que existe unha estratexia institucionalizada para asimilar non só segredos comerciais específicos, senón tamén o coñecemento operativo acumulado por estes enxeñeiros.

Vigo avanza en prevención de lumes cun servizo propio de drons con IA

S. P. — 2026-07-13T17:44:00Z

O alcalde de Vigo, Abel Caballero, comprobou esta mañá, no Monte Cepudo, o funcionamento do dispositivo da Policía Local de Vigo para vixiar toda a masa forestal do concello con drons dotados da tecnoloxía máis avanzada. Indicou que o Concello estuda adquirir novo material.
Caballero explicou tamén que o equipo humano e técnico da Policía Local de Vigo “permite vixiar toda a masa forestal da cidade”, xa que “a tecnoloxía dos vehículos aéreos non tripulados do Concello permítelles alcanzar grandes distancias, ata distintas áreas de Baiona, Redondela, e de Nigrán”.
Engadiu que “os días que hai unha alta temperatura ou algún risco vixiamos todos os montes e contamos cun operativo conectado con bombeiros e coa Policía Local para desprazarse á zona cada vez que apareza fume ou outro sinal de alarma”.
O rexedor lembrou que os medios técnicos permanecen activos de forma permanente e que o Concello forma a axentes da Policía Local para o uso e manexo de drons para os labores de vixilancia e seguridade. Apuntou que entre as últimas intervencións atópase a procura da veciña do Calvario desaparecida a semana pasada, que cada concerto de Castrelos está supervisado con drons e que estes tamén se empregan en todo o relativo ao tráfico.

A UDC e a USC clausuran no CITIC a cuarta edición de AddVenture

S. P. — 2026-07-13T17:23:17Z

Os Consellos Sociais da Universidade da Coruña e da Universidade de Santiago de Compostela clausuraron o pasado 9 de xullo, no CITIC da UDC, a cuarta edición de AddVenture, o programa universitario de emprendemento e innovación que desenvolven xunto con TeamLabs, de Mondragon Unibertsitatea.
A xornada final reuniu o alumnado participante, representantes institucionais, o equipo docente, mentores e un comité de profesionais expertos nunha sesión dedicada á presentación, avaliación e recoñecemento dos proxectos traballados durante os últimos meses.
A apertura contou coa participación de Jesús Spósito Prado, secretario do Consello Social da Universidade da Coruña; Marta Villamayor Álvarez, secretaria do Consello Social da Universidade de Santiago de Compostela; e María Piferrer, Lead Experience en TeamLabs.
Na súa intervención, Jesús Spósito Prado destacou que “a universidade do século XXI non pode limitarse a transmitir coñecemento, senón que debe contribuír a transformalo en valor para a sociedade”, e subliñou “o papel do emprendemento como unha vía para activar talento, xerar oportunidades e conectar universidade, empresa e institucións”.
Tamén puxo en valor “o percorrido realizado polo alumnado durante o programa e a importancia de aprender a contrastar, ordenar e defender unha idea para convertela nun proxecto con maior solidez”.
Pola súa banda, Marta Villamayor Álvarez trasladou a satisfacción do Consello Social da Universidade de Santiago de Compostela por acompañar, por segundo ano, unha nova edición de AddVenture. Na súa intervención, incidiu no valor do programa como espazo práctico de acompañamento, formación, mentoring e contacto con profesionais, e defendeu a colaboración entre universidades como unha ferramenta clave para que o talento universitario poida avanzar sen fronteiras administrativas.
A xornada celebrouse no CITIC, centro que acolleu tamén un dos primeiros fitos desta edición coa sesión de captación do programa.
Durante a xornada presentáronse trece proxectos vinculados a ámbitos diversos como a saúde, a sustentabilidade, a tecnoloxía, a intelixencia artificial, o turismo, a cultura, as finanzas, os servizos profesionais e os novos modelos de negocio.
O comité de expertos estivo integrado por Paulo González, analista de investimentos de Unirisco Galicia SCR; Gonzalo González Pérez, experto en economía e finanzas; María José Arrojo Baliña, xornalista, profesora da UDC e directora da Escola de Medios de La Voz de Galicia; e María Piferrer, Lead Experience en TeamLabs e experta en innovación e emprendemento.
A xornada incluíu tamén a conferencia Biotecnoloxía invisible para unha industria alimentaria máis eficiente, o caso de Enzicas, impartida por Víctor Lama, CEO de Enzicas, facilitador e mentor de AddVenture. A súa intervención permitiu achegar ao alumnado un exemplo real de transferencia, innovación e emprendemento aplicado á industria alimentaria.
Recoñecemento aos proxectos destacados
A clausura finalizou coa entrega de diplomas ao alumnado participante e co recoñecemento aos proxectos máis destacados desta cuarta edición.
O premio Finantia, á solidez financeira, foi para YouTube Habit, de Marcos Romero.
O premio Proyecta, ao mellor pitch, foi para EnnergIA, de Júlia Nunes.
O premio Vanguardia á innovación, foi para Planea, de Diego Mata Pose.
O premio Ready á iniciativa máis preparada para o mercado, foi para Galicia For You, de Felipe Malvárez.

Curtas Festival do Imaxinario presenta o cartel oficial da súa 54 edición

S. P. — 2026-07-13T14:09:00Z

Curtas Festival do Imaxinario, o certame de cinema de xénero de Vilagarcía, presentou o cartel da súa 54 edición. Esta peza, creada un ano máis polo ilustrador arxentino Flavio Greco, trasládanos a un escenario cargado de mística local: a Illa de Cortegada, emprazada no propio concello arousán (fronte a costa de Carril), un escenario que segundo a organización “sempre gardou segredos entre a espesura dos seus bosques”.
Greco “captura un momento de inquietante tensión onde dous mozos, seguidores do festival, enfróntanse ao inefábel na súa procura de aventuras”, engaden, apuntando a obra non só xoga coa nostalxia facendo unha homenaxe aos clásicos de aventuras dos 80 e o horror cósmico, onde o descoñecido escapa a toda lóxica e comprensión humana: “É ademais unha actualización dunha lenda que durante xeracións atormentou aos veciños da localidade: o Urco, un can negro espectral, demoníaco e inmenso, portador de malos presaxios, que segundo contan as lendas, cruzaba a ría a nado nas noites de tormenta para sementar o pánico”.
Na ilustración de Flavio Greco esa figura mítica reimaxínase coma “un horror que transcende a nosa realidade”, lembrándonos que “en Curtas Festival do Imaxinario, a tradición e a modernidade, o imaxinario e o fantástico sempre camiñan da man”, explican dende a organización.
Esta narrativa visual serve de preámbulo para que, do 23 de outubro ao 1 de novembro de 2026, Vilagarcía de Arousa sexa novamente o epicentro do fantástico.
Formato 9.16
Este ano o certame tamén foi noticia por traer unha importante novidade tecnolóxica para a súa nova edición: a sección Vertical Fantastic Contest, a través da cal a comunidade de seareiros poderá desfrutar de cinema de xénero en formato 9.16. A través desta sección, o festival buscará as 10 mellores obras de xénero concibidas dende a verticalidade.
O novo apartado xorde dunha realidade que non se pode negar: a forma na que consumimos o audiovisual mudou. Así, indican dende a organización, “as pantallas dos nosos móbiles e as plataformas dixitais crearon novas formas de narrar”, e o “que empezou case como unha anécdota, o formato vertical (9.16), é hoxe unha linguaxe propia cunha gran forza, capaz de conectar directamente co público sen perder calidade, profundidade nin identidade de autor”.
Por iso, Curtas Festival do Imaxinario dá un paso adiante na súa 54ª edición (do 23 de outubro ao 1 de novembro de 2026) coa creación de Vertical Fantastic Contest, unha nova sección competitiva enfocada en “explorar como respiran o terror, a fantasía e a ciencia ficción cando lle damos a volta á pantalla”.
“Buscamos curtametraxes e series web pensados desde cero para o dispositivo móbil, pezas que non sexan simples recortes dun plano panorámico, senón que entendan a verticalidade como parte da historia”, sinala o equipo do festival, engadindo que “queremos ver como os creadores aproveitan este lenzo para xerar inmersión e tensión dunha forma distinta”.
A selección será moi coidada: escolleranse só 10 traballos para que compitan polo galardón desta categoría.
Respecto da irrupción da intelixencia artificial, sinalan: “Queremos deixar clara a nosa postura respecto ás novas ferramentas tecnolóxicas, valoramos por encima de todo o talento e a perspectiva das persoas; aínda que permite o uso puntual de intelixencia artificial como un apoio creativo menor, non aceptaremos proxectos xerados integramente con IA. A obra ten que ter pulso e corazón humano”.
Dende 1973
Cunha traxectoria que se remonta a 1973, Curtas Festival do Imaxinario de Vilagarcía de Arousa consolídase como o decano dos certames audiovisuais en Galicia e un referente para o xénero fantástico e de terror. En palabras da organización, trátase “dunha experiencia multidisciplinar que transforma a cidade na capital do extraordinario, integrando cinema, literatura, cómic e artes visuais nunha proposta cultural única”.
Curtas Festival do Imaxinario é membro oficial da Méliès International Festivals Federation (MIFF), o que lle permite outorgar anualmente o prestixioso selo Méliès d''Argent á mellor curtametraxe fantástica europeo. Recentemente, o evento foi recoñecido coa EFFE Label 2026-2027, o distintivo de calidade que outorga a European Festivals Association (EFA) co apoio da Comisión Europea, e figura na exclusiva listaxe de Dread Central como un dos 90 mellores festivais de xénero de todo o mundo. Ademais de ser festival cualificador dos premios Goya na súa categoría de curtametraxe.
Declarado Evento de Interese Turístico polo Concello de Vilagarcía de Arousa, o festival ofrece cada outono unha coidada escolma internacional de longametraxes e curtametraxes, complementada cunha axenda de encontros con creadores de primeiro nivel, exposicións inéditas e obradoiros.
Curtas Festival do Imaxinario celebrará a súa 54 edición do 23 de outubro ao 1 de novembro co apoio institucional do Concello de Vilagarcía de Arousa, a Deputación de Pontevedra e a Xunta de Galicia, o patrocinio de De Angeles Films, Rei Zentolo, Acción Cultural Española, DCP Ready, Factoria do Lume, Gadis, Harald House e The Post Office.

O grupo NEUROcom do CICA inicia un campamento tecnolóxico para menores con parálise cerebral unilateral

S. P. — 2026-07-13T11:32:55Z

O grupo de investigación NEUROcom (Neurociencia e Control Motor) do Centro Interdisciplinar de Química e Bioloxía (CICA) da Universidade da Coruña organiza a primeira edición de WeFun Camp – Marea de Aventuras, un campamento de verán que combina rehabilitación intensiva, investigación científica e actividades inclusivas para nenos e nenas con parálise cerebral unilateral, máis coñecido como hemiparesia, e as súas familias.
A iniciativa desenvolverase durante dez días consecutivos, no marco da fase final do proxecto de investigación WeFun, liderado pola investigadora Verónica Robles García e financiado polo Ministerio de Ciencia e Innovación, a Axencia Estatal de Investigación e o Fondo Europeo de Desenvolvemento Rexional (FEDER).
Segundo explica a UDC, o campamento constitúe un estudo piloto diseñado para avaliar os efectos do programa WeFun – apps, combinado con práctica bimanual intensiva, para mellorar a funcionalidade do brazo máis afectado en nenos e nenas de entre 4 e 8 anos con parálise cerebral unilateral, que se constitúe como un dos subtipos máis frecuente a nivel mundial.
A proposta integra tecnoloxía portátil, aprendizaxe motora e actividades adaptadas, co obxectivo de favorecer melloras funcionais, a participación social e cambios sostíbeis na vida diaria dos menores.
No campamento WeFun Camp utilízase principalmente tecnoloxía para carrexar (wearables) integrada cunha plataforma dixital de desenvolvemento propio. O obxectivo destas ferramentas é medir e motivar o uso espontáneo do brazo afectado en nenos con parálise cerebral unilateral (hemiparesia).
Empréganse reloxos intelixentes (smartwatches) grazas á colaboración con Samsung Electronics Iberia destinados a rexistrar o movemento real e a actividade bimanual dos menores durante o campamento. Tamén as aplicacións de WeFun – apps, o ecosistema de aplicacións informáticas e software deseñado especificamente polos investigadores do proxecto. Esta plataforma serve para cuantificar as doses de exercicio, pautar rutinas en contornas naturais e facer un seguimento clínico adaptado ao xogo.
Ademais do seu compoñente investigador, WeFun Camp aposta por un modelo de intervención centrado na nenez e nas familias, incorporando obradoiros formativos e espazos de acompañamento. O programa promove tamén a convivencia con irmáns e outros menores sen patoloxía, favorecendo un contexto natural de inclusión a través do xogo, o deporte e as actividades de lecer.
O proxecto WeFUN atópase dentro da liña de investigación sobre control motor na infancia do grupo NEUROcom, integrado no CICA e no INIBIC. O grupo desenvolve investigación de referencia en estimulación cerebral, neurorehabilitación, neuromodulación e estudos da base neurofisiolóxica da fatiga, participando en redes internacionais e proxectos de alto impacto científico.
No caso de WeFUN, os resultados preliminares xa evidencian melloras clinicamente significativas na funcionalidade dos participantes, ao tempo que o proxecto contribúe á xeración de coñecemento científico e á transferencia de tecnoloxía cara á práctica clínica.
A celebración de WeFun Camp é posíbel grazas á implicación dun amplo tecido de institucións, fundacións, empresas e entidades colaboradoras que contribúen ao desenvolvemento dun campamento innovador e inclusivo. Entre elas destacan a Fundación ADCAI e Latchmill, que financian bolsas de aloxamento e manutención para as familias participantes; Samsung Electronics Iberia, que cede reloxos intelixentes para o desenvolvemento da investigación; entidades que ofrecen actividades adaptadas ás necesidades como a Fundación María José Jove asi como ALE-HOP, DiDixital Impresores, Gráficas Mera, Marina Coruña, Residencia Rialta, Parafarmacia Castro OF Experiences, a Oficina de Cooperación e Voluntariado da UDC, a Facultade de Fisioterapia, o INIBIC e o Concello da Coruña, entre outras entidades colaboradoras.
O proxecto conta tamén coa participación desinteresada de profesionais da pediatría, persoal investigador e estudantes, que contribúen de forma voluntaria ao éxito desta primeira edición.
No marco do desenvolvemento do campamento, o vindeiro 17 de xullo celebrarase unha visita institucional na que participarán representantes da Fundación ADCAI e do Concello da Coruña, que poderán coñecer de primeira man o traballo realizado polo equipo investigador de NEUROcom, o desenvolvemento das actividades e o impacto social e científico desta iniciativa nas familias participantes.

A Comisión Europea prepara unha proposta para limitar o acceso dos menores ás redes sociais

Redacción — 2026-07-13T11:02:00Z

: Jörg Fegert, Ursula von der Leyen e Maria Melchior

A Comisión Europea anunciou que presentará despois do verán unha proposta para reforzar a protección dos menores na Internet, centrada na implantación de restricións de acceso ás redes sociais segundo a idade e nun maior control sobre o deseño das plataformas dixitais. O anuncio produciuse coincidindo coa entrega do informe do Panel Especial sobre Seguridade Infantil na Internet e coa publicación dun Eurobarómetro que reflicte un amplo apoio cidadán a medidas máis estritas.
A presidenta da Comisión Europea, Ursula von der Leyen, defendeu que «as redes sociais non son un xoguete» e sostivo que corresponde ás plataformas demostrar que os seus servizos non prexudican os menores. Afirmou que Europa non pode permitir que «algoritmos depredadores» condicionen o desenvolvemento da infancia e lembrou que os fabricantes de produtos son responsables da súa seguridade, polo que ese mesmo principio debe aplicarse ás grandes plataformas tecnolóxicas.
Von der Leyen sinalou que a lexislación europea xa permite actuar contra elementos como os algoritmos adictivos, os patróns escuros, os contidos prexudiciais ou os contactos non desexados a través do Regulamento de Servizos Dixitais (DSA). Neste sentido, lembrou as actuacións recentes da Comisión contra TikTok polo deseño adictivo da plataforma e contra Meta.
A proposta comunitaria tamén aposta por introducir restricións adaptadas á idade. A presidenta explicou que o debate non consiste en determinar se os menores poden acceder ás redes sociais, senón cando as redes sociais deben poder acceder a eles. Entre as ferramentas previstas figura a aplicación europea de verificación da idade, deseñada para preservar a privacidade dos usuarios e distribuída como software de código aberto.
O informe do panel de expertos tamén apunta á necesidade de establecer unha idade mínima para acceder ás redes sociais e recomenda unha incorporación gradual segundo as diferentes etapas do desenvolvemento infantil. Von der Leyen citou algunhas das conclusións científicas, entre elas que os menores de tres anos non deberían estar expostos ás pantallas e que o uso das redes sociais por parte dos nenos debería producirse sempre baixo supervisión de pais, coidadores ou docentes e con límites de tempo.
Segundo expuxo a presidenta, os datos indican que a mocidade europea pasa entre catro e seis horas diarias diante das pantallas, o que equivale a arredor de vinte anos ao longo da súa vida. Ademais, asegurou que preto do 60 % dos menores europeos sufriron problemas emocionais ou psicosociais relacionados coa actividade na internet.
O apoio social a medidas máis estritas reflíctese tamén no último Eurobarómetro, elaborado entre o 19 e o 24 de xuño con entrevistas a 25.904 cidadáns dos 27 Estados membros. O 71 % dos enquisados identifica o ciberacoso como o principal risco para os menores nas redes sociais, seguido da captación con fins de explotación sexual (70 %), da exposición a contidos violentos, extremistas ou relacionados coa autolesión (69 %) e do uso indebido dos datos persoais dos menores (69 %). O 64 % tamén expresa preocupación pola captación para actividades ilegais e o 60 % polos deseños adictivos das plataformas.
A enquisa revela que o 63 % dos europeos apoia que a Unión Europea limite por lei o acceso dos menores ás redes sociais en función da idade. Deles, un 36 % aposta por unha prohibición total por baixo dun determinado limiar de idade, mentres que un 27 % prefire atrasar progresivamente o acceso. Pola contra, o 13 % considera que a supervisión debería recaer unicamente nas familias e nos centros educativos.
O Eurobarómetro tamén analiza outras prioridades da cidadanía europea. O 66 % dos participantes afirma utilizar diariamente as redes sociais para informarse sobre actualidade ou política e reclama medidas máis contundentes contra a desinformación. As propostas con maior respaldo son sancións máis severas para os contidos ilegais (44 %), normas máis estritas para as plataformas (40 %), a identificación clara dos contidos xerados ou manipulados mediante intelixencia artificial (38 %), o establecemento dunha idade mínima para acceder ás redes sociais (37 %) e un maior investimento en alfabetización mediática e verificación independente de información (29 %).

Máis de 200 profesionais xuntáronse en Santiago no II Foro de Innovación e Emprendemento

S. P. — 2026-07-13T10:45:00Z

Máis de 200 persoas acudiron o pasado venres 10 de xullo ao II Foro de Innovación e Emprendemento de APD, que se celebrou en Santiago de Compostela co apoio da Xunta de Galicia baixo o programa de Capacita Directivos. O encontro reuniu a directivos, representantes de empresas e profesionais no Lux Events Center da capital galega, para abordar os principais retos e oportunidades ao redor da innovación e a creación de valor empresarial.
A directora da zona noroeste de APD, Ana Sánchez, foi a encargada de dar a benvida ao máis do centenar de asistentes, remarcando que este foro parte da idea de que innovación e emprendemento actúan “como motores complementarios do desenvolvemento empresarial: a primeira impulsa a reinvención de organizacións e procesos, mentres que o segundo achega a capacidade de crear novos proxectos e abrir camiños de crecemento”.
Tamén fixo fincapé no 70 aniversario da asociación, remarcando os seus proxectos actuais como o barómetro de competitividade que están a levar a cabo en territorios de toda España e cuxos resultados verán a luz no 8º Congreso Nacional de Directivos, que terá lugar os días 27 e 28 de outubro en Madrid.
O primeiro bloque de intervencións iniciouse co relatorio inaugural de Guido Stein, filósofo, escritor e profesor da IESE Business School; que compartiu con todos os asistentes a súa particular visión e reflexión ao redor de innovar no contexto actual. Sinalou que “nos atopamos nun momento onde non existe o necesario silencio, onde os emprendedores poidan innovar; e chamou á necesidade de ver as cousas desde diferentes ángulos e perspectivas, tendo en conta que a contorna dixital xa é unha segunda pel”. Co seu inspirador discurso, o experto abriu o camiño das seguintes intervencións, como a conversa entre Javier Sesma, conselleiro de APD e Pablo Carretero, responsábel territorial de vendas de IBM, que reflexionaron conxuntamente sobre as pancas e os retos da innovación aberta. Ambos coincidiron en sinalar que compartir coñecemento “non supón perder competitividade”, e que ese cambio de mentalidade resulta crucial para que os equipos “constrúan valor dentro das propias organizacións”. En definitiva, sinalaron que a clave é que a innovación debe acontecer arredor da tecnoloxía xa implantada na empresa, pero sempre involucrando “ás persoas, a actitude e a cultura”.
O primeiro bloque da mañá finalizou cunha mesa redonda sobre as experiencias sobre innovación desde empresas consolidadas, na que participaron Álvaro Platero, vicepresidente de Estaleiros Gondán; Sebastián Pantoja, director xeral de Carelife Solutions (Televés Corporación) e Eva Pérez, responsábel de política pública de Amazon, baixo a moderación de Rosa Méndez, directora da área de Innovación e Emprendemento de IGAPE.
Por parte de Amazon, Eva Pérez sinalou que desde a multinacional americana ven o fracaso e a innovación como “dúas caras da mesma moeda”; e que desta forma a mirada innovadora debe residir na propia cultura da empresa. No caso de Estaleiros Gondán, o seu vicepresidente indicou que a inercia dunha empresa consolidada pode ser moi positiva para axudar ao carácter innovador, cunha carteira de clientes establecida ou un coñecemento avanzado do sector; pero que tamén pode resultar un obstáculo a superar de face a dar luz novas ideas. Unha reflexión que tamén compartía Sebastián Pantoja, engadindo que se debe innovar atendendo ao impacto, á capacidade de medir o éxito e ao talento dos equipos?”.
O segundo bloque da xornada, dedicado a novas firmas innovadoras (startups) e empresas emprendoras, comezou coa presentación de diferentes proxectos emprendedores de man da moderación de Hugo Criado, CEO de Medrar. Desta forma, os asistentes coñecendo a historia e experiencia de Wilson Gomes, CEO de Celtarys; Jorge Parada, CTO de Cargoffer; Elena Fontán, directora xeral de Orixe Salgada; Fernando Gago, CEO de Sense Aeronautics e Francisco Pérez, CTO e socio fundador de Loutkar Robotics.
Os cinco relatores compartiron as súas historias de orixe, desde empresas consolidadas até inicios fóra do exercicio empresarial; onde sinalaron “a vertixe” como parte do seu día a día, “facendo malabares entre ver onde estamos e onde queremos estar”. Nas súas intervencións tamén sinalaron ao ecosistema galego investidor como un exemplo de profesionalización e crecemento.
O bloque finalizou cunha perspectiva diversa: a do emprendemento sénior, profesionais con dilatadas carreiras que deciden emprender co coñecemento de toda unha vida profesional detrás. Moderados por María Loureiro, directora científica de ECOBAS, na mesa participaron Eduardo Ferrer, CEO e co-fundador de Slimop Space; Mamen Diego, fundadora de Objet Particulier; Maite Prida, fundadora de Lon & Boc; Jaime Feced, CEO de Plantbased Biotech e Javier Álvarez, fundador de Aquiax.
A mesa redonda versou sobre as experiencias de cada un dos profesionais, especialmente centradas en como “emprender na segunda carreira directiva”, onde foron destacadas as vantaxes (sobre o coñecemento adquirido ou os contactos establecidos) e as dificultades de levar a cabo un novo proxecto (como pasar de ter todos os recursos a ter que buscalos).
A clausura institucional foi realizada pola conselleira de Economía e Industria da Xunta de Galicia; María Jesús Lorenzana; que destacou que “o verdadeiro valor da innovación non está soamente en xerar novas ideas, senón en converter esas ideas en empresas máis competitivas, nunha economía máis forte”; sinalando ás empresas participantes como exemplo dese “maior potencial de crecemento e marxe de adaptación”.
A conselleira engadiu que “o éxito dun ecosistema innovador non se mide, evidentemente, só polo número de startups que se crea, senón que se mide na súa capacidade para transformar o conxunto da sociedade e o conxunto da economía”.
Así mesmo, avanzou a posta en marcha da primeira Estratexia de Innovación Empresarial de Galicia, dotada con máis de 400 millóns de euros, co obxectivo de facilitar a transferencia de coñecemento ás pemes, favorecer a incorporación de intelixencia artificial e tecnoloxías avanzadas e axudar a que as novas firmas innovadoras se consoliden, medren e atraian investimento.

Os responsables das tecnoloxías que fan posible unha web aberta déronse cita na Coruña

Marcus Fernández — 2026-07-13T10:09:29Z

O recinto de PALEXCO na Coruña acolleu entre os días 15 e 17 de xuño unha nova edición do Web Engines Hackfest, un encontro que xuntou a unha parte significativa da comunidade internacional responsable das tecnoloxías que sustentan a web. No encontro discutíronse temas como a accesibilidade, a seguridade, a gobernanza, a interoperabilidade dos navegadores e mesmo a intelixencia artificial na web, que centraron tanto relatorios como sesións colaborativas. Para saber máis deste evento falamos cun dos seus coordinadores, Manuel Rego, de Igalia, compañía responsable de que unha xuntanza desta magnitude teña lugar en Galicia.

— Podes comentarnos que levou a Igalia a organizar o primeiro Hackfest en 2009 e como foi evolucionando o proxecto ata o seu formato actual?
— Por aqueles días Igalia estaba traballando no navegador web do proxecto GNOME (Epiphany), que orixinalmente empregaba Gecko (o motor de renderizado de Mozilla Firefox), pero debido a limitacións para adaptalo as necesidades do proxecto, tomouse a decisión de migrar a WebKit (que daquela era o motor de Google Chrome e Safari). Como había moito traballo por facer, e a comunidade era pequena, xurdiu a idea de organizar un encontro de desenvolvedores na oficina de Igalia na Coruña, chamado “WebKitGTK+ Coruña Hackfest 2009”, 12 persoas que estiveron traballando xuntos durante unha semana no proxecto. Desde aquel momento, cada ano fomos repetindo o evento, cada vez con máis éxito de asistencia; comezaron a participar desenvolvedores de outros motores web, no só xente traballando en WebKitGTK+, é en 2014 cambiamos o nome do evento a “Web Engines Hackfest”, invitando membros doutras comunidades. O evento non deixou de medrar, e nesta última edición rondamos os 160 participantes incluíndo desenvolvedores dos proxectos e empresas máis relevantes: Apple, Google, Microsoft, Mozilla, W3C, ...

— Como temos que ver este tipo de encontros? Como unha alternativa ou como un complemento a estruturas de estandarización máis formais?
— A idea principal do Web Engines Hackfest é proporcionar un espazo os desenvolvedores dos diferentes motores web, para poder traballar xuntos durante uns días, discutir sobre diferentes propostas, e axudar a atopar acordos que ás veces son complicados nas comunicacións virtuais. É non só os motores web, o Hackfest tamén se está a converter nun punto de encontro doutros proxectos e comunidades arredor da plataforma web, e que non teñen tanta representación nas organización de estándares, por exemplo vemos un pulo de sesións por parte de asistentes máis relacionados co ecosistema de JavaScript (runtimes, xestores de paquetes, etc.). Realmente é máis ben un complemento a outros eventos, como a TPAC do W3C, a principal diferencia é que neste caso a maioría dos participantes son contribuidores activos nos diferentes proxectos da plataforma web, ademais de participar nos procesos de estandarización.

— O impacto na comunidade global de desenvolvemento web deste tipo de encontros enténdese que é evidente pero, ten tamén algunha influencia no ámbito local? Conseguides atraer talento a este ámbito tan específico?
— Hoxe en día estase a converter nunha mini TPAC, na que se poden discutir e mover moitos temas, grazas a participación de desenvolvedores relevantes de moitos proxectos. Sobre o impacto local, estase convertendo nun evento popular neste ámbito; traer máis de 100 persoas de todo ó mundo ata aquí ten un impacto económico directo, pero tamén posiciona A Coruña e Galicia como un referente internacional para a Web. Por outro lado, temos sempre participación de xente próxima, que poden ver de preto por uns días como se debaten e deciden as novas funcionalidades da Web. Pode que veñan máis en tema curiosidade, e con gañas de aprender e coñecer outros participantes. Tamén temos algúns estudantes que se achegan xa que están traballando en temas relacionados nos seus proxectos universitarios.

— O Hackfest ten un formato híbrido. Tras a pandemia enténdese como unha obriga este tipo de opción pero, podemos dicir xa que a presencialidade recuperou o pulo de antes? Ou a participación remota é xa irrenunciable neste tipo de encontros?
— Realmente a experiencia presencial é insubstituíble, en calquera destes eventos non é o mesmo o que pasa cando podes asistir en persoa que de forma remota. As pequenas conversas durante unha pausa, ou na comida, son ás veces máis importantes que algunhas das sesións oficiais. Seguimos proporcionando a posibilidade de participar en remoto, xa que sabemos que non todo o mundo pode asistir, e nalgunhas sesións son lideradas por persoas que asisten remotamente.

— Como é que unha compañía afastada de Silicon Valley pode ter influencia nos navegadores web que usamos a diario?
— Todo comezou fai case dúas décadas, Igalia decidiu entrar no mundo dos navegadores web e os seus motores de renderizado (a peza que entende o HTML, CSS e JavaScript para logo pintar algo nas nosas pantallas), inicialmente coma un investimento de futuro, e pouco a pouco traballando con múltiples empresas internacionais na mellora e evolución dos mesmos. Realmente o noso código está en todos os navegadores, que usamos a diario, consciente e inconscientemente (como cando vemos o tempo no ascensor do edificio, ou acendemos unha Smart TV). Despois de todo este tempo, Igalia é unha marca recoñecida na plataforma web, temos desenvolvedores que ocupa posicións relevantes nas diferentes comunidades, e tamén participamos na elaboración dos estándares. Hoxe en día cerca dun 60-70% do traballo de Igalia está relacionado coa plataforma web no seu conxunto.

— Tras uns anos con grande diversidade nos motores web, agora dá a impresión de que Google e Apple conseguiron monopolizar esta tecnoloxía. Podemos ter esperanza nos desenvolvemento independentes dos xigantes tecnolóxicos?
— A historia da web e os navegadores sempre pasou por momentos que parecían destinados ó monopolio, durante uns anos Internet Explorer era o dominador, logo viu Mozilla Firefox, e agora estamos nos tempos de Google Chrome, salvo en iOS onde só se pode empregar Safari. É imposible adiviñar que vai pasar, pero os estándares abertos nos que se basea a web, permiten que existan alternativas e poida darse algún outro cambio no futuro.

— Aparte dos navegadores web e de escritorio, os motores web están en moitos outros lugares, o que fai que sexan unha peza fundamental da tecnoloxía actual. Poderías ilustrarnos sobre iso e sobre a necesidade de contar con solucións libres?
— Realmente, como xa comentei antes brevemente, os motores webs están en todos os lados, xa que as tecnoloxías webs son moi populares e empréganse en múltiples dispositivos. Por suposto calquera teléfono móbil, no que moitas aplicacións empregan tecnoloxía web, aínda que non o saibamos; pero tamén na maioría das pantallas que vemos a diario, por exemplo, a pantalla para sacar a cita do médico, calquera pantalla con información ou publicidade que atopemos pola rúa, o reloxo intelixente, a pantalla do robot de cociña; incluso en aparellos que non teñen pantalla, como altofalantes, ás veces se empregan motores web para xestionar temas de audio nos mesmos.

— Entre os participantes no encontro, había moita preocupación sobre o impacto da intelixencia artificial nas tecnoloxías web? Cara onde van os traballos actuais: fomentar a interacción con axentes de IA ou establecer proteccións fronte a sistemas automatizados?
— Todo o tema da IA é moi candente estes días, e con opinións moi variadas sobre o seu uso potencial e o impacto de cara ó futuro. No evento tivemos unha sesión que fala de como a IA encareceu moito o prezo da memoria RAM e discos duros (polas grande demanda das empresas detrás da IA) e como os navegadores web teñen que facer optimizacións para funcionar de forma adecuada en dispositivos menos potentes que os que había fai uns anos, é a primeira vez que se frea a evolución nestes aspectos. Tamén houbo unha presentación sobre WebNN que busca permitir executar tarefas da IA máis rápido nos navegadores web. O ano pasado tivemos outra charla, que falaba das novas funcionalidades propostas para poder empregar IA directamente nos navegadores (para traducións, correccións de textos, etc.). Hai moita experimentación estes días ó redor da IA, que por suposto tamén afecta a plataforma web, nos vindeiros anos veremos como evoluciona todo isto.

— Estamos moi lonxe de que as propias intelixencias artificiais se executen directamente no propio navegador web?
— Realmente algunhas das propostas que menciono na pregunta anterior buscan permitir este tipo de cousas. Dende ter forma de integrar todo e proporcionar unha mellor experiencia de usuario, ata permitir acceso ao hardware máis especializado para executar tarefas da IA de forma máis rápida no propio navegador, o que se coñece como Edge AI, do que WebNN é unha peza fundamental para empregar a IA nos propios dispositivos.

— Para rematar, poderías comentarnos o que destacarías da presente edición do Web Engines Hackfest? Algunha temática ou algún desenvolvemento sobre o que existe unha atención especial ou sobre a que haberá que colocar o punto de mira?
— Difícil pregunta... Hai moitas cousas que destacar do evento, para min o máis importante é os participantes no mesmo, e todas as sesións de traballo que se organizan durante eses días, tendo a posibilidade de traballar ao carón dos principais desenvolvedores. É moi difícil escoller un tema, a seguridade e a privacidade son cousas que sempre se discuten neste tipo de eventos, hoxe en día cada vez adícanse máis recursos para facer os navegadores máis seguros, e algúns deles intentan tratar do mellor xeito a privacidade dos seus usuarios (aínda que non pasa en tódolos casos). Outro asunto que ocupou varias sesións nesta edición é o chamado Cyber Resilience Act (CRA), unha nova lexislación da Unión Europea que trata de mellorar a seguridade dos produtos que incorporan elementos dixitais, e que obriga aos fabricantes a melloralos e corrixir os seus problemas durante o ciclo de vida dos mesmos. Isto ten implicacións e impacto non só na distribución dos navegadores web, pero tamén en todos os proxectos de software libre que son parte de produtos que se vendan na UE.

O Campus de Ferrol reúne alumnado de seis universidades europeas no marco dun programa de Industria 4.0

S. P. — 2026-07-13T09:03:11Z

Un total de 32 estudantes de grao, de mestrado e de doutoramento, procedentes de Croacia, Serbia, Finlandia, Romanía e de Portugal participan, ao longo de toda esta semana, no Programa Intensivo Combinado From Sensors to Data: Industry 4.0 in Engineering Experimental Testing. Neste marco o estudantado afondará en ámbitos clave como a Industria 4.0, a sensórica, a adquisición e análise de datos, a fabricación aditiva, a robótica, a Internet das Cousas (IoT) ou os xemelgos dixitais, así como na súa aplicación nos ensaios experimentais en enxeñaría.
A Universidade da Coruña (UDC), baixo o liderado do profesor da Escola Politécnica de Enxeñaría de Ferrol (EPEF) e investigador do Laboratorio de Enxeñaría Mecánica do Centro de Investigación en Tecnoloxías Navais e Industriais (CITENI), Fran González, coordina esta iniciativa de innovación docente, enmarcada no Programa Erasmus+.
No proxecto participan tamén a University of Zagreb (Croacia), a University of Belgrade (Serbia), a Tampere University (Finlandia), a Universidade do Minho (Portugal), así como a National University of Science and Technology Politehnica Bucharest e a Universitatea Petrol-Gaze Din Ploiesti, ambas as dúas de Romanía.
Logo de completar unha fase de formación previa en liña, o estudantado participante foi recibido, a primeira hora deste luns 13 de xullo, no Salón de Actos Concepción Arenal do Campus Industrial de Ferrol, pola vicerreitora do Campus de Ferrol e Responsabilidade Social, Ana Ares; polo director da Escola Politécnica de Enxeñaría de Ferrol (EPEF), Vicente Díaz; pola directora do Centro de Investigación en Tecnoloxías Navais e Industriais (CITENI), Belén Montero; polo adxunto de Mobilidade e Convenios da Vicerreitoría de Titulacións e Internacionalización, Bruno Casal; e máis polo director do Campus Industrial de Ferrol, Marcos Míguez.
A proposta formativa do Programa Intensivo Combinado From Sensors to Data: Industry 4.0 in Engineering Experimental Testing estrutúrase arredor de dous módulos comúns. O primeiro introduce ao alumnado no deseño paramétrico mediante FreeCAD e nos procesos de fabricación aditiva coa tecnoloxía FDM. O segundo céntrase na programación con Arduino, na integración de sensores, na adquisición de datos e nas comunicacións empregadas nos sistemas intelixentes conectados.
Para continuar coa súa formación, as e os participantes poderá elixir entre diferentes itinerarios vinculados ás áreas de especialización do Campus Industrial de Ferrol, como a arquitectura naval, a monitorización de maquinaria e o mantemento preditivo, a robótica submarina, o desenvolvemento de novos materiais poliméricos ou mesmo a experimentación aerodinámica no Túnel do Vento.
O programa desta iniciativa formativa internacional complétase con visitas ao Centro de Investigación en Tecnoloxías Navais e Industriais (CITENI), situado no propio Campus Industrial de Ferrol, e ao Centro Interdisciplinar de Química e Bioloxía (CICA), no Campus da Coruña. Ademais, o estudantado participante poderá gozar de actividades culturais e de lecer entre as que se inclúen varias visitas guiadas pola cidade e un paseo en barco pola ría.
Foto: A Unversidade da Coruña (UDC) coordina unha formación na que participa alumnado de grao, de máster e de doutoramente da University of Zagreb (Croacia), da University of Belgrade (Serbia), da Tampere University (Finlandia), da Universidade do Minho (Portugal), así como da National University of Science and Technology Politehnica Bucharest e da Universitatea Petrol-Gaze Din Ploiesti, ambas as dúas de Romanía.

Mundos Digitales pecha a súa edición de 2026 cunha última xornada dedicada á consolidación da IA, os grandes estudios e a evolución dos efectos visuais

Redacción — 2026-07-13T08:24:00Z

O pasado sábado Mundos Digitales puxo punto final á súa XXIV edición cunha xornada que sintetizou boa parte dos temas que atravesaron o congreso durante os tres días de actividade. A intelixencia artificial, a evolución dos efectos visuais, a produción cinematográfica e o percorrido histórico dunha industria en constante transformación marcaron un programa que reuniu profesionais de compañías como Framestore, Marvel Studios, ILM, Netflix, Disney ou El Ranchito, pechando unha edición especialmente centrada nos novos fluxos de creación dixital.
A sesión comezou coa intervención de Kevin Sears, supervisor de CGI en Framestore, quen abriu a mañá cunha análise do traballo desenvolvido para Superman. A conferencia estivo dedicada á creación de hologramas mediante tecnoloxías 4D Gaussian Splatting (4DGS), unha das liñas máis innovadoras na representación tridimensional de elementos dinámicos. A sesión permitiu comprobar como estas técnicas, presentes ao longo de varias conferencias do congreso, continúan evolucionando cara a aplicacións cada vez máis sofisticadas dentro das grandes producións cinematográficas.
Mentres tanto, no Auditorio Lightbox Academy, Agustín Cossa abordou unha das cuestións máis recorrentes desta edición coa conferencia A verdade da IA na industria audiovisual. Lonxe de presentar unha visión especulativa, o supervisor de efectos visuais de Australis analizou o estado real da incorporación da intelixencia artificial aos procesos profesionais, diferenciando entre as ferramentas que xa forman parte da produción diaria e aquelas que aínda permanecen nunha fase experimental. A súa intervención serviu para completar un dos grandes fíos condutores de Mundos Digitales 2026: entender a IA como unha tecnoloxía chamada a complementar o traballo creativo, máis que a substituílo.
A intelixencia artificial seguiu monopolizando boa parte da programación da mañá na Sala Azken. Carlos Fernández de Vigo e Alba Meijide deron conta de AI Assemble, unha iniciativa orientada a construír unha comunidade de colaboración arredor da IA aplicada á creación dixital, favorecendo o intercambio de coñecemento entre profesionais, empresas e centros de investigación. A continuación, o avogado Fran Menéndez afondou nas implicacións legais e éticas destas tecnoloxías coa conferencia Humanismo na IA, centrada nos desafíos normativos e nos dereitos asociados ao uso de ferramentas de xeración automática de contidos. Pechou este bloque Amélie Houpline cunha reflexión sobre a xestión do cambio nas organizacións, analizando como a incorporación da IA constitúe tamén un reto empresarial e cultural para os equipos de traballo.
Un dos momentos máis singulares da mañá chegou coa presentación do proxecto cinematográfico RENO. Rob Hifie, Paul Silcox e Clive Llewellyn explicaron como esta película de ciencia ficción foi concibida como un auténtico banco de probas para experimentar con fluxos de traballo de última xeración en efectos visuais. Máis alá da propia produción, a conferencia mostrou como determinados proxectos se converten en laboratorios onde validar metodoloxías que posteriormente poden incorporarse ás grandes producións internacionais.
No Auditorio Animum, Nekodificador propuxo unha reflexión arredor do denominado novo paradigma líquido, unha aproximación á creación visual marcada pola flexibilidade dos procesos e pola constante evolución das ferramentas dixitais. A súa intervención dialogou de maneira natural co resto da programación, que durante toda a edición incidiu na necesidade de adaptar os métodos tradicionais a un ecosistema creativo cada vez máis dinámico.
A sesión do mediodía trasladou novamente o protagonismo aos grandes estudios de produción. David Blanco e Daniel Gómez, supervisores de efectos visuais de El Ranchito, compartiron o traballo realizado para The Boys baixo un título tan expresivo como ¡Cuarto e metade de triparía, por favor! Sangue e vísceras en The Boys. A conferencia permitiu descubrir parte dos procesos empregados para construír unha das estéticas visuais máis recoñecibles da televisión recente, caracterizada pola integración de efectos dixitais extremadamente complexos con rodaxes de acción real.
Ao mesmo tempo, Enrique Gato repasou os vinte e cinco anos de evolución de Tadeo Jones, convertendo a súa intervención nun percorrido pola transformación da animación española durante as últimas dúas décadas. O director de Lightbox Animation Studios explicou como o desenvolvemento da saga foi acompañado pola evolución das ferramentas de produción, pero tamén pola maduración dos equipos e dos procesos creativos, exemplificando a consolidación dunha industria nacional con crecente proxección internacional.
Xa pola tarde, John Haley, supervisor de efectos visuais de Marvel Studios, levou aos asistentes aos bastidores de Wonder Man, amosando o traballo invisible que sustenta unha gran produción do universo Marvel. A conferencia serviu para ilustrar o enorme nivel de coordinación que esixen este tipo de proxectos, nos que centos de artistas e especialistas colaboran durante meses para construír escenas que o espectador percibe como completamente naturais.
A recta final do congreso estivo marcada pola tradicional cerimonia de entrega dos premios do Festival Internacional de Animación e pola concesión do Premio Especial Mundos Digitales, un dos recoñecementos máis destacados do evento, antes da conferencia de clausura. Esta correu a cargo de Paul Giacoppo, supervisor de personaxes dixitais de Industrial Light & Magic, que ofreceu un percorrido polos cincuenta anos de historia do estudio fundado por George Lucas. Baixo o título 50 años de ILM: de Star Wars a Frankenstein, a intervención repasou a evolución dunha compañía decisiva para comprender a historia dos efectos visuais modernos e a súa capacidade para reinventarse tecnoloxicamente xeración tras xeración.

A Cámara de Santiago mobiliza máis de 4,5 millóns para impulsar a transformación dixital das empresas da demarcación

S. P. — 2026-07-13T08:09:34Z

A Cámara de Comercio de Santiago fixo balance da súa actividade recente en materia de impulso á innovación, ao emprendemento, a formación, a internacionalización e a cooperación europea. Estes datos aparecen reflectidos na Memoria de Actividades e nela constátase que a Cámara reforzou o seu apoio á dixitalización empresarial, xestionando máis de 1.615 solucións dixitais con máis de 4,5 millóns de euros en axudas.
Este documento destaca “un ano de intensa actividade” no que a institución consolidou o seu papel como axente clave no impulso económico da súa área de influencia.
No ámbito da transformación dixital, as axudas permitiron ás empresas incorporar novas tecnoloxías, optimizar procesos produtivos e reforzar a súa competitividade. En total, tramitáronse 2.280 expedientes, asináronse 207 novos acordos e organizáronse 21 xornadas especializadas, nas que participaron máis de 600 empresas e profesionais.
A presidenta da Cámara de Comercio de Santiago, María Pais Fajín, destaca que esta memoria "é o reflexo do compromiso da institución co desenvolvemento económico e empresarial da nosa demarcación". Segundo sinala, ao longo do exercicio a Cámara continuou traballando para ofrecer ás empresas asesoramento, apoio e ferramentas que lles permitan afrontar con éxito os retos derivados da transformación dos mercados e da evolución tecnolóxica. Así, subliña que a dixitalización, a innovación, a internacionalización e o emprendemento seguen constituíndo os principais eixes de actuación da entidade.
Retos
Dende a Cámara lembran que as pequenas e medianas empresas afrontan un escenario cada vez máis esixente, marcado pola aceleración da transformación dixital, a incorporación da intelixencia artificial, a necesidade de mellorar a produtividade e o reto de atraer e reter talento cualificado. Uns desafíos ante os que, tal e como sinala tamén a secretaria xeral da Cámara, Rosa Mary Cardeso Trillo, "a Cámara debe seguir acompañando ao tecido empresarial con servizos de formación, innovación, internacionalización e asesoramento, reforzando a súa capacidade de adaptación e competitividade".
A memoria tamén pon en valor o papel das infraestruturas impulsadas pola Cámara (o Viveiro de Empresas, o Coworking Dixital Compostela, a Incubadora de Alta Tecnoloxía e o Biopolo da Sionlla) como instrumentos que, xunto coa Universidade de Santiago de Compostela e os centros de investigación, contribúen a crear un ecosistema de innovación con capacidade para atraer investimento, talento e novas oportunidades Internacionalización e emprendemento
A internacionalización mantívose como outra das grandes liñas estratéxicas da institución. Durante 2025 atendéronse 2.466 consultas especializadas, emitíronse 3.565 documentos para operacións de comercio exterior e desenvolvéronse actuacións en 14 países nas que participaron 43 empresas, favorecendo a apertura de novos mercados.
No ámbito do emprendemento, a Cámara continuou reforzando o seu ecosistema de apoio á creación de empresas mediante o Viveiro de Empresas, o Coworking Dixital e outras iniciativas como o programa desenvolvido en colaboración coa Deputación da Coruña Provincia Emprendedora. Durante 2025 realizáronse máis de 680 asesoramentos, impulsouse a creación de 176 novas empresas. O Viveiro de Empresas mantivo unha ocupación do 92 % e consolidouse, un ano máis, entre os tres mellores viveiros de España segundo a clasificación de FUNCAS, mentres arredor de 500 persoas participaron en actividades e fomento da cultura emprendedora.
A formación continuou sendo outro dos piares da actividade da institución. Ao longo de 2025 organizáronse 54 accións formativas, nas que participaron máis de 1.270 persoas, co obxectivo de mellorar a cualificación profesional e adaptar as competencias ás necesidades reais das empresas. A estas actuacións súmanse os programas de acreditación de competencias profesionais, nos que participaron 132 traballadores, e as iniciativas de mentoring empresarial, desenvolvidas coa colaboración de 11 empresas.
A actividade da Cámara estendeuse tamén ao ámbito europeo, reforzando a súa participación en proxectos de cooperación internacional e en iniciativas estratéxicas como a alianza das Cámaras de Comercio do Arco Atlántico, ademais de desenvolver diferentes programas destinados a impulsar o emprendemento, a innovación e a captación de novas oportunidades para as empresas galegas.