Código Cero - Diario Tecnolóxico de Galicia

Amazon reestrutura o seu servizo de videoxogos na nube

Marcus Fernández — 2026-04-10T21:00:00Z

Amazon comunicou aos usuarios de Luna unha transformación significativa da plataforma, que deixará de ofrecer compras individuais de xogos, tendas de terceiros e determinadas subscricións externas. A decisión, que xa foi trasladada por correo electrónico á comunidade de usuarios, enmárcase nun cambio de estratexia cara a un modelo centrado nun catálogo accesible mediante subscrición.
A partir do 10 de abril de 2026, Luna elimina a posibilidade de adquirir xogos de maneira individual e tamén retira as tendas asociadas a compañías como EA, Ubisoft ou GOG. Do mesmo xeito, as subscricións de terceiros contratadas a través da plataforma, como Ubisoft+ ou Jackbox Games, deixarán de estar dispoñibles para novas altas e cancelaranse automaticamente tras o último ciclo de facturación.
Os usuarios que xa adquiriran xogos poderán seguir xogando a estes títulos ata o 10 de xuño de 2026. A partir desa data, deixarán de estar accesibles en Luna, aínda que Amazon indica que seguirán dispoñibles nas plataformas orixinais vinculadas, como EA App, GOG Galaxy ou Ubisoft Connect. Tamén se eliminará a funcionalidade Trae a túa propia biblioteca, que permitía executar en streaming xogos comprados noutros ecosistemas.
Este xiro responde ás demandas dos usuarios, que reclaman un acceso máis sinxelo a xogos de calidade, experiencias sociais e un fluxo continuo de contido. Dende Amazon aseguran que reforzará a súa oferta baseada en subscricións propias, como Luna Estándar e Luna Premium, así como novas propostas como GameNight.
Como compensación, os usuarios afectados recibirán unha oferta de subscrición gratuíta a Luna Premium, cuxos detalles serán comunicados a partir do 10 de xuño. Ademais, Amazon permitirá descargar os datos de gardado dos xogos durante un prazo de 90 días, aínda que advirte de que a compatibilidade con outros servizos dependerá de cada editor.
Este movemento consolida a transición de Luna cara a un modelo máis próximo ao doutros servizos de xogo en streaming baseados en catálogo, afastándose dunha estratexia híbrida que combinaba compra directa e integración de bibliotecas externas.

A USC convoca o futuro alumnado a coñecer virtualmente as súas titulacións e servizos

S. P. — 2026-04-10T20:30:00Z

Os vindeiros 13 e 14 de abril, o alumnado de Bacharelato, Ciclos Formativos de Grao Superior e de 4º de ESO ou calquera outra persoa interesada poderá coñecer de maneira virtual as titulacións e servizos da USC conectando directamente coas persoas que se encargan de impartir/coordinar estas titulacións e servizos.
Cos Encontros Virtuais na Zona USC preténdese achegar a máxima información ao futuro estudantado universitario sobre todo aquilo que ofrece a USC en Santiago e Lugo, comezando pola oferta de titulacións de grao pero tamén de servizos como a Oficina de Información Universitaria, o Servizo de Residencias ou o Proceso de Preinscrición e Matrícula nas Universidades de Galicia.
A USC explica que “para participar non é preciso inscribirse, unicamente hai que consultar na web dos encontros ou ben o cronograma ou ben premer nos graos ou servizos que interesen e dende aí conectarse no horario que máis conveña co profesorado do centro ou responsable do servizo”.
O alumnado que o desexe poderá facer as súas consultas de maneira directa na videoconferencia ou empregando o chat.
Moitas das videoconferencias terán lugar en horario de mañá para que os centros educativos poidan sumarse tamén e algunhas de tarde para facilitar a conexión coas familias.

Desartellado un grupo criminal especializado no roubo de móbiles de alta gama en festas galegas

S. P. — 2026-04-10T20:04:58Z

A Garda Civil e a Policía Nacional desarticularon esta semana, no marco da Operación Galaxia Aimalum, un grupo criminal itinerante especializado no roubo e furto de dispositivos móbiles de alta gama (principalmente iPhone) en eventos multitudinarios e festividades populares de Galicia.
Segundo explicou a Garda Civil, o grupo actuaba en festas e celebracións populares subtraendo os terminais mediante distracción ou violencia. Posteriormente usaban técnicas sofisticadas de suplantación de identidade e software malicioso para tomar o control total dos dispositivos, bloqueando o acceso das vítimas á súa información persoal.
Dous líderes da organización foron detidos, practicándose senllos rexistros en dous inmóbeis da Coruña onde se interviñeron 12 dispositivos móbiles subtraídos e disfraces utilizados para pasar desapercibidos entre a multitude.
A operación permitiu esclarecer máis de 200 delitos cometidos entre xullo de 2023 e decembro de 2025 en máis de 15 municipios galegos, cun valor total estimado superior aos 200.000 euros. A operación continúa aberta e non se desbotan novas detencións.
As pescudadas foron coordinadas polo equipo contra a ciberdelincuencia da Garda Civil da Coruña, o posto principal de Boiro e o Grupo V da Policía Xudicial de Lugo.
Unha das persoas detidas foi apreixado no inicio do Entroido de 2026 e o segundo esta Semana Santa.

Fronteiras Electrónicas abandona X

Redacción — 2026-04-10T15:30:00Z

A Fundación de Fronteiras Electrónicas (EFF) anunciou a súa saída da rede social X tras case dúas décadas de actividade na plataforma. A organización, centrada na defensa dos dereitos dixitais, considera que a decisión chega despois dun prolongado descenso no impacto das súas publicacións e dun cambio profundo no funcionamento do servizo.
Segundo explica a entidade, os datos de audiencia evidencian unha caída significativa. En 2018, a EFF publicaba entre cinco e dez mensaxes diarias en Twitter (actual X), acadando entre 50 e 100 millóns de impresións mensuais. En 2024, arredor de 2.500 publicacións apenas sumaron 2 millóns de impresións ao mes, mentres que no conxunto do último ano, con 1.500 mensaxes, obtiveron uns 13 millóns de visualizacións. Isto implica que unha publicación actual recibe menos do 3 % das visitas que lograba hai sete anos.
A organización tamén lembra que, tras a compra da plataforma por parte de Elon Musk en outubro de 2022, xa expresara as súas demandas para mellorar o servizo. Entre elas figuraban unha moderación de contidos máis transparente, con políticas públicas claras e procesos de apelación definidos; melloras reais en materia de seguridade, como a implantación de cifrado extremo a extremo nas mensaxes directas; e un maior control por parte dos usuarios mediante ferramentas de filtrado e interoperabilidade.
A EFF recoñece que Twitter nunca foi un espazo ideal, pero salienta que durante anos destacou pola súa defensa dos dereitos dos usuarios. Esta situación mudou coa reestruturación impulsada por Musk, que incluíu o despedimento do equipo de dereitos humanos e a redución de persoal en países onde a compañía resistía presións de gobernos autoritarios. Este contexto, sumado á saída doutros usuarios, levou finalmente á organización a abandonar a plataforma.
A entidade tamén responde ás críticas pola súa continuidade noutras redes sociais como Facebook, Instagram, TikTok ou YouTube. Asegura que a súa presenza nestes espazos non implica apoio ás súas políticas, senón que responde á necesidade de chegar a colectivos que dependen deles para informarse, organizarse ou manter redes de apoio. A EFF insiste en que segue denunciando prácticas como a publicidade invasiva, a censura de determinados contidos ou a discriminación de voces marxinadas.
De cara ao futuro, a organización sinala que centrará a súa actividade en outras plataformas como Bluesky, Mastodon ou LinkedIn, ademais do seu propio sitio web. A súa estratexia pasa por concentrar recursos onde poidan ter un maior impacto na defensa dos dereitos dixitais, nun contexto que consideran máis necesario ca nunca.

O Arquivo Sonoro de Galicia pon na Rede conferencias inéditas de Otero Pedrayo polo seu 50 cabodano

S. P. — 2026-04-10T14:36:11Z

Este venres, 10 de abril, cúmprense 50 anos do pasamento de Ramón Otero Pedrayo (Ourense, 1888–1976), profesor, ensaísta, novelista, xeógrafo e xornalista, e unha das figuras máis completas e influentes da cultura galega: unha efeméride que o Consello da Cultura Galega (CCG) celebra con novos materiais arredor da figura do polígrafo ourensán. Este venres 10 de abril póñense na Rede seis rexistros sonoros inéditos preservados no Arquivo Sonoro de Galicia que recollen intervencións do autor durante a súa viaxe que realizou a Bos Aires en 1959.
O Consello da Cultura sinala que “estas gravacións, nas que se conserva unicamente a voz do propio Otero Pedrayo, constitúen un testemuño sonoro da súa oratoria, do seu pensamento e do seu compromiso coa cultura galega no exterior”. Dende o CCG engaden que “estas conferencias prodúcense no contexto das Xornadas Patrióticas Galegas organizadas pola colectividade emigrante que xurdiron como resposta á necesidade de dotar o 25 de xullo dun contido que excedese o mero feito relixioso, e foron medrando en prestixio ata converterse nun acontecemento sen parangón entre as colectividades estranxeiras radicadas no país, tanto pola súa periodicidade como pola súa amplitude”.
Entre os materiais publicados inclúese a conferencia Cinco noites en Compostela. Clausura das Xornadas Patrióticas Galegas, gravada no Centro Galego de Bos Aires o 31 de xullo de 1959, na que o autor ofrece, en palabras do CCG, “un percorrido evocador polas rúas de Compostela e pola súa historia, cunha prosa suxestiva que invita a ser escoitada mentres se percorre a cidade, especialmente en días de chuvia”.
Tamén forma parte desta selección a súa intervención na homenaxe ao mestre José Pazos, celebrada no Centro Lucense o 19 de xullo dese mesmo ano, onde louva a figura do músico nunha breve mais intensa peza de carácter patriótico.
Así mesmo, recóllese a súa participación na inauguración das Xornadas Patrióticas Galegas no Teatro Avenida, o 19 de xullo de 1959, onde, como convidado de honra, agradece as palabras de presentación e exalta a lingua e a paisaxe galegas como sinais identitarios do pobo galego. Complétase a selección coa conferencia La Universidad de Santiago de Compostela, pronunciada no Ateneo Ibero-Americano o 18 de agosto de 1959, na que realiza un amplo percorrido pola historia da Universidade de Santiago de Compostela desde a súa fundación en 1495, evocando figuras ilustres e espazos de grande valor histórico e artístico.
Por último, inclúese tamén a intervención na inauguración do curso de AGUEA, celebrada no Centro Galego o 19 de agosto de 1959, na que Otero Pedrayo desenvolve unha reflexión profunda sobre o espírito galego, “amosando a súa ampla erudición e deténdose especialmente en aspectos da historia da arte, nomeadamente nas etapas románica e barroca”, en palabras do Consello da Cultura Galega.
A institución lembra que “a publicación destes audios permite recuperar e difundir unha parte esencial do legado oral de Otero Pedrayo, ao tempo que contribúe a poñer en valor a intensa actividade cultural desenvolvida pola emigración galega en Bos Aires a mediados do século XX”.
Trátase, engade, “dunha oportunidade única para escoitar directamente a voz dunha das figuras máis senlleiras da cultura galega contemporánea”.
Un espazo en liña dende xaneiro
En xaneiro deste 2026, no marco do Ano Oteriano que celebra o 50 cabodano, o CCG abriu na Rede un espazo que concentra todos os recursos elaborados pola institución ao fío do patriarca das letras galegas. Discursos, epístolas, publicacións, gravacións sonoras, especiais, a entrada biográfica e outros fondos documentais (artigos, manuscritos, etc.) compoñen este espazo que estará en permanente actualización.

Instagram por fin permite a edición de comentarios

Redacción — 2026-04-10T14:30:00Z

Instagram incorpora unha das funcións máis demandadas polos usuarios: a posibilidade de editar comentarios unha vez publicados. A novidade permite corrixir erros ou modificar o contido sen necesidade de eliminar a mensaxe e volver escribila, unha práctica que ata agora xeraba notificacións duplicadas e certa incomodidade.
A funcionalidade chega, iso si, con limitacións claras. Os usuarios dispoñen dun prazo máximo de 15 minutos desde a publicación do comentario para realizar cambios. Transcorrido ese tempo, o texto queda fixado na súa última versión. Ademais, cada modificación queda sinalada cun indicador visible de editado, co obxectivo de manter certa transparencia sobre posibles cambios posteriores.
Deste xeito evitan un dos principais riscos asociados á edición libre de comentarios: a alteración do contexto en conversas xa iniciadas. Ao non ofrecer historial de edicións, os usuarios non poderán consultar versións anteriores, aínda que estas poderían persistir se alguén fixo capturas de pantalla.
Outra das restricións afecta ao tipo de contido. Só é posible editar comentarios de texto, mentres que aqueles que inclúan imaxes deberán ser eliminados por completo para modificar o seu contido.
En canto ao funcionamento, o proceso resulta sinxelo. Tras publicar un comentario, aparece un novo botón de edición xunto ás opcións habituais. Ao seleccionalo, o texto volve ao campo de escritura para poder realizar os cambios necesarios e reenviar a mensaxe dentro do límite temporal establecido.

BFFood selecciona 16 proxectos innovadores para a súa fase de incubación

S. P. — 2026-04-10T14:00:00Z

A Business Factory Food (BFFood), a aceleradora vertical do sector alimentario galego impulsada pola Xunta de Galicia a través do Instituto Galego de Promoción Económica (IGAPE) e XesGalicia, e coordinada polo Clúster Alimentario de Galicia (CLUSAGA), validou esta semana a selección dos proxectos que integrarán a fase de incubación da súa oitava edición.
Tras un intenso proceso de avaliación e entrevistas, o consello executivo (reunido con representantes do IGAPE, XesGalicia e CLUSAGA) aprobou a incorporación de 16 proxectos. Esta convocatoria destacou pola súa elevada calidade e competitividade, recibindo 70 solicitudes
válidas de orixe diversa, e tamén destacou polo alto compoñente tecnolóxico da escolma de firmas resultante.
Segundo salientaron as ditas entidades, a VIII edición da BFFood confirma a súa capacidade de atracción de talento internacional, e así, dos proxectos seleccionados, máis da metade proveñen de fóra de España (Arxentina, Colombia, Chile, Uruguai e Turquía), o que converte a esta edición na máis internacional da historia do programa.
Os proxectos responderon aos retos demandados polo sector galego, en particular nesta convocatoria foron a maioría relacionados coa sustentabilidade (Reto 4) e o desenvolvemento de novos produtos (Reto 5), reflectindo as tendencias actuais da industria cara a unha produción máis eficiente e circular. Entre as solucións aprobadas destacan propostas de Deep Tech, nanobiotecnoloxía, intelixencia artificial aplicada ao comercio de materias primas e novos ingredientes funcionais.
A partir desta semana os proxectos seleccionados comezarán un itinerario de acompañamento no que o mentoring será o eixo central. Contarán co apoio de empresas tractoras de referencia en Galicia, como CLUN, CONGALSA, Nueva Pescanova, Vegalsa-Eroski, Viña Costeira, Hijos de Rivera, Cafés Candelas, Casa Grande de Xanceda, CEAMSA, Quival, Kiwi Atlántico, Pereira Productos Del Mar, Bodegas Martín Códax e Valora Marine Ingredients.
Ademais do mentoring personalizado, os proxectos accederán a formación específica impartida polo sistema universitario galego (USC, UDC e UVigo) e apoio e adestramento estratéxico a través de FEUGA e ANFACO CYTMA, enfocado a validar os seus modelos de negocio e optimizar o seu lanzamento ao mercado. O programa busca que, tras esta etapa de incubación, os proxectos estean preparados para dar o salto á fase de aceleración e consolidar a súa actividade no territorio galego.
Nas sete edicións anteriores a BFFood impulsou 92 proxectos promovidos ou convertidos nun total de 68 empresas, creando mais de 250 empregos cualificados e unha inversión inicial de mais de 6 millóns de euros.
Proxectos seleccionados para a fase de incubación
-Kresko RNATECH: Desenvolvemento de ingredientes funcionais baseados en ARN bioactivo e estabilizados mediante intelixencia artificial para a industria alimentaria e de suplementos. O seu modelo B2B baséase na venda directa de ingredientes e servizos de descubrimento de novas moléculas baixo un enfoque asset-light.
-Levya: Produción de graxas e aceites funcionais mediante fermentación microbiana como alternativa sostíbel ao aceite de palma e á manteiga de cacao. Operan baixo un modelo B2B asset-light, externalizando a produción a plantas especializadas para evitar grandes investimentos en infraestrutura propia.
-Fluenzia: Plataforma modular de automatización de final de liña deseñada para democratizar a robótica nas pemes alimentarias mediante kits estandarizados e con marxe de configuración. O seu modelo híbrido combina a consultoría en eficiencia industrial coa venda de hardware e licenzas de software para a xestión de datos.
-BIOSentinel: Sistema de monitoraxe en tempo real da carga bacteriana en granxas mediante biosensores ópticos e intelixencia artificial para previr patóxenos. Operan baixo un modelo de subscrición DaaS (Data as a Service), onde o cliente paga polo acceso á plataforma de datos e alertas temperás. Axuda a reducir o uso de antibióticos e a mortalidade animal, garantindo seguridade alimentaria dende a orixe.
-Yamana: Desenvolvemento de bioinsumos de dobre acción (fertilizante e bioestimulante) baseados en microorganismos extremófilos da Antártida para mellorar a produtividade dos cultivos. O modelo de negocio B2B inclúe a venda directa a través de distribuidores locais, o licenciamento tecnolóxico a grandes corporacións e o co-desenvolvemento de solucións personalizadas. Son compatíbeis con agroquímicos convencionais, facilitando a súa adopción.
-Thales: Tecnoloxía de atomización patentada para a hixienización sostíbel da industria láctea que reduce o consumo de auga nun 90% mediante vapor seco. O seu modelo baséase no aforro compartido e na venda ou arrendamento (leasing) de dispositivos especializados para granxas efábricas. Permite un retorno operativo inmediato grazas á drástica redución de produtos químicos e recursos hídricos.
-Galaxy Pack SAS: Sistemas de embalaxe reutilizábeis para palés que substitúen o plástico film de un só uso, reducindo residuos e emisións de CO2 na loxística global. O modelo de negocio B2B céntrase na venda directa e nun esquema circular de renting a longo prazo para evitar grandes investimentos iniciais. A maiores xeran ingresos mediante servizos de mantemento e hixienización das fundas.
-Neurociencia Luyef: Validación sensorial obxectiva de alimentos mediante neurociencia aplicada, utilizando electroencefalogramas (EEG) e biometría para medir a resposta emocional do consumidor. Operan como un servizo B2B de consultoría especializada (Insights as a Service) con diferentes paquetes de estudos escalábeis. Axudan á industria a reducir o risco no lanzamento de produtos innovadores, como as proteínas alternativas.
-Agrosintex: Aditivo alimenticio funcional para gando bovino que reduce as emisións de metano nun 95% e mellora a eficiencia alimentaria nun 12%. O modelo B2B enfócase na comercialización recorrente a través de empresas de nutrición animal, fabricantes de pensos e grandes explotacións. A solución autofinánciase coa ganancia de peso do animal, incentivando a súa adopción masiva.
-Infood Protein: Biorrefinería circular que transforma residuos agroindustriais en bioestimulantes líquidos de alta eficacia utilizando insectos como biorreactores naturais. O modelo de negocio B2B céntrase na venda recorrente a través de distribuidores agronómicos para agricultura de precisión e drons. Tamén valorizan a fracción sólida resultante como substrato premium para sementeiros baixo un modelo de residuo cero.
-Chocolates B. Peruxiñas: Desenvolvemento dunha liña de chocolate de alta calidade Bean to Bar sen aditivos químicos e con rastrexabilidade total dende a faba de cacao. O modelo comercial apóiase nunha estratexia de venda cruzada aproveitando a carteira de clientes actual da marca de galletas Perusiñas. Diríxense a canles estratéxicas como cafeterías de especialidade, hostalería de alta gama e o sector corporativo.
-Ostras: Plataforma de crowdsourcing para o rescate de alimentos próximos a caducar en supermercados mediante unha aplicación móbil impulsada por IA. Ofrecen un modelo SaaS modular para retallistas e fabricantes que permite recuperar ingresos por mermas e obter analítica detallada do consumidor. A solución non require integración tecnolóxica custosa, facilitando a súa implementación inmediata.
-BioRefinería (BioRefQui): Sistema de extracción físico-química innovadora deseñado para recuperar compostos de alto valor a partir de descartes da agroindustria. O seu modelo híbrido combina servizos de I+D e extracción a medida para terceiros coa venda directa de ingredientes naturais recuperados. Promoven a economía circular transformando residuos industriais en activos para os sectores alimentario e cosmético.
-TutorIA (Galifritas): Centro Especial de Emprego tecnolóxico para a elaboración de patacas fritas artesás, integrando a persoas con discapacidade mediante un titor cognitivo con IA. O modelohíbrido optimiza custos operativos a través de subvencións ao emprego inclusivo e xera ingresos pola venda de snacks premium. O proxecto destaca polo seu elevado retorno social (SROI) e o uso da industria 5.0.
-Nanobiofood: Plataforma de nanobiotecnoloxía que transforma extractos vexetais en sistemas nanoestruturados para protexer compostos bioactivos e estender a vida útil dos alimentos. O seu modelo B2B baséase en contratos de I+D, acordos de transferencia tecnolóxica, licenciamento e comercialización directa de ingredientes funcionais. Axudan a reducir o desperdicio alimentario e a dependencia de conservantes artificiais.
-BioClé: Plataforma biotecnolóxica para a valorización de subprodutos lácteos, como o soro de leite, transformándoos en biocompostos como bioplásticos ou ácido láctico. Operan cun modelo B2B flexíbel que inclúe servizos de I+D, co-desenvolvemento de proxectos piloto e o licenciamento da tecnoloxía a grandes industrias. Converten un residuo custoso nunha nova fonte de ingresos sostíbel para as queixerías.

Galicia aumenta a súa formación en IA responsable e saúde

S. P. — 2026-04-10T10:40:55Z

Aplicar de xeito responsábel a intelixencia artificial aos servizos de saúde é un grande reto no que Galicia segue avanzando. Desta volta falamos dun dun programa estratéxico centrado nos fundamentos, a regulación e as aplicacións reais da IA para a toma de decisións que permitiu formar xa a máis dunha trintena de responsábeis de dirección do eido tecnolóxico e sanitario, tanto do sector público coma no privado, da man do Clúster de Saúde de Galicia (CSG) e a Cátedra USC Plexus de Intelixencia Artificial en Medicamento Personalizado de Precisión (CAMELIA). Para iso, ambas as entidades organizaron tres xornadas formativas presenciais no CiTIUS da USC.
A sesión celebrada onte xoves, 9 de abril, pecha o ciclo Intelixencia Artificial en Saúde: fundamentos, regulación e aplicacións reais para a toma de decisións, que tamén tivo lugar os pasados 12 e 18 de marzo, promovendo en todas as súas citas unha contorna de aprendizaxe avanzada encamiñada á análise estratéxica e ao intercambio de experiencias entre perfís directivos do ámbito sanitario. “A intelixencia artificial está a influír de maneira directa na xestión sanitaria, a investigación biomédica, a práctica clínica e a planificación estratéxica dos sistemas de saúde. Iniciativas como este programa formativo achegan o coñecemento estratéxico necesario e facilitan unha adopción responsábel, baseada na evidencia científica e nunha comprensión sólida das bases tecnolóxicas da IA. Ese é precisamente o obxectivo desta iniciativa, e estamos moi satisfeitos coa súa acollida e o seu impacto real”, explicou o director do CiTIUS e da Cátedra CAMELIA, Senén Barro. Pola súa banda, o Clúster Saúde de Galicia (CSG) subliñou que Galicia conta cunha sólida traxectoria na incorporación de tecnoloxía ao sistema sanitario.
Indo ás sesións, nelas analizáronse os fundamentos técnicos da aprendizaxe automática necesarios para interpretar solucións baseadas en datos, as aplicacións reais da IA na práctica asistencial e a xestión sanitaria, o papel estratéxico dos espazos europeos de datos sanitarios, o marco normativo aplicábel e os principais retos éticos e de gobernabilidade vinculados á adopción destas tecnoloxías en medicamento. Ecosistema experto para unha IA responsábel en saúde.
A formación contou coa participación do director da Axencia Española de Supervisión da Intelixencia Artificial (AESIA), Alberto Gago Fernández, quen compartiu a súa visión sobre a estratexia de desenvolvemento e supervisión da IA en España, facendo fincapé no seu papel na transformación dixital do sistema sanitario.
O programa contou tamén cun equipo docente de recoñecido prestixio procedente do ámbito académico, institucional e tecnolóxico. Relatores como: Senén Barro Ameneiro, José Manuel Chao Ardao, Iván Rarís, Alberto José Bugarín Diz, Marta Núñez García, Luís Míguez, Benigno Rosón Calvo, Ángel Carracedo e Lois Orosa, achegaron unha perspectiva multidisciplinaria sobre a aplicación da intelixencia artificial en eidos como a investigación biomédica, a xestión sanitaria e o medicamento personalizado.
Para rematar, indicar que esta iniciativa formativa enmárcase nas Cátedras ENIA (TSI-100932-2023-3, orde ETD/180/2022, de 25 de novembro), destinadas á investigación e desenvolvemento da intelixencia artificial, así como á súa difusión e formación no marco do Plan de Recuperación, Transformación e Resiliencia (PRTR). O programa está financiado pola Secretaría de Estado de Dixitalización e Intelixencia Artificial e pola Unión Europea- Next Generation EU.

Amazon deixa de dar soporte aos seus primeiros lectores de libros electrónicos

Marcus Fernández — 2026-04-10T09:30:00Z

Amazon anunciou nos últimos días que a partir do 20 de maio porá fin ao soporte para lectores Kindle antigos (lanzados ata 2012), o que provocou unha reacción de forte malestar entre os usuarios, que ven nesta decisión un novo exemplo de obsolescencia programada.
A compañía notificou por correo electrónico que estes dispositivos deixarán de recibir determinadas funcións e servizos, o que xerou inicialmente confusión e alarma entre os propietarios. Moitos interpretaron nun primeiro momento que os seus lectores deixarían de funcionar por completo, aínda que en realidade seguirán permitindo a lectura de libros xa descargados.
A polémica, con todo, vai máis alá do impacto práctico inmediato. Numerosos usuarios lembran que os seus dispositivos, adquiridos en 2010 ou 2011, continúan cumprindo perfectamente coa súa función principal: ler. Por iso, consideran que a retirada do soporte responde máis a unha estratexia comercial que a unha necesidade técnica.
A percepción de que Amazon busca impulsar a compra de novos modelos —mesmo ofrecendo descontos mediante programas de recompra— foi outro dos puntos máis cuestionados. Para parte da comunidade, esta estratexia resulta especialmente desacertada nun momento no que moitos consumidores non consideran xustificado substituír un dispositivo que segue funcionando correctamente.

O CiTIUS será unha das pezas claves do novo Laboratorio de Ideas en IA da AESIA

S. P. — 2026-04-10T09:22:38Z


O ministro Óscar López e o director científico do CiTIUS, Senén Barro

Senén Barro, director científico do CiTIUS da Universidade de Santiago (USC) vai presidir o Comité Asesor do Laboratorio de Ideas de IA da axencia AESIA (Axencia Española de Supervisión da Intelixencia Artificial) con sede na Coruña, presentado este 9 de abril no Pazo de Mariñán da Deputación da Coruña e dirixido a impulsar unha intelixencia artificial ética e de confianza.
O novo órgano reúne unha trintena de especialistas de referencia do ámbito académico, institucional e empresarial co obxectivo de analizar os principais retos asociados ao despregamento da IA e achegar recomendacións en ámbitos de alto impacto social.
En palabras de Senén Barro, o Laboratorio de Ideas “actúa como a intelixencia da propia intelixencia artificial”, mentres que o seu Comité Asesor achega “a ollada humana e humanista necesaria para garantir un desenvolvemento confiábel e orientado ao ben común”.
Entre as súas liñas de traballo destacan a protección da dignidade das mulleres fronte aos nesgos algorítmicos, a loita contra a desinformación, a seguridade dixital da infancia ou a transformación do mercado laboral, incluíndo fenómenos como os deepfakes ou a automatización da propaganda.
Durante o acto, no que se deron a coñecer os detalles de este novo espazo de reflexión, o ministro para a Transformación Dixital e da Función Pública, Óscar López, subliñou a vocación de España de situarse na vangarda internacional en regulación da intelixencia artificial, apostando por un modelo que combine innovación e garantías democráticas.
A implicación do CiTIUS nesta iniciativa consolida o seu papel como axente de referencia no impulso dunha IA ética, segura, consciente e centrada nas persoas, en liña cos principais marcos europeos de supervisión tecnolóxica. Neste contexto, o ministro anunciou que España acollerá a finais de abril a primeira xuntanza do Panel Científico de IA de Nacións Unidas, reforzando o seu posicionamento internacional como un dos países chave na gobernanza da intelixencia artificial. O CiTIUS (un centro cofinanciado pola Unión Europea a través do Programa Galicia Feder 2021-2027) sitúase así nun dos contornos onde se está definindo o futuro da IA a escala global.

O premios Dalle Like entregaranse o vindeiro 16 de maio no Círculo das Artes de Lugo

S. P. — 2026-04-10T09:04:44Z

Este xoves presentáronse en Lugo os nomes dos nomeados aos premios Dalle Like Galinfuencers 2026, iniciativa que pretende recoñecer, amosar e celebrar o talento dos creadores de contido de Galicia que, a través das redes sociais, contribúen a promover a cultura, a lingua, o territorio e os valores galegos.
A gala terá lugar o vindeiro 16 de maio no Círculo das Artes de Lugo, será aberta ao público xeral e estará ambientada nunha romaría tradicional, con actuacións de Lucía Pérez e outros artistas internacionais, e postos gastronómicos.
O certame ten o apoio de institucións como a Deputación de Lugo, que achega 3.000 euros para o seu desenvolvemento e o seu impulso. Na presentación dos finalistas participou de feito o deputado de Promoción Económica e Social, Pablo Rivera Capón.
O certame tamén conta co apoio da Secretaría Xeral da Lingua que dirixe Valentín García, e máis da Consellería de Medio Rural.
Como dixemos, os Premios Dalle Like, que veñen con 10 categorías, buscan recoñecer o talento galego no ámbito dixital e das redes sociais.
A gala de entrega destes galardóns celebrarase o 16 de maio no Círculo das Artes e reunirá a creadores de contido, proxectos dixitais e marcas galegas que destacan pola súa creatividade, impacto e capacidade de conectar coas novas audiencias.

A Xunta reivindica na Tecnópole o lugar destacado da industria aeroespacial galega

S. P. — 2026-04-10T08:00:00Z

O Parque Tecnolóxico de Galicia (Tecnópole) acolleu este xoves 9 de abril a VII Xornada Cadea de Subministro Aeronáutica Española, promovida pola Asociación Española de Empresas Tecnolóxicas de Defensa, Seguridade, Aeronáutica e Espazo (TEDAE) e por ASIME. No encontro participou a directora xeral de Estratexia Industrial e Solo Empresarial, Margarita Ardao, quen sinalou que Galicia conta cun ecosistema industrial aeronáutico e aeroespacial “sólido e recoñecido”, que inclúe desde grandes fabricantes con presenza internacional ata empresas especializadas en mecanizado, estruturas, sistemas de control e mantemento.
Amais, engadiu que firmas como Delta Vigo, COASA, UARX Space ou Kreios Space “son mostra de que a comunidade ocupa xa un lugar destacado na cadea de valor mundial do sector, xerando emprego de alta cualificación e exportando capacidade tecnolóxica en mercados de máxima esixencia”.
Engadiu que o apoio da Xunta de Galicia ao sector aeronáutico e aeroespacial “ten máis dunha década de percorrido”, e agora consolídase coa Iniciativa Estratéxica en Seguridade, Defensa e Aeroespazo (IESDA), que ten ampliación ata 2030.
A directora xeral destacou que o novo contexto xeopolítico e tecnolóxico representa “unha oportunidade real para as empresas galegas e lembrou que investir en seguridade, defensa e aeroespazo é tamén investir en prosperidade, en capacidade tecnolóxica e en tecido industrial”.
O encontro reuniu na localidade ourensá de San Cibrao das Viñas a representantes das principais empresas do sector, entre elas Airbus, ITP Aero, Aernnova, Aciturri e Delta Vigo, xunto a pemes galegas de referencia na cadea de subministro.
Ardao lembrou ademais dous instrumentos impulsados pola Xunta no marco da Iniciativa Estratéxica e dirixidos ás pemes: as axudas para a certificación como provedoras do sector da seguridade e a defensa (abertas ata o 13 de maio, cun orzamento de 1,5 millóns de euros e ata 75.000 euros por empresa); e o Programa Executivo en Industria de Defensa en Galicia, desenvolvido coa colaboración da Escola de Organización Industrial, que, segundo dixo, “rexistrou un elevado número de solicitudes que levou á próxima convocatoria dunha segunda edición”.
A directora xeral avanzou que en datas vindeiras lanzaranse novas convocatorias para reforzar o posicionamento das pemes galegas no sector.

O videoxogo galego Shadows of the Afterland chegará a Switch o mes que vén

Marcus Fernández — 2026-04-09T20:35:58Z

: Rubén López e Silvia Izquierdo de Aruma Studios

O pasado 10 de febreiro o estudio de videoxogos coruñés Aruma Studios estreou en Steam a súa última creación, Shadows of the Afterland, unha aventura point‑and‑click que combina misterio policial, humor sobrenatural e unha estética pixel art que recrea o Madrid dos anos 60. Os responsables do estudio, Rubén López e Silvia Izquierdo, xa nos comentaron no seu momento que cando veu a luz o xogo en PC a versión para Nintendo Switch estaba en marcha e xa era plenamente xogable, confirmando o pasado 23 de marzo que xa remitiran esa versión do xogo a Nintendo para a súa revisión, e finalmente a compañía nipoa deu luz verde a este xogo galego, que verá a luz en Nintendo Switch o vindeiro 5 de maio.
Shadows of the Afterland xa figura na tenda dixital de Nintendo, podendo engadirse á listaxe de desexos dos usuarios, que terán que agardar preto dun mes para poder facerse con este coidado título por 14,95 euros. O xogo, aínda que está desenvolvido para Nintendo Switch, sobra dicir que tamén é compatible con Nintendo Switch 2.
A premisa do xogo xira arredor dunha alma que, tras un tránsito frustrado, chega ao máis alá cargando as lembranzas de Carolina, unha das primeiras policías da capital… que aínda non naceu. Esta fractura temporal e identitaria serve de motor narrativo para unha historia que mestura destino, coraxe e a procura de quen somos realmente. O xogador deberá alternar entre mundos, empregar maxia e posuír a personaxes vivos para resolver quebracabezas integrados na trama.

PuntoGal e AGPI colaborarán a prol do uso do dominio galego entre os ilustradores galegos

S. P. — 2026-04-09T19:52:55Z

Os presidentes de PuntoGal, Manuel González González e da Asociación Galega de Profesionais Ilustración, AGPI, Laura Romero, asinaron un convenio de colaboración mediante o cal a AGPI se compromete promover a utilización do dominio a través dos seus órganos de expresión e dar cobertura ás actividades realizadas por PuntoGal. Grazas a este acordo, os socios de AGPI poderán obter un dominio .gal a prezos reducidos. A sinatura realizouse de xeito telemático.
PuntoGal, que supera os 7650 dominios, busca “acompañar ás iniciativas que, coma esta, facilitan e promoven a creación de contidos en galego, e que aportan á rede unha visión da diversidade e riqueza da creación na nosa lingua", en palabras do director xeral da PuntoGal, Darío Janeiro, que engadiu que “as alianzas son sempre un xeito de incrementar o valor e a relevancia das iniciativas de comunicación, nun momento en que parece que a predominancia é das plataformas e non dos creadores ou dos comunicadores”.
Pola súa banda, Augusto Metztli, vicepresidente da AGPI, quixo agradecer a colaboración de PuntoGal nunha iniciativa que “paréceme unha forma de ampliar o afecto ao territorio e ao local, levado á Rede e, desde un sector en amplo desenvolvemento e en expansión, que ano tras ano gaña recoñecemento como ferramenta fundamental de comunicación dentro da sociedade, querémolo agradecer”.
O convenio entrambas entidades inclúe a posibilidade de que as asociadas e asociados do obradoiro poidan mercar un dominio .gal ao prezo reducido de 13 euros máis IVE a través dos rexistradores que colaboran na promoción.
A Asociación Galega de Profesionais da Ilustración agrupa desde o ano 2000 ilustradores e ilustradoras comprometidos na defensa común dos seus dereitos e intereses profesionais. Actualmente AGPI aglutina máis de 113 ilustradores e ilustradoras de distintas xeracións e de todas as áreas da creación visual aplicada.

Razer renova os seus auriculares sen fíos

Redacción — 2026-04-09T18:30:00Z

Razer anunciou a nova xeración dos seus auriculares sen fíos para xogadores coa presentación dos Hammerhead V3 HyperSpeed, deseñados para ofrecer unha experiencia de audio consistente en diferentes plataformas, desde PC ata móbiles e consolas portátiles.
O principal argumento destes auriculares é a súa dobre conectividade, que permite alternar entre a tecnoloxía HyperSpeed Wireless de 2,4 GHz e Bluetooth 6.0. Este enfoque busca garantir unha latencia moi baixa en sesións de xogo, ao tempo que facilita o seu uso en tarefas cotiás con maior eficiencia enerxética e estabilidade en contornas con moitas conexións sen fíos.
Un dos elementos centrais dos auriculares é o estoxo HyperSpeed, que non só actúa como sistema de carga, senón tamén como receptor sen fíos cando integra o dongle correspondente. Esta solución permite conectar os auriculares directamente mediante USB-C a distintos dispositivos, combinando reprodución e carga de maneira simultánea.
Os Hammerhead V3 HyperSpeed incorporan cancelación activa de ruído híbrida, cunha redución de ata un 50 % respecto á xeración anterior segundo a compañía. A isto súmase a compatibilidade con audio espacial THX en PC a través de Synapse 4, o que permite unha representación virtual de son 7.1 orientada a mellorar a percepción posicional en xogos.
A autonomía tamén é un dos puntos destacados, cunha duración total de ata 40 horas, distribuídas en 10 horas de uso directo dos auriculares e outras 30 horas adicionais grazas ao estoxo de carga. O dispositivo complétase con controis táctiles configurables e integración coas aplicacións de Razer para personalizar a experiencia.
Xunto a este modelo, Razer tamén presentou os Hammerhead V3 X HyperSpeed, unha versión máis accesible que mantén a conectividade dual (neste caso con Bluetooth 5.3) e o enfoque multiplataforma, aínda que cunha proposta máis simplificada.

Vídeo promocional dos auriculares Razer Hammerhead V3 HyperSpeed

Pedro Sánchez salienta o compromiso do Goberno coa industria do videoxogo

Redacción — 2026-04-09T16:30:00Z

O presidente do Goberno, Pedro Sánchez, escenificou o seu apoio á industria do videoxogo cunha visita ao OXO Museo de Madrid, onde mantivo un encontro con representantes destacados do sector. Entre eles atopábase Mauricio García, presidente de DEV (Asociación Española de Empresas Productoras y Desarrolladoras de Videojuegos y Software de Entretenimiento), nunha cita que busca reforzar o diálogo institucional cunha industria en crecemento.
Durante a visita, Sánchez puxo en valor o peso do ecosistema español do videoxogo, que xa supera os 815 estudios e conta con arredor de 11.000 profesionais. Nunha mensaxe publicada nas redes sociais, subliñou que «España é xa unha potencia mundial neste sector» e comprometeu ao Executivo a «seguir impulsando esta industria estratéxica» co obxectivo de consolidar a súa posición de liderado internacional.
O percorrido polas instalacións do museo, situado nas proximidades da Gran Vía madrileña, permitiulle coñecer de primeira man diferentes propostas expositivas e experimentar coa realidade virtual ou subir a unha versión de LEGO dun vehículo de Mario Kart.
Desde o propio museo agradeceron publicamente a visita e destacaron a importancia do respaldo institucional para avanzar no recoñecemento do videoxogo como unha disciplina cultural de pleno dereito. «É un orgullo poder compartir o noso traballo e seguir impulsando a divulgación e o recoñecemento do videoxogo como unha forma de cultura clave na nosa sociedade», sinalaron nunha mensaxe pública.

A AESIA crea o seu Laboratorio de Ideas

S. P. — 2026-04-09T14:39:37Z

O ministro para a Transformación Dixital e da Función Pública, Óscar López, interveu esta mañá na Coruña no acto de presentación do Laboratorio de Ideas da Axencia Española de Supervisión de Intelixencia artificial (AESIA), un órgano que permitirá a España avanzar na carreira “por ser vangarda na regulación da IA e en non permitir que xere un retroceso civilizatorio”. Así o expresou o ministro, que agradeceu o seu labor aos membros da dirección do Laboratorio e do Comité Asesor que o co-liderará e que estará composto por unha trintena de persoas referentes no sector académico, público, empresarial e sindical.
“Agradézovos moito que dediquedes o voso tempo para axudarnos, a darnos ideas e a acertar. Catro ollos ven máis que dous e cando son ollos de expertos, ven moito máis”, dixo ante os seus integrantes, que proceden de universidades da Coruña, Santiago, Granada, Valencia, Cataluña ou Madrid, de entidades como a CEOE, Dixitais ou Adigital, e de organizacións como UXT ou CCOO.
“Moita xente está a mirar cara a nós e está a observar o que facemos para seguir o mesmo camiño. Axudádenos a seguir sendo vangarda”, agregou.
Na súa alocución, o ministro asegurou que España é o primeiro país da Unión Europea en regulación de IA e que o Goberno e o seu Ministerio están “situándose na vangarda”. E engadiu: “Somos realistas. Igual que vemos os riscos para a democracia ou para as mulleres, vemos os avances espectaculares da IA”, expresou, lembrando as súas revolucionarias aplicacións en eidos como a sanidade ou a administración pública, que “está a piques de sufrir unha transformación histórica”.
O Laboratorio de Ideas de AESIA seleccionou catro temas de discusión para reflexionar durante o seu primeiro ano en función do seu impacto social. O primeiro deses asuntos é o impacto na imaxe e a dignidade das mulleres. En colaboración co Instituto das Mulleres, que participa como observador permanente, buscaranse iniciativas para evitar que a IA amplifique os rumbos de xénero, así como protexer a dignidade das mulleres ante a manipulación de imaxes e a violencia dixital.
Neste sentido, tamén se abordará a desinformación vinculada á IA, protexendo o espazo informativo fronte a deepfakes e a automatización da propaganda, co obxectivo de evitar a erosión da confianza pública. Ademais, buscarase xerar contornas dixitais seguras para a nenez fronte á manipulación algorítmica ou a exposición a contidos daniños.
O cuarto punto de reflexión terá relación co mercado laboral e enfocarase en xestionar a transición do emprego con certeza, de tal modo que se equilibre a produtividade, a protección social e as novas oportunidades laborais.
Durante a súa intervención, o ministro tamén asegurou que “nesa vocación por ser pioneiros”, España acollerá a primeira reunión do Panel Científico de IA das Nacións Unidas, que se reunirá en Madrid entre o 22 e o 24 de abril. Este organismo, cuxa creación aprobouse en agosto do ano 2025 e na que España foi co-facilitador onda Costa Rica, está composto por 40 expertos independentes nomeados pola Asemblea Xeral tras un proceso aberto, entre os que se atopa o español Román Orús. Este Panel ten a misión de ser nexo entre o coñecemento científico máis avanzado e a formulación de políticas públicas. As avaliacións independentes baseadas na evidencia que elaboren permitirán á comunidade internacional anticipar desafíos emerxentes e desenvolver estratexias informadas para unha gobernanza efectiva da IA. O Panel emitirá un informe anual, cuxos achados serán presentados tanto ante os Estados membro na Asemblea Xeral da ONU, como no Diálogo Global. Esta iniciativa representa un avance decisivo para fomentar un uso seguro, ético e inclusivo da intelixencia artificial a escala global.

Equipos da Pobra, Narón e Vigo representarán a Galicia este sábado na FIRST LEGO League España

S. P. — 2026-04-09T12:05:00Z

Este 11 de abril vai brillar en Burgos o talento tecnolóxico da rapazada galega, concretamente na final da competición robótica FIRST LEGO League España.
Alí estarán, logo dos seus éxitos na duodécima edición da First LEGO League Galicia, celebrada o pasado mes de marzo no Campus de Ferrol as e os integrantes do equipo Robot City Pobra (pertencente á academia Academia Mega de Ribeira, que acadou no Campus de Ferrol o primeiro premio Ingenier@ Soy, o máximo recoñecemento do torneo). O grupo de novas e novos desenvolvedores (Elena, Sira, Bianca, Ari, Nico, Marcos e Pablo) da Pobra do Caramiñal representarán a Galicia na final de Burgos xunto con dous equipos de Narón e Vigo.
Na final estatal terán que poñer a proba as súas habilitades e coñecementos e materia de desenvolvemento de robots, completando até quince desafíos en dous minutos e medio (cada un). A finalidade é acadar a máxima cantidade de puntos.
O grupo de desenvolvedores Robot City Pobra non acode só ao evento deste sábado, faino acompañado do equipo H4CKZ4POS, de Gazapo Xestión (Narón, A Coruña), que logrou o Segundo Premio Universidade da Coruña ao Gañador; e máis do equipo Montecastelo BOT, do Colexio Fomento Las Acacias (Vigo, Pontevedra), que logrou o Terceiro Premio Campus Industrial de Ferrol ao Gañador.
O evento será organizado pola Universidad de Burgos (UBU) no Fórum Evolución – Palacio de Congresos y Auditorio.
Que é a FIRST LEGO League?
A FIRST LEGO League é un programa internacional que desafía a mozos e mozas de entre 4 e 16 anos, divididos en 3 categorías, a resolver problemas do mundo real como poden ser a reciclaxe, a educación ou as enerxías limpas. Mediante a súa resolución, os mozos e mozas desfrutan coa ciencia e a tecnoloxía. Ao mesmo tempo, aprenden valiosas habilidades para o seu futuro profesional e persoal como son o traballo en equipo, a resolución de problemas e a comunicación.
O desafío FIRST LEGO League en España
Desde o ano 2022, a Asociación ingeniera.soy é a entidade que impulsa a FIRST LEGO League en España en colaboración co 20% das universidades españolas, parques tecnolóxicos e entidades de promoción da innovación como socios. Ademais, a iniciativa é unha realidade grazas á colaboración de empresas e entidades que achegan aos participantes aos coñecementos e profesións STEAM.
Como funciona a FIRST LEGO League?
Cada equipo achégase á temática anual deseñando e construíndo un robot que sexa quen de resolver os retos propostos. Ademais, a rapazada participante terá que investigar sobre esa temática e realizar un Proxecto de Innovación que propoña unha solución a un problema real. Os equipos documentarán o seu traballo e compartirán os seus achados. Ao longo da experiencia, cada un dos mozos e mozas deberá defender os Core Values fundamentais da FLL: o descubrimento, o traballo en equipo, a inclusión, o impacto, a diversión, a innovación e o gracious professionalism.
O desafío deste ano leva o nome de Unearthed e está inspirado no mundo da arqueoloxía. Nesta tempada, os e as participantes terán a oportunidade de explorar como os descubrimentos do pasado nos poden axudar a deseñar un futuro mellor. Deste xeito, os equipos terán que investigar sobre temas históricos desenterrando misterios do pasado mentres deseñan as tecnoloxías do futuro.

O Colexio de Xornalistas celebra a Begoña Caamaño cun podcast e unha xornada

S. P. — 2026-04-09T11:45:00Z

No Ano das Letras de Begoña Caamaño, o Colexio Profesional de Xornalistas de Galicia reivindica a súa figura como xornalista cun podcast dirixido por Lucía Junquera, do que este 9 de abril estréase o primeiro episodio, e un encontro periodístico que se desenvolverá o vindeiro sábado 25 de abril na Casa das Máquinas de Santiago. Estes actos, agrupados baixo a denominación Poñer a voz, están realizados coa subvención da Secretaría Xeral da Lingua da Xunta de Galicia.
O Colexio lembra que ademais de adicarse á literatura, Begoña Caamaño (á quen a Real Academia Galega lle dedica o Día das Letras Galegas deste 2026) foi xornalista e integrante do Colexio, e que na súa escolla destacouse, ademais do seu labor como narradora, o seu traballo como xornalista "nun momento en que urxe reconstruír o espazo dun xornalismo para a cidadanía, comprometido coa verdade e co uso do galego".
O Colexio Profesional de Xornalistas de Galicia xa aplaudiu no seu día a decisión de dedicarlle a Caamaño esta homenaxe, que tamén recoñece a importancia do xornalismo en galego para o futuro do idioma, e súmase agora á celebración organizando, coa subvención da Secretaría Xeral da Lingua da Xunta de Galicia, un podcast e un encontro xornalístico sobre o traxectoria profesional da homenaxeada.
O podcast Poñer a voz é un relato sonoro en cinco capítulos que atravesa a vida de Begoña Caamaño. Desde a súa infancia e xuventude en Vigo, onde prende a paixón por contar historias, ata a súa implicación vital no feminismo, no coidado da lingua, no antimilitarismo e na defensa dos medios públicos. Como nexo: o xornalismo. A radio como medio fundamental, pero tamén os artigos que escribiu na prensa e revistas especializadas. Unha lingua e unha linguaxe propia, diferente á literaria, pero que tamén conforma as nosas Letras Galegas.
Poñer a voz pode escoitarse a través de Ivoox, Spotify e Apple Podcast. Ademais da voz conservada pola radio da propia Begoña Caamaño, e da dirección e condución de Lucía Junquera, o podcast vai contar coa participación de Bea Caamaño, Ana Romaní, Xosé María Palmeiro, Concha Cid Fuentes, María Xosé Porteiro, Fani del Río, Víctor Freixanes, Tiago Alvite, Raquel Lema, Carme Hermida, Silvia López, Uxía Iglesias e Belén Teiga.
Ademais, o sábado 25 de abril ás 12:00 horas, vai realizarse na Casa das Máquinas de Santiago de Compostela (rúa de Galeras, s/n) un encontro periodístico ao redor da figura de Caamaño, no que participarán periodistas de varias xeracións. Baixo a forma dun programa de radio ao vivo, a xornada será un convite á profesión para celebrar a Begoña Caamaño e reflexionar sobre o pasado, presente e futuro do xornalismo. Entre outras profesionais, participarán a propia Lucía Junquera, Ana Romaní, Sonia Díaz, Pablo Lago e Marga Tojo.

Galicia mostra ao ministro para a Transformación Dixital as capacidades do CESGA

S. P. — 2026-04-09T11:35:14Z

O conselleiro de Educación, Ciencia, Universidades e FP, Román Rodríguez, recibiu na mañá deste xoves 9 de abril ao ministro para a Transformación Dixital e a Función Pública, Óscar López, no Centro de Supercomputación de Galicia (CESGA), na súa sede do Campus Sur de Santiago.
O percorrido, no que tamén participaron a directora da Axencia Galega de Innovación, Carmen Cotelo, e o vicepresidente de Investigación Científica e Técnica do CSIC, José María Martell, serviu para amosar ao representante estatal as capacidades da Comunidade galega no eido da I+G+i, a ciencia e a innovación feitas en Galicia, neste caso en eidos como a computación de altas prestacións, a intelixencia artificial e as tecnoloxías cuánticas, nos que aspira a converterse nun centro de referencia a nivel internacional.
Entre os proxectos que lle presentaron, cuxa explicación correu a cargo do director científico do CESGA, Lois Orosa, destaca a contribución do centro á predición meteorolóxica galega, á previsión oceánica europea ou á realización de análises xenómicas para o Servizo Galego de Saúde (SERGAS).
No eido das tecnoloxías cuánticas, puxéronse en valor as infraestruturas coas que conta o centro, como o computador cuántico Qmio, con 32 Qbits (o primeiro de España nunha institución pública) e o novo computador, recentemente adquirido de 45Qbits, así como a posta en marcha da liña de comunicacións cuánticas máis extensa de España.
Así mesmo, informouse da ampliación de infraestruturas do centro, e que inclúen un centro de datos, o novo supercomputador Finisterrae IV e o citado computador cuántico, todos estes recursos avanzados co-financiados con fondos europeos do Mecanismo de Recuperación e Resiliencia a través do PERTE Chip.

O IES Rosalía de Castro volve convocar o Premio Stephen Hawkins

S. P. — 2026-04-09T10:45:00Z

Espallar a cultura científica e estimular a vocación investigadora entre o alumnado de Bacharelato é o obxectivo que se marca o Premio Stephen Hawking, que xa vai pola súa oitava edición. Detrás deste certame atopamos ao IES Plurilingüe Rosalía de Castro de Santiago de Compostela, coa colaboración da Xunta a través da Consellería de Educación, Ciencia e Universidades e o apoio de entidades como FINSA, Ternera Gallega e Feiraco.
Cómpre salientar que o concurso rexistrou desta volta a participación de 58 traballos procedentes dun total de 17 centros de ensino. O Premio Stephen Hawking está aberto a centros galegos de ensino e centros estatais implicados no programa de Bacharelato Internacional. Este ano concorre o alumnado de institutos de once concellos galegos: Santiago, A Coruña, Lugo, Ourense, Nigrán, Brión, Baiona, Cedeira, Oleiros, Monforte, e Moaña) e catro de fóra de Galicia (Madrid, Tudela, Barcelona e Soria).
Indo ao certame, sinalar que se divide en catro eidos: Bioloxía, Xeoloxía e Ciencias Ambientais, áreas na que se inclúen 16 dos 58 traballos presentados; Física e Química, materias ás que se circunscriben 15 proxectos; Matemáticas e Ciencias da Computación, ámbitos aos que pertencen 11 propostas, e Ciencias Sociais, Humanidades e Artes, eidos de coñecemento sobre os que versan os 16 restantes.


Mar Capeáns, coordinadora desta VIII edición

Informar que a coordinadora desta edición é a física Mar Capeáns Garrido (Santiago de Compostela, 1967), directora de Operacións do CERN. O lema escollido é: Construíndo futuro, polo que presentaron investigacións arredor das ideas que suxire este lema, así como tamén sobre a figura de Capeáns e as súas achegas á area da Física de partículas.
O venres 17 de abril, celebrarase no IES Plurilingüe Rosalía de Castro a xornada de exposición pública e entrega. A actividade principiará ás 9 horas coa recepción do alumnado asinante dos 58 traballos participantes que, ao longo da mañá, presentarán as súas propostas diante dos tribunais, presididos pola xa citada Mar Capeáns e conformados por persoas procedentes das catro esferas académicas anteriormente sinaladas e con tres perfís diferentes: profesores universitarios, profesores de instituto e ex alumnas/os dos institutos participantes. Xa pola tarde, ás 18 horas, procederase a facer público o fallo do tribunal e a entrega do galardón nun acto aberto que se celebrará no Auditorio do IES Rosalía de Castro.
Indo aos premios: 1000 euros para o traballo que gañe o Premio Stephen Hawking de Investigación Científica e Divulgación, que resultará elixido entre os mellores traballos de cada ámbito temático. Outros 2000 euros a repartir en catro galardóns aos mellores traballos por eido temático. Por último, 1600 euros serán distribuídos entre as Mencións de Honra que o tribunal decida conceder aos traballos máis salientábeis.

A Cámara de Comercio e Javi Rocamora mostran os segredos da publicidade dixital

S. P. — 2026-04-09T10:30:00Z

A Cámara de Comercio de Santiago organiza este mes de abril un novo obradoiro de transformación tecnolóxica ao servizo de pemes e persoas emprendedoras e autónomas, a través do Coworking Dixital Compostela. Trátase do Obradoiro Práctico de Publicidade Dixital para Pemes e Emprendedores. Será o mércores 15 de abril ás 10.00 horas. A persoa encargada de impartir os contidos será Javi Rocamora.
O temario inclúe campañas de publicidade en liña (plataformas recomendadas e tipoloxía de anuncios), definición do target (público obxectivo) da campaña, particularidades dunha publicidade dixital, comparativas (publicidade dixital versus analóxica), canles de publicidade dixital (onde aparecen os anuncios), tipos de anuncios e de campañas, publicidade en liña en Meta Business Suite (publicidade en Facebook e Instagram: como estruturar unha campaña), publicidade en liña en Google Ads (como estruturar unha campaña básica de anuncios de texto e unha avanzada de máximo rendemento), publicidade en TikTok (principios básicos de TikTok Ads), outras plataformas publicitarias interesantes (Spotify, LinkedIn, plataformas de publicidade programática, Google Marketing Platform, Amazon e máis), consellos a ter en conta á hora de configurar unha campaña e como aprender a interpretar os resultados das campañas de publicidade dixital.
Como dixemos o relator será Javier Rocamora García, consultor autónomo especializado e con dilatada experiencia en marketing dixital, xestión de redes sociais e comercio electrónico desde 2008, operando baixo a marca comercial As 3 En Punto.

A RAG estrea na Rede o documental conmemorativo do legado literario de Begoña Caamaño

S. P. — 2026-04-09T10:05:00Z

A Real Academia Galega estrea no serán deste xoves 9 de abril o audiovisual Begoña Caamaño Caamaño: navegar no pracer do azul, cuxo tráiler podemos ver en Youtube a xeito de avance. O documental que produce co gallo das Letras Galegas 2026, realizado por Miramemira con Damián Varela Pastrana e Alba López Álvarez na dirección e o guión, poderá verse a partir das 21:00 horas en academia.gal e na canle de Youtube da RAG.
A película propón un percorrido pola vida e o legado da autora á que a institución lle dedica o vindeiro 17 de maio a través dos testemuños de persoas que a acompañaron nas súas diversas facianas persoais e profesionais. Destaca ademais como parte do relato a interpretación artística da súa obra literaria, que ten na colaboración da Escola Superior de Arte Dramática de Galicia un dos esteos.
Segundo avanza a RAG, o documental conecta as dúas cidades en que Begoña Caamaño (1964-2014) viviu reconstruíndo a traxectoria desde a nenez e a mocidade ata á consolidación como xornalista e escritora. Desde o Vigo natal, onde medrou nos barrios do Calvario e Coia e se converteu en xornalista, ata Santiago de Compostela, onde continuou a súa carreira e vida a partir de 1989, cando se incorporou á redacción central da Radio Galega. Nesta cidade escribiría as súas dúas novelas, Circe ou o pracer do azul (2009) e Morgana en Esmelle (2012), froito dun debut tardío pero maduro e anovador da escena das letras galegas do momento que segue a ter plena vixencia e interese.
A película documental dálle tamén voz á mocidade en relación cos grandes temas da obra literaria de Caamaño, o seu exercicio como xornalista comprometida coa honestidade e a defensa da lingua galega e mais o seu activismo.
A película contou con múltiples colaboracións. No apartado de material de documentación, alén de imaxes e audios da CSAG, a narración apóiase en fotografías de Mulheres Transgredindo, Mulheres Nacionalistas Galegas, Sonia Díaz, Ra&Ka e os arquivos persoais de Ana Romaní, Maika Aguado e a propia Begoña Caamaño.
Begoña Caamaño: navegar no pracer do azul realizouse co apoio económico da Deputación da Coruña, a Xunta de Galicia e o Ministerio de Ciencia, Innovación e Universidades.
“Con este novo filme a Real Academia Galega continúa a aposta polo audiovisual de calidade como forma de achegar as figuras ás que lles dedicamos o Día das Letras Galegas a públicos amplos de distintas idades, e de maneira especial ao máis novo. Nesta liña, en breve estrearemos o noso primeiro videopodcast e temos xa en marcha a serie de reels É o tempo de Begoña Caamaño”, explica o presidente da institución, Henrique Monteagudo.
O máximo responsábel da Academia intervirá este venres 10 no acto de homenaxe a Begoña Caamaño no IES Alexandre Bóveda cadrando cos 50 anos do centro onde estudou a autora. Será precisamente esta celebración a que sirva de marco para a primeira presentación pública do filme, nunha mesa na que acompañará a Damián Varela Pastrana e Alba López Álvarez o académico Víctor F. Freixanes, docente do antigo Coia 2 entre finais dos anos 70 e comezos dos 80. O acto no instituto da homenaxeada será punto de encontro dos participantes no documental, e contará tamén coas intervencións doutras persoas relacionadas coa homenaxeada e o centro educativo. Trala presentación do filme, compartirán un coloquio sobre a escritora a súa irmá Beatriz, Carme Panero, profesora de literatura de Caamaño no daquela Instituto Coia 2, e mais An Alfaya, compañeira dela naqueles anos de estudante de bacharelato e de Maxisterio.
Sen saber aínda deste vínculo persoal, a RAG confiou en An Alfaya para escribir a historia sobre a protagonista do Día das Letras Galegas 2026 para Primavera das Letras, o proxecto da institución dirixido ao público infantil que desenvolve co apoio da Deputación da Coruña. A tamén escritora viguesa concibiu a obra teatral Uuu-uuu, BEGOÑA!, que a RAG anima a representar dentro e fóra das aulas. O texto, ilustrado por Laura Romero, pode descargarse en primaveradasletras.gal.
A RAG está ademais a producir a súa primeira serie de reels das Letras Galegas, baixo o título É o tempo de Begoña Caamaño, e estreará en breve o seu primeiro videopódcast, Colchas de voces, no que a xornalista Alba Mancebo conversa con convidadas relacionadas dalgún xeito co legado da escritora e xornalista. O primeiro episodio protagonízano Fillas de Cassandra e o segundo a narradora Antía Yáñez. Ambas as propostas realízanse co apoio da Xunta de Galicia.

Exploran en Ciencias da Educación da USC o uso da IA na pedagoxía

S. P. — 2026-04-09T09:48:00Z


Foto da xornada achegada por Santi Alvite (USC)

A Facultade de Ciencias da Educación desenvolveu este mércores 8 de abril unha xornada baixo o título A Pedagox(IA) do futuro coa finalidade de promover a reflexión sobre o uso da intelixencia artificial na educación e a súa influencia no futuro da Pedagoxía.
A iniciativa contou coa participación de persoas expertas como Enrique Costa Montenegro, experto en intelixencia artificial e procesamento do linguaxe natural; Tina Campo Fernández, especialista na formación de intelixencia artificial; o investigador Jaime González González, que impartiu un obradoiro sobre o prompting nas aulas; o experto en robótica Francisco Javier Bellas Bouza; e María del Mar Lorenzo Moledo, decana da Facultade de Ciencias da Educación.
Ao longo da sesión, presentaron experiencias e análises sobre o emprego da intelixencia artificial nas aulas, así como propostas para a súa incorporación crítica e responsable no contexto educativo.
Así mesmo, o programa actividades incluíu mesas redondas, unha centrada no profesorado e outra no estudantado, nas que se falou das oportunidades e desafíos da intelixencia artificial na educación.

Meta presenta Muse Spark, o seu novo modelo de IA centrado nas persoas

Redacción — 2026-04-08T21:19:24Z

Meta deu a coñecer Muse Spark, o primeiro modelo desenvolvido por Meta Superintelligence Labs (MSL), unha nova xeración de sistemas de intelixencia artificial deseñados especificamente para integrarse nos seus produtos e priorizar a interacción coas persoas. Este lanzamento aseguran que é un primeiro paso cara a unha superintelixencia persoal, concibida como un asistente capaz de axudar en tarefas relevantes da vida cotiá.
Muse Spark é, segundo Meta, o modelo máis potente desenvolvido ata o momento pola empresa, aínda que foi concibido deliberadamente como un sistema compacto e rápido. Este enfoque permite validar progresivamente o rendemento e a escalabilidade da nova familia de modelos Muse, mentres xa se traballa en versións de maior tamaño e capacidade. Na actualidade, este modelo impulsa o funcionamento da aplicación Meta AI e do sitio web meta.ai, e a súa integración estenderase nas próximas semanas a servizos como WhatsApp, Instagram, Facebook, Messenger e dispositivos como lentes intelixentes con capacidades de IA.
A renovación tecnolóxica vén acompañada dunha actualización profunda da propia experiencia de Meta AI, que introduce novos modos de funcionamento adaptados á complexidade das tarefas. O sistema pode alternar entre respostas rápidas e procesos de razoamento máis elaborados, e incorpora a posibilidade de executar múltiples subaxentes en paralelo para abordar unha mesma consulta. Isto permite, por exemplo, dividir unha tarefa como a planificación dunha viaxe en varios procesos simultáneos que analizan destinos, actividades ou itinerarios de forma coordinada.
Un dos piares de Muse Spark é a súa capacidade multimodal, que lle permite interpretar non só texto senón tamén imaxes e outros formatos visuais. Esta funcionalidade abre a porta a casos de uso como a identificación de produtos nunha fotografía ou a comparación de alternativas en tempo real. No ámbito da saúde, Meta destaca que o modelo foi adestrado coa colaboración de profesionais médicos para ofrecer respostas máis detalladas e útiles ante consultas frecuentes, incluíndo a análise de gráficos ou imaxes.
O sistema tamén incorpora capacidades de programación visual, que permiten xerar aplicacións sinxelas, xogos ou paneis personalizados a partir de instrucións en linguaxe natural. Esta funcionalidade apunta a facilitar a creación de contido interactivo sen necesidade de coñecementos técnicos avanzados.
Outro dos elementos diferenciadores é a integración co ecosistema social de Meta. O asistente pode ofrecer recomendacións de compra, estilo ou lecer baseadas no contido compartido en plataformas como Instagram ou Facebook, incorporando referencias a publicacións e tendencias xeradas polas comunidades de usuarios. Do mesmo xeito, ao buscar información sobre lugares ou temas de actualidade, Meta AI pode mostrar contexto adicional procedente de publicacións públicas.
Nunha primeira fase, as novas capacidades comezarán a despregarse nos Estados Unidos, tanto na aplicación como na web, cunha expansión progresiva a outros países e plataformas. Ademais, Meta anunciou que ofrecerá acceso ao modelo mediante API en fase de probas privadas para socios seleccionados, e deixou aberta a posibilidade de liberar futuras versións como software de código aberto.
Aseguran que este avance tecnolóxico irá acompañado de medidas reforzadas en materia de seguridade e privacidade, nun contexto no que a integración da intelixencia artificial co contido social e persoal dos usuarios introduce novos desafíos. Muse Spark representa así o primeiro chanzo dunha estratexia máis ampla orientada a construír sistemas de IA profundamente integrados co contexto dixital e relacional das persoas.

Forza Horizon 6 aposta pola exploración cun mundo aberto ambientado no Xapón

Redacción — 2026-04-08T21:10:56Z

A saga Forza Horizon prepara unha das súas entregas máis ambiciosas cunha nova proposta centrada na exploración e na liberdade do xogador. Forza Horizon 6, que se lanzará o 19 de maio de 2026, traslada a acción a un Xapón recreado con grande detalle, no que o usuario adopta o papel dun turista do festival Horizon en lugar do habitual piloto consolidado.
Esta mudanza narrativa funciona tamén como porta de entrada para novos xogadores, que poderán familiarizarse progresivamente co comportamento dos vehículos, as súas particularidades técnicas e a súa adaptación a diferentes contornas. O título busca así equilibrar a vertente competitiva coa experiencia de condución relaxada e o descubrimento do mundo aberto.
Un dos elementos centrais desta entrega é precisamente esa aposta pola exploración. O deseño do mapa incorpora por primeira vez un sistema de néboa de guerra, que se vai revelando a medida que o xogador percorre o territorio. Esta decisión reforza a sensación de progreso e descubrimento, afastándose do modelo tradicional baseado en iconas visibles desde o inicio.
O Xapón que propón o xogo combina espazos urbanos e rurais con grande variedade de actividades. Desde carreiras polas rúas iluminadas de Tokio ata percorridos todoterreo por zonas montañosas ou ríos, cada tipo de vehículo atopa o seu contexto ideal. Ademais, o sistema de progresión non obriga a seguir un camiño fixo: existe unha ruta principal, pero o xogador pode ignorala e explorar ao seu ritmo.
Entre as novidades destacan as probas de tempo (Time Attack) e as carreiras de aceleración (Drag Races), que se integran de maneira orgánica no mundo aberto e incorporan elementos asíncronos multixogador, como coches fantasma doutros usuarios ou marcas de récords visibles no escenario.
Outra das incorporacións relevantes é o sistema de vehículos Aftermarket, que permite atopar coches no propio mapa a prezos reducidos e vinculados ao contexto da actividade próxima. Esta mecánica pretende incentivar o uso de diferentes modelos e facilitar o acceso a vehículos máis especializados.
O título tamén introduce elementos coleccionables, como mascotas distribuídas polo mapa, que recompensan a exploración, así como un sistema de diario fotográfico que permite documentar a viaxe capturando imaxes de lugares emblemáticos.
No que respecta á personalización, Forza Horizon 6 amplía as opcións cun sistema de garaxes configurables asociados ás vivendas do xogador. Estes espazos poden adaptarse libremente, desde ambientes realistas ata propostas máis creativas, reforzando a sensación de propiedade e identidade dentro do xogo.
En conxunto, a nova entrega aposta por unha experiencia máis inmersiva e aberta, na que conducir deixa de ser só un medio para competir e pasa a converterse nunha forma de explorar e interactuar co entorno. Cunha ambientación coidada e novas mecánicas orientadas á liberdade, Forza Horizon 6 aspira a redefinir a fórmula da serie.

No último podcast oficial de Xbox afondaron nas novidades de Forza Horizon 6

Gemini para o fogar chega a España en acceso anticipado

Redacción — 2026-04-08T20:56:27Z

Google continúa reforzando a súa aposta pola intelixencia artificial aplicada ao fogar conectado coa expansión internacional de Gemini para o asistente de voz de Google Home. A compañía de Mountain View anunciou a despregadura en acceso anticipado desta tecnoloxía en 16 novos países, entre eles España, xunto coa incorporación de varios idiomas adicionais.
A chegada ao mercado español prodúcese tras varios meses de evolución do servizo, que debutou en outubro dentro dun programa inicial de probas. Desde entón, Google introduciu melloras substanciais co obxectivo de redefinir o funcionamento dos asistentes domésticos baseados en IA.
Entre os avances máis destacados figura a redución da latencia en dispositivos conectados, que segundo a empresa pode acadar ata un 40 % menos en ordes habituais como acender luces. Tamén se optimizou a comprensión contextual, permitindo ao sistema distinguir con maior precisión entre diferentes dispositivos do fogar e ofrecer información máis axustada á localización do usuario (como previsións meteorolóxicas ou novas de proximidade).
Gemini incorpora capacidades máis precisas e expresivas. Os usuarios poden empregar descricións máis naturais para configurar a iluminación (por exemplo, solicitando cores inspiradas en elementos concretos) ou definir parámetros detallados en electrodomésticos intelixentes, como niveis de humidade ou a temperatura previa dun forno.
A interacción tamén se volve máis áxil, con respostas máis breves en tarefas cotiás como a configuración de alarmas ou temporizadores. Ademais, introdúcense funcións como as alarmas contextualizadas, capaces de adaptarse a eventos específicos, e un modo máis accesible para o uso familiar, con soporte para contas supervisadas destinadas a menores.
Outra das novidades é a integración de funcionalidades avanzadas como a busca en tempo real en cámaras domésticas, dispoñible para usuarios do servizo de subscrición Google Home Premium, que permite consultar o estado do fogar de forma inmediata.
A expansión internacional abrangue países europeos como Francia, Italia, Alemaña ou o Reino Unido, ademais de España, así como mercados de Asia-Pacífico como Xapón ou Australia. En paralelo, amplíase o soporte lingüístico con idiomas como o español, francés, alemán ou xaponés, entre outros.
A despregadura en España comeza de maneira gradual desde esta semana a través da aplicación Google Home, onde os usuarios poderán solicitar o acceso ao programa anticipado. Google anima aos participantes a enviar comentarios para mellorar o funcionamento do sistema, nun proceso iterativo que considera clave para a evolución da súa proposta de fogar intelixente.

Unha pantalla magnética permite facer selfies coa cámara traseira do móbil

Redacción — 2026-04-08T20:30:00Z

Insta360 anunciou o lanzamento de Snap, un monitor compacto que se acopla magneticamente ao smartphone e permite utilizar a cámara traseira para facer selfies e vlogs cun maior nivel de nitidez. O accesorio chega en dúas versións: unha estándar e outra con iluminación integrada, pensada para mellorar a calidade da imaxe en condicións de luz complexas.
A proposta parte dunha limitación habitual nos teléfonos móbiles: aínda que incorporan cámaras traseiras de alta resolución, a maioría dos usuarios continúa empregando a cámara frontal, de menor calidade, pola dificultade de encadrar a toma. Snap resolve este problema ao ofrecer unha previsualización en tempo real mentres se utiliza a cámara principal, e chega dende unha marca coñecida para os consumidores, pois non podemos esquecer que este tipo de accesorios existe dende hai tempo, pero de fabricantes chineses totalmente descoñecidos.
Dirixido a creadores de contido, vloggers e usuarios habituais, o accesorio permite aproveitar sensores máis avanzados sen renunciar á comodidade de verse na pantalla durante a captura. Ademais, facilita o uso de lentes gran angular para selfies máis amplos e detallados.
A variante Snap con Luz incorpora un sistema de iluminación axustable desenvolvido en colaboración con Amiro, especializado en óptica de maquillaxe profesional. Esta solución permite adaptar o brillo e a temperatura de cor para conseguir tons de pel máis equilibrados en diferentes escenarios, desde interiores con pouca luz ata situacións a contraluz.
Snap aposta por unha integración sinxela co teléfono. Funciona mediante conexión USB-C, sen necesidade de emparellamento, cun retardo mínimo de arredor de 30 milisegundos e sen requirir batería propia. A pantalla táctil replica a interface do smartphone, permitindo modificar parámetros, encadrar a imaxe ou controlar aplicacións directamente desde o accesorio.
Entre as súas características tamén figura a posibilidade de inverter a vista previa cun só toque, facilitando unha experiencia máis natural ao axustar a pose, o peiteado ou a expresión facial. Ademais, o dispositivo é compatible tanto coas aplicacións de cámara nativas como con ferramentas de terceiros.
En canto ao deseño, Insta360 Snap preséntase como un accesorio ultrafino e portátil, pensado para o uso en mobilidade. Inclúe unha funda protectora que actúa tamén como soporte durante a captura e un sistema magnético que permite fixalo rapidamente ao terminal.
Insta360 Snap está dispoñible a un prezo de 85,99 euros para o modelo estándar, mentres que a versión con iluminación integrada elévase ata os 95,99 euros.

Vídeo promocional do novo accesorio de Insta360

Coruña Bloggers celebrará o seu décimo aniversario cunha edición especial o 6 de xuño

Redacción — 2026-04-08T20:18:57Z

Coruña Bloggers conmemorará en 2026 o seu décimo aniversario cunha edición especial que terá lugar o vindeiro 6 de xuño no Espazo Avenida Abanca, no Cantón Grande da Coruña. A organización prepara unha xornada ampliada, cun formato que combinará contido, experiencias e actividades de comunidade ao longo de sete horas.
O evento, que ao longo da última década consolidou a súa posición como punto de encontro para creadores de contido e profesionais do ámbito dixital, acumula xa 34 edicións celebradas, máis de 2.400 asistentes e arredor de 80 relatores. Porén, desde a organización subliñan que o valor principal do proxecto vai máis alá das cifras, facendo fincapé nas conexións persoais e profesionais que xorden en cada convocatoria.
A edición deste ano incluirá charlas, entrevistas, xogos e diversas sorpresas, mantendo tamén un dos seus sinais de identidade: o networking entre asistentes. Ademais, non faltarán espazos máis distendidos que favorezan a interacción informal, un dos elementos que contribuíron á consolidación da comunidade ao redor de Coruña Bloggers.
Como en edicións anteriores, o evento terá un compoñente solidario. A entrada consistirá na achega mínima de tres quilogramos de alimentos non perecedoiros, que serán destinados á Cociña Económica da Coruña. Neste aniversario, a organización fixa como obxectivo acadar media tonelada de produtos recollidos, unha meta que pretende reforzar o impacto social da iniciativa.
As invitacións para asistir ao evento distribuiranse proximamente, segundo avanzan os organizadores, que apelan á participación da comunidade para celebrar unha década de actividade marcada pola creación de contido, o intercambio de ideas e a construción de redes profesionais na cidade.

Modogalegoames.gal reivindica a nosa lingua nun gran festival o 17 de abril

S. P. — 2026-04-08T20:04:41Z

O Pazo da Peregrina (Bertamiráns, Ames) acolleu este 7 de abril a presentación do festival Modo Galego, actívao! Trátase dunha festa coa que se pechará a cuarta edición deste programa que está organizado polo Concello de Ames e a Real Academia Galega, en colaboración coa Xunta de Galicia, a través da Secretaría Xeral da Lingua. Trátase dun programa de inmersión lingüística cuxa páxina web, modogalegoames.gal, funciona (dende hai catro anos) de punto de encontro activo, eixe de actividade, foco de información e fonte de recursos.
Na presentación participaron o alcalde de Ames, Blas García, o secretario xeral da Lingua da Xunta de Galicia, Valentín García, a académica da Real Academia Galega, María López Sández, a subdirectora xeral de Planificación e Dinamización Lingüística da Xunta de Galicia, María Coutinho, a técnica de Normalización Lingüística do Concello de Ames, Rosa Moreiras, e mais os representantes das Maianas e da Gramola Gominola, Inés Suárez e Paco Cerdeira.
O festival
No dito festival actuarán o grupo de música tradicional amesá As Mainas, e dúas das bandas máis potentes do panorama da música infantil en galego: A Gramola Gominola e Uxía Lambona e a Banda Molona. A festa será o venres, 17 de abril, ás 17.30 horas, na explanada do Pavillón de Deportes de Bertamiráns. Todo o alumnado dos centros de ensino de Ames recibirá o seu convite para poder asistir acompañados das súas familias. A apertura de portas será ás 17.00 horas.
Balance da nova edición
O pasado 6 de febreiro remataron as actividades propostas na cuarta edición de Modo Galego, actívao! Nesta edición participaron arredor de 2.700 alumnos e alumnas que contaron coa colaboración de case 300 docentes e uns 200 profesionais da educación non formal. O programa de actividades pechou cunha gran foliada en cada centro escolar que estivo dirixida polas pandeireteiras do grupo As Maianas e das asociacións de Bugallido, que ao igual que na edición anterior, cantaron e bailaron a canción Falo galego porque quero!!, que as propias Maianas crearon explicitamente para o Modo Galego.
O Concello de Ames confirmou que “a cuarta convocatoria volveu a ser un éxito en canto á participación e confirma a consolidación da experiencia”. Durante catro semanas, os alumnos e alumnas de infantil á ESO dos 11 centros públicos amesáns asumiron un obxectivo común: falaren galego o maior tempo posíbel e en todas as situacións do día a día, da casa á escola e do parque ás actividades extraescolares. Os nenos e nenas foron os auténticos protagonistas dunha proposta de marcado carácter lúdico. Este ano como novidade, ademais do alumnado dos centros de ensino, participaron no programa os usuarios e usuarias das escolas deportivas municipais.
Fomento do galego
O alcalde e concelleiro de Normalización Lingüística, Blas García, explicou que este festival é un apoio máis ao traballo que se está facendo co programa Modo Galego: “Con festivais coma este damos un paso importante na normalización do idioma, xa que o obxectivo que temos todos é o mesmo: que o galego perdure. Como sempre digo, o galego non é patrimonio de ninguén en concreto, é patrimonio de todos e de todas. Agardo que este festival sexa unha actividade que vaia medrando e que perdure no tempo. O máis importante sería que nos próximos anos, cando se siga celebrando, non só participemos xente de Ames, senón que vaia medrando e expandindo a outros concellos”.
Pola súa banda, o secretario xeral da Lingua da Xunta de Galicia, Valentín García, destacou que “este proxecto ten moitas partes importantes. O Modo Galego, actívao! encadra coa idea de levar o galego máis alá da aula, os espazos de socialización. Ir á escola é moito máis que sentar na aula e adquirir coñecementos: é socializar. Debemos crear contornas de seguridade para que os rapaces e rapazas se comuniquen en galego con comodidade. Esta festa é o xeito de manifestar de maneira colectiva o orgullo de activarmos o galego. A música é unha parte fundamental da nosa cultura e do noso lecer e, sen dúbida, o mellor xeito de pechar esta edición do programa Modo Galego, Actívao! co que estamos encantados de colaborar”.
García destacou que este programa únese a outras propostas enfocadas nos máis pequenos e impulsadas a través do paquete de medidas da Xunta, que tamén teñen como escenario os centros escolares, como o 21 días co galego e +, o Falamos + e as distintas iniciativas como os contidos audiovisuais a través da plataforma Xabarín.gal. A isto súmanselle grupos de conversa para a mocidade ou cursos específicos para persoas non nacidas en Galicia, sinalou.

Galicia Calidade viaxará ao espazo nun vehículo de transferencia orbital deseñado pola galega UARX Space

S. P. — 2026-04-08T15:00:00Z

A marca Galicia Calidade viaxará ao espazo no primeiro vehículo de transferencia orbital deseñado en España pola empresa galega UARX Space, e que se lanzará nos vindeiros meses desde a base aérea de Vandenberg, en California.
A conselleira de Economía e Industria, María Jesús Lorenzana, visitou este martes 7 de abril as instalacións desta empresa en Porto do Molle, en Nigrán (Pontevedra), onde salientou que UARX Space “é unha firma única en España” e “está entre as cinco de todo o mundo en fabricar este tipo de sistemas propios capaces de manobrar no espazo”.
OSSIE (Orbit Solutions to Simplify Injection and Exploration) nas súas siglas en inglés, é un vehículo de transferencia orbital deseñado para transportar satélites pequenos e medianos a diferentes órbitas e facilitar, así, que cheguen ao seu destino final. Permitirá a inxección de satélites en órbitas terrestres non tradicionais, ao redor da lúa e en traxectorias ao espazo profundo.
Lorenzana quixo manifestar o “orgullo inmenso” de toda Galicia por este fito que vai conseguir UARX Space, unha empresa “con moitísimas posibilidades de crecemento dentro do momento económico e industrial actual”, dixo. “Seguiremos acompañándoa -subliñou-, porque, dentro da Estratexia de Seguridade, Defensa e Aerospazo é unha das empresas que ten maior potencialidade na comunidade autónoma”, concluíu.
A empresa UARX Space é un referente galego e internacional en solucións de loxística de transporte en órbita, misións compartidas e lanzamentos dedicados para pequenos satélites.

Comeza a conta atrás para a fase galega do concurso AdaByron, o 24 de abril

S. P. — 2026-04-08T14:34:59Z


Exterior da ETSE da USC

O 24 de abril desenvolverase a fase galega do concurso AdaByron, un certame universitario de programación dirixido ao estudantado matriculado nas titulacións de informática das universidades públicas.
Nesta edición de AdaByron Galicia, a ETSE (Escola Técnica Superior de Enxeñaría da USC) será a sede dos graos en Enxeñaría Informática e en Intelixencia Artificial. Tamén serán sedes a Facultade de Informática da UDC e a Escola Superior de Enxeñaría Informática da UVigo.
Só poderán participar estudantes que cursen algún dos graos impartidos nos tres centros organizadores e a inscrición realizarase por equipos. Un equipo estará formado por tres estudantes da mesma universidade, aínda que poden pertencer a graos (ou itinerarios) diferentes.
A organización xestionará a admisión dos equipos da forma que considere máis axeitada. Dependendo da cantidade de estudantes interesados poderá empregarse unha estratexia FIFO, un sorteo, ou un criterio de reparto por cursos.
Os concursos rexionais do certame AdaByron son os concursos clasificatorios para a final nacional. Realizaranse entre febreiro e abril de 2026.
A fase AdaByron Galicia celebrarase nos tres centros do Sistema Universitario Galego que imparten Graos en Enxeñería Informática (Facultade de Informática da UDC, Escola Técnica Superior de Enxeñaría da USC e Escola Superior de Enxeñaría Informática de UVigo) o 24 de abril de 2026 pola tarde. Os mellores clasificados poderán participar no concurso nacional que se celebrará en xullo de 2026.
AdaByron é un concurso universitario que nace na Comunidad de Madrid e que desde o ano 2022 abriuse a outras universidades españolas nunha competición na que se miden as habilidades e destrezas de programación dos estudantes universitarios.
Un dos obxectivos do concurso é “incentivar a participación dos estudantes de informática no concurso internacional de programación ICPC (International Collegiate Program.

WhatsApp prepara o lanzamento progresivo de nomes de usuario para reforzar a privacidade

Redacción — 2026-04-08T14:30:00Z

WhatsApp avanza no desenvolvemento dunha das súas funcións máis demandadas: o uso de nomes de usuario como alternativa ao número de teléfono. Segundo as últimas informacións, a plataforma propiedade de Meta prevé iniciar unha despregadura limitada nos vindeiros meses, cunha implantación progresiva antes da súa chegada ao conxunto dos usuarios.
A nova funcionalidade permitirá iniciar conversas sen necesidade de compartir o número persoal, un cambio relevante no modelo de interacción da aplicación. Os usuarios poderán escoller un identificador único co que comunicarse, o que introduce unha capa adicional de privacidade e facilita o contacto con terceiros de forma máis controlada.
O sistema será compatible con Android, iOS, Windows e a versión web de WhatsApp. A compañía de Mark Zuckerberg leva tempo adaptando a infraestrutura da aplicación para integrar esta novidade sen comprometer o funcionamento das características actuais, o que explica o ritmo cauteloso do seu desenvolvemento.
Para crear un nome de usuario, os usuarios deberán cumprir unha serie de requisitos técnicos: terá entre 3 e 35 caracteres, deberá incluír polo menos unha letra e só poderá empregar letras minúsculas, números, puntos e guións baixos. Ademais, non poderá comezar por www. nin rematar en dominios como .com ou .net, co obxectivo de evitar confusións con páxinas web oficiais.
Un dos aspectos máis relevantes é a integración co sistema de contas de Meta. Para utilizar un nome xa rexistrado noutras plataformas do grupo, como Facebook ou Instagram, será preciso verificar a súa titularidade a través do Control de Contas. Isto garante a coherencia dos identificadores entre servizos, pero tamén introduce implicacións en materia de privacidade, xa que empregar o mesmo nome pode facilitar a vinculación entre perfís.
Neste sentido, WhatsApp advirte de que escoller un identificador idéntico ao doutras redes pode permitir que terceiros localicen máis facilmente a presenza dun usuario noutras plataformas. Como alternativa, recoméndase optar por nomes distintos se se desexa manter separación entre contas.
A función tamén incorpora un mecanismo opcional de seguridade adicional: unha clave asociada ao nome de usuario. Este código de catro díxitos será necesario para que persoas descoñecidas poidan iniciar unha conversa, limitando así o contacto non desexado.
O acceso á nova característica será inicialmente restrinxido a un grupo reducido de usuarios que conten coas últimas versións da aplicación. A compañía monitorizará o seu rendemento antes de ampliar a dispoñibilidade de forma progresiva.