Retiran o programa de exploradores de Google Glass

Tras numerosos rumores que daban por morte e enterrado o proxecto das lentes de Google, anuncian hoxe que o Programa Glass Explorer, que estaba nunha fase de probas aberta, vai dicir adeus, de xeito que esta iniciativa que permitía a desenvolvedores e público en xeral mercar un prototipo de Google Glass rematará o vindeiro día 19, o que non quere dicir que as Glass vaian desaparecer para sempre, pero si que desaparecen na súa forma actual, pasando agora a unha fase de desenvolvemento fóra da luz dos focos.
Dende Google aseguran que o Programa foi unha grande iniciativa que permitiu realizar un grande experimento con tecnoloxía wearable para múltiples usos en áreas moi diversas, de aí que agora opten por “graduar” o proxecto dos laboratorios Google X (para proxectos experimentais) para que pase á propia compañía. Coméntase que será Tony Fadell, co fundador de Nest, quen tomará agora as rendas de Google Glass, de xeito que o produto iniciaría agora unha nova xeración que desenvolverase dende un equipo independente comandado por Ivy Ross.
Tras estes anuncios e rumores resulta difícil adiviñar cal será o futuro de Google Glass, pero o que parece evidente é que non veremos un produto comercial a curto prazo, dando a impresión de que o produto ve adiada a súa saída á rúa a uns tempos nos que poida ter unha boa acollida por parte dos consumidores, que aínda non parecen ter asumido como algo habitual a tecnoloxía wearable.