Recoñecemento estatal para a aposta TIC de Lugo en materia de sustentabilidade

O Concello de Lugo vén de ser obxecto dunha distinción ao seu traballo en sustentabilidade e en tecnoloxías ao servizo desa sustentabilidade. O recoñecemento (premio Escoba de Ouro 2016) foi concedido pola Asociación Técnica para a Xestión de Refugallos, Aseo Urbano e Medio Ambiente (ATEGRUS), colectivo formado por profesionais do sector que salienta e visualiza, con este tipo de galardóns, as políticas positivas en materia de xestión de residuos e avances tecnolóxicos dirixidos a este ámbito. Segundo a alcaldesa, Lara Méndez, o galardón “supón un recoñecemento ao bo facer do Concello, dos 120 traballadores do servizo e da implicación dos 98.134 lucenses”. Tamén, nun plano TIC, salienta o potencial das tecnoloxías smart de Liña Verde.
A rexedora deu a coñecer a distinción acompañada do concelleiro de Desenvolvemento Sostible e Persoal, Daniel Piñeiro, que recollerá hoxe o premio en Madrid, no marco da Feira Internacional de Urbanismo e Medio Ambiente.
Segundo explicou a alcaldesa, o recoñecemento débese á aposta clara do Goberno local “por manter e recuperar espazos públicos e mantelos en boas condicións”, por favorecer a concienciación cidadá e pola aplicación das novas tecnoloxías, por exemplo a posta en marcha da aplicación de balde para dispositivos móbiles, a ferramenta Liña Verde, dirixida a fomentar as boas prácticas arredor da xestión colectiva de residuos e lixo.
Como lembraremos, a app Liña Verde permite que calquera cidadán poida facer consultas, notificar incidencias ou acceder a todos os datos relativos ao medio ambiente de Lugo e a súa contorna. Dende o seu lanzamento, en 2013, Liña Verde abrangueu unha manchea de incidencias comunicadas (o 90% das cales, lembrou a alcaldesa, foron solucionadas polo Concello). Segundo engadiu a rexedora, trátase dun recurso tecnolóxico “eficaz e de gran utilidade” para, por exemplo, fornecer avisos sobre mantemento de parques e xardíns, de recollida de lixo, de limpeza e de acondicionamento de sumidoiros.