Os novos auriculares de Anker sorprenden pola súa boa cancelación de ruído en chamadas

Anker presentou os novos auriculares Soundcore Liberty 5 Pro e Liberty 5 Pro Max, os primeiros modelos da marca equipados co novo chip Thus AI, deseñado para mellorar especialmente a claridade das chamadas de voz e a redución de ruído en escenarios complexos.
Os novos auriculares sitúanse nun segmento máis premium dentro da gama Soundcore, con prezos de 179,99 euros para os Liberty 5 Pro e 249,99 euros para os Liberty 5 Pro Max. Ambos os modelos comparten practicamente todas as características técnicas, diferenciándose principalmente polas funcións dos seus estoxos de carga.
O modelo estándar incorpora unha pantalla táctil TFT de 0,96 polgadas situada na parte exterior, mentres que a versión Max aposta por unha pantalla AMOLED de 1,78 polgadas integrada na tapa deslizante.
A versión Max engade tamén unha función de gravación e transcrición mediante IA. A caixa incorpora almacenamento interno e pode rexistrar reunións ou conversas sen necesidade de utilizar os auriculares. Posteriormente, a aplicación Soundcore xera transcricións, resumos e identificación automática de interlocutores, podendo exportar os arquivos en formatos como PDF, .docx ou Markdown.
O chip Thus AI traballa en combinación con oito micrófonos e dous sensores de condución ósea para illar a voz do usuario do ruído ambiental durante as chamadas. O sistema emprega modelos de intelixencia artificial capaces de separar a voz do interlocutor dos sons de fondo, permitindo manter conversas claras mesmo en rúas con tráfico intenso ou espazos ruidosos. Os sensores de condución ósea tamén permiten captar a voz a volumes máis baixos en ambientes relativamente silenciosos.
Aseguran que os Liberty 5 Pro ofrecen «a mellor calidade de chamada» escoitada ata o momento nuns auriculares sen fíos, cun rendemento superior incluso ao dos AirPods Pro 3 de Apple en situacións con moito ruído ambiente.
A cancelación activa de ruído emprega a tecnoloxía Adaptive ANC 4.0, capaz de analizar o son ata 384.000 veces por segundo para adaptar o filtrado en tempo real.
A autonomía sitúase nas 6,5 horas de reprodución con ANC activado, ampliándose ata 28 horas coa caixa de carga.
Os dous modelos inclúen ademais control por voz sen palabra de activación, compatibilidade con Apple Find My, Google Fast Pair, Bluetooth 6.1 e resistencia IP55 fronte a po e salpicaduras.