O proxecto galego campusMVP colabora co mercado laboral de Microsoft

campusMVP, o proxecto de formación da viguesa Krasis, especializada en cursos en liña sobre tecnoloxías Microsoft, e MSEmploy, o portal español de emprego focalizado en ofertas de traballo con tecnoloxías Microsoft, convertéronse en partners coa sinatura dun acordo entre ambas as empresas que combinará os seus esforzos para dar resposta a ofertas e demandas de todo interesado en profesionalizarse no ámbito Microsoft, xa sexa empresa ou candidato. MSEmploy demostra, así, que só confía nun partner de formación consolidado e recoñecido pola comunidade Microsoft como campusMVP.
Por unha banda, campusMVP, encargarase de facilitar o acceso á formación a todos aqueles candidatos que requiran coñecementos específicos e certificados sobre tecnoloxías Microsoft. Así, se un candidato non dispón dun currículo especialmente orientado a Microsoft ou se unha empresa necesita formar ao seu persoal, campusMVP orientaralle para adquirir cursos axeitados á súa área de especialización, e, mesmo, para obter unha certificación oficial de Microsoft que o acredite.
Por outra banda, MSEmploy, que conta para o seu proxecto co apoio directo da propia Microsoft, centrará a súa actividade en pór en contacto a profesionais Microsoft Certificados para mellorar a capacidade de entrega de proxectos de Partners e Clientes Microsoft. Así, ofrece servizos para as empresas (publicación de ofertas, revisión previa de CV antes o envío á empresa...) e para os candidatos (inserción de CV, ofertas en formación Microsoft, perfís máis buscados...).
Entre as vindeiras actividades organizadas por MSEmploy, e apoiada por campusMVP entre outras entidades, atópase a celebración da Feira de Emprego FEMBarcelona o vindeiro 25 de novembro en Barcelona. Baixo a lema ¡Non quedes parado!, será un punto de encontro entre as empresas, estudantes e profesionais TIC para axilizar os procesos de recrutamento.
A unión dos esforzos de campusMVP e MSEmploy favorecerá a aparición dun mercado laboral en contornas Microsoft máis profesionalizado e con maior movemento de candidatos, que, indubidablemente, beneficiará a todo o que estea inmerso neste ámbito.