O presidente do CPEIG participou no Congreso de Edificios Intelixentes celebrado en Madrid

O pasado 21 de xuño celebrouse en Madrid a terceira edición dun encontro arredor de diferentes metodoloxías e recursos para fogares smart (vivendas conectadas ás redes e á Internet das Cousas, máis sustentables, eficientes e mellor comunicadas). O Congreso de Edificios Intelixentes incluíu unha mesa redonda sobre ciberseguridade, riscos e evolucións aplicables ás novas vivendas. Nela participou Fernando Suárez, presidente do Colexio Profesional de Enxeñaría en Informática de Galicia (CPEIG). E fíxoo en calidade de representante da entidade galega e de vicepresidente primeiro do Consello de Colexios de Enxeñaría en Informática (CCII). O obxectivo xeral do dito Congreso foi potenciar o intercambio de coñecementos e experiencias sobre os edificios intelixentes dun xeito transversal, multidisciplinar e multisectorial.
Na súa intervención, Suárez salientou que a ciberseguridade nos edificios intelixentes merece ter unha maior atención para atallar as múltiples vulnerabilidades que permiten a un atacante “non só tomar o control de todos os sistemas intelixentes como son a iluminación, sistemas de augas, ventilación, xeración de enerxía, ascensores e escaleiras mecánicas, entre outros, senón que tamén poden supoñer un vector de entrada que presenta un risco a nivel dixital, accedendo á rede interna, pero tamén unha intrusión na contorna física”.
O presidente do CPEIG tamén fixo saber que é necesario “construír edificios intelixentes ao redor da ciberseguridade, e non ao revés”. Desta maneira, avogou pola “introdución dos requisitos de seguridade desde a súa concepción”, no momento mesmo do deseño, identificando cales son os niveis de risco e cales son as implicacións en todos os stakeholders que se integran no ecosistema. Fernando Suárez defendeu como “fundamental” que o regulamento dese tipo de infraestrutura contemple tamén os profesionais con competencias e coñecementos acordes “para garantir as implicacións relativas á seguridade”.