O alumnado de Enxeñaría Industrial de Vigo volve da súa visita ao CERN
xoves, 28 de xuño do 2012
Remata o curso, chegan as vacacións e
con elas as viaxes culturais (ou non tanto) de alumnos e alumnas que precisan
recargar “baterías” para afrontar un
novo reto no vindeiro curso.
Porén non todas son viaxes a Punta
Cana, Cuba ou Tailandia; tamén hai de quen prefire aproveitar o tempo de lecer
para formarse, sobre todo se ten que ver coa súa especialidade na carreira.
É o caso de 47 alumnos e alumnas da
Escola de Enxeñaría Industrial de Vigo, que cambiaron as praias mediterráneas
por unha visita ao Centro Europeo de Investigación Nuclear, CERN, da que
volveron “satisfeitos,
ilusionados e cargados de inquedanzas”.
Viaxaron a Suíza acompañados do
profesor do grupo de Tecnoloxía Enerxética, David Patiño, con quen puideron
coñecer de primeira man as instalacións deste centro de referencia para eles, e
asemade, achegarse á investigación punteira que se desenvolve alí e que ten
moita relación coa súa formación académica.
Alén de servirlle como experiencia
persoal única na súa carreira de enxeñeiros, esta visita permite estreitar
lazos entre o CERN e a Escola de Enxeñaría Industrial, para que no futuro se poidan
volver a organizar visitas alí e mesmo recibir en Vigo as dos seus
investigadores.
A axenda incluía visitas polos
distintos departamentos, o detector Atlas, a sala de control de calidade dos
imáns supercondutores, o acelerador de partículas, a exposición Micrososm ou o
despacho no que naceu a Web, entre outras actividades, porén de todas elas, a
máis especial para os alumnos e alumnas foi “a oportunidade de poder xantar nun comedor público rodeados de premios
Nobel”, segundo eles mesmos afirmaron.
A visita ao CERN deixou paso,
xa en territorio francés, a un percorrido pola factoría de Airbus en Toulouse
para a ensamblaxe do A380, onde visitaron os hangares, unha das salas de
telemetría e fixeron un tour
panorámico polo aeroporto de Blagnac, base de fabricación do A320 para a
compañía Airbus.
Concluída a viaxe, é de pensar que a maioría destes
futuros enxeñeiros e enxeñeiras teñen un pouco máis claro o camiño que queren
seguir na súa carreira, e han de estar contando os días que restan para que dea
comezo o novo curso