O Museo das Peregrinacións convida a descubrir o Santiago do século XIII a través da interactividade

Para achegarnos á realidade de Santiago de Compostela no século XIII, se cadra nada mellor que botar man das novas tecnoloxías. Este, o de tirar proveito do interactivo e do virtual para chegar o máis preto posible do que sería unha máquina do tempo, é o piar sobre o que se apoia o Museo das Peregrinacións de Santiago. O motivo? Pois recrear a Compostela do século XIII e aínda por riba amosalo. A dirección do museo, emprazado en Praterías, está a lanzar estes días un convite para os escolares e os seus colexios co fin de que descubran como era a capital de Galicia en tempos do románico e do gótico. E todo a través de reconstrucións virtuais, xogos e aplicacións interactivas.
Ademais, inclúense dúas “impresionantes maquetas que recrean a catedral no século XIII”. A iniciativa Compostela Dicitur. A Cidade da Catedral compleméntase con visitas guiadas e diríxese aos alumnos dos centros educativos de primaria e secundaria. A mostra, sinala a dirección do museo máis polo miúdo, conta con aplicacións interactivas, reconstrucións virtuais que permiten coñecer a aparencia e a evolución urbana da cidade, pantallas xigantes que recrean a Catedral románica tal e como a viron os que a coñeceron tras a súa consagración en 1.211, e ata un xogo interactivo que ofrece a posibilidade de acompañar a un peregrino no seu percorrido pola Compostela medieval. O museo tamén salienta as maquetas Catedral e da cidade, esta de máis de 20 metros cadrados. Por certo que para a súa construción seguíronse as descricións que da cidade e da Catedral fai o Códice Calixtino.