O CPEIG quence motores para celebrar mañá a II Noite da Enxeñaría en Informática de Galicia

O Hostal dos Reis Católicos, en Santiago de Compostela, foi o lugar escollido polo Colexio Profesional de Enxeñaría en Informática de Galicia para celebrar a súa noite máis importante e conmemorativa do ano.
Trátase da Segunda Noite da Enxeñaría en Informática de Galicia, que dará comezo a partir das 20:30 horas de mañá e á que asistirán máis de 200 colexiados e colexiadas, ademais de destacadas autoridades dos eidos político e universitario.
O acto, que conta co apoio de diversas empresas e institucións vencelladas ás novas tecnoloxías, ten como obxectivo recoñecer as iniciativas e persoas destacadas no ámbito da Enxeñaría en Informática e nel serán premiadas, entre outras, a factura electrónica da Consellaría de Facenda, a Axenda Dixital de Galicia (2014.gal) ou o Proxecto Fin de Carreira de Roberto Rey Expósito.
Asemade, tamén será recoñecida a traxectoria profesional de Pablo Santos Luaces, conselleiro delegado e fundador de Códice Software, e o Clúster TIC de Galicia, que recibirá o Premio Iniciativa Empresarial.
Para a organización desta Noite, o CPEIG contou coa colaboración e apoio económico de diversas entidades e empresas que operan no eido das novas tecnoloxías. Como patrocinadores de ouro: Hewlett-Packard, Telefónica, Bahía Software, Plexus, Altia, Atos Consulting, Everis, Bull e Xunta de Galicia. Como patrocinador de prata: Coremain, e por último e non menos importantes, como patrocinadores de bronce: Tecnocom, IECISA, T-Systems, Balidea e INSA. Asemade, a entidade La Caixa tamén apoia economicamente este acto.
Os colexiados e colexiadas, segundo afirman dende a organización, “gozarán dunha noite ideada para o encontro e intercambio lúdico, que se pechará cunha cea no Hostal dos Reis Católicos”. A entrega de premios, prevista para as 21:15 horas será conducida polo artista Miguel Lago –coñecido por ser o monologuista máis novo de todos os que actuaron ata o momento no Club de la Comedia e colaborador habitual da Paramount Comedy, ademais de actor no “reality” Curso del 63- e contará tamén coa actuación do grupo de música Alo-Django Alo-Django.