O CDTIC organiza esta semana en Vigo unha xornada sobre Joomla

O Centro Demostrador TIC organiza o día 26 de febreiro unha sesión de formación sobre o sistema de xestión de contidos Joomla. A xornada desenvolverase en horario de 18.00 a 20.00 horas na Aula CeMIT de Vigo, na rúa do Porto. A actividade formativa, sinala o CDTIC, ten como obxectivo explicar o funcionamento do dito paquete de ferramentas para o manexo da información, as súas características (licenza, partes, capacidade de adaptación ou xestión de usuarios, menús, contidos, modelos, idiomas etc.) ou a súa comunidade.
A sesión está destinada a profesionais TIC, responsables da xestión web das empresas, autónomos etc. que queiran crear unha páxina web en Joomla ou ben xa administran unha e queren afondar no seu emprego ou na forma de engadir máis funcións. Encargarase de impartila Pablo Arias, desenvolvedor, asesor e consultor web especializado en Joomla.
Segundo explica a organización, existe un límite de prazas para participar nesta actividade, polo que cómpre inscribirse previamente na web do CDTIC. As persoas que non poidan acudir á demostración poderán seguila a través de streaming.
Segundo lembra o CDTIC, Joomla é “o máis popular dos xestores de contidos”. Emprégano tanto individuos como PEME ou grandes organizacións para crear, “dun xeito doado e flexible”, unha gran variedade de webs ou aplicacións web. E engade: “Joomla ofrece un amplo abano de compoñentes adicionais como son axenda, foros, enquisas, buscador avanzado, sindicación de contidos, etc; e entre as súas múltiplas extensións salientan varias especialmente deseñadas para integrar no portal unha tenda de comercio electrónico”.