Este mércores 21 comeza en Compostela o ciclo de conferencias #charlasnaDAG

A Asociación Galega de Deseñadores, que agrupa a deseñadores gráficos e industriais de todo o país, está a organizar un ciclo de conferencias sobre distintos eidos da estética e o deseño actual, que se van celebrar no centro sociocultural A Trisca, en Santiago de Compostela, baixo o nome #charlasnaDAG.
As charlas, que están abertas a todo o público, celebraranse os mércores de cada mes a partir das 19:00 horas, e nelas participarán distintos convidados de renome con experiencia no sector do deseño en Galicia, co obxectivo de transmitir e “contaxiar” a paixón que como deseñadores senten pola súa profesión.
A intención deste ciclo de charlas é que os convidados compartan experiencias de primeira man cos seus auditorios para así transmitirlles coñecementos e ganas de renovarse e aprender cada día; deste xeito, cada sesión tocará distintas temáticas dependendo do deseñador convidado e da parte do deseño que domine cada un.
O ciclo de conferencias inaugúrase este mércores, 21 de setembro, cunha charla do deseñador web Óscar Otero, que leva por título A web dos deseñadores, na que falará sobre a evolución da web nestes vinte anos de vida e na que repasará os principais cambios experimentados desde a súa aparición.
O programa das charlas inclúe a participación de Marcos Dopico, da Universidade de Vigo, experto en tipografía; Segundo Fernández, de Sond3, especialista en deseño con retículas e Alberto Montiel, de FrutoDS, con ampla experiencia na técnica informática do renderizado.