Insta360 pon á venda a súa nova cámara de acción 8K

As cámaras de acción GoPro téñeno cada vez máis complicado, e tras o lanzamento da DJI Osmo Action 5 Pro, temos agora a Insta360 Ace Pro 2, unha cámara de acción 8K con IA deseñada en colaboración con Leica, que presume dun sensor de 1/1,3 polgadas e lente Leica Summarit, cun interesante sistema antivento para ter un audio máis nítido en exteriores, pantalla táctil abatible de 2,5 polgadas, vídeo HDR activo en 4K a 60 imaxes por segundo (podendo gravar 8K a 30 imaxes por segundo e en 4K a 120 imaxes por segundo), estabilización FlowState e 360º Horizon Lock, un chip de IA dual para mellorar a calidade de imaxe e resistencia á auga para ata 12 metros de profundidade (ata 60 metros cunha funda de mergullo) e unha batería de 1.800 mAh capaz de achegar 180 minutos de gravación e que pode cargarse ata o 80% en só 18 minutos (a carga completa levaría 47 minutos).
Tamén pode operar a entre 20 graos baixo cero e 45 graos centígrados, é compatible con auriculares Bluetooth, pode controlarse por voz e por xestos, e incluso integra un sistema de códigos de tempo, para facilitar o traballo multicámara á hora de editar.
Esta atractiva cámara de acción sae á venda cunha batería no seu paquete estándar por 449,99 euros, estando tamén dispoñible con dúas baterías e con diferentes accesorios de montaxe.