Facebook písalle os talóns a YouTube no tocante ás consultas de vídeos
martes, 21 de agosto do 2012
Reproducir vídeos que outros
usuarios comparten nos seus muros ou collelos doutras plataformas en liña para
que os nosos amigos os consulten é unha costume cada vez máis estendida en
Facebook, tanto que a plataforma xa vén de converterse na segunda máis
utilizada polos internautas nos Estados Unidos para consultar vídeos en liña.
E é que segundo
un estudo elaborado pola compañía de investigación ComScore, para o que se
empregaron datos de máis de 184 millóns de usuarios de Internet de EE.UU, “un total de 53.045 usuarios prefiren
Facebook fronte a outras plataformas como Yahoo, VEVO ou Microsoft para
reproducir vídeos”.
Á popular rede social só a supera
YouTube, con 157.000 usuarios únicos no mes de xullo, o que a converte na rede
social máis importante no tocante á difusión de contidos audiovisuais.
O terceiro posto, segundo o estudo,
ocúpao Yahoo! Sites, cun total de 48.693 usuarios únicos durante o mes de
xullo, e VEVO sitúase na cuarta posición, con 44.844 espectadores, deixando o
quinto posto para Microsoft Sites, con 42.677 visitantes no mesmo mes.
O estudo de ComScore revela tamén a
cantidade de tempo que os internautas de Estados Unidos lle dedican a ver vídeos
en cada plataforma, unha categoría que tamén lidera YouTube, cunha media de de
525 minutos por usuario.
Os usuarios de Facebook, pola súa
banda, dedícanlle unha media de 21 minutos a ver vídeos na rede social, unha
diferenza abismal respecto da plataforma de Google; isto demostra, entre outras
cousas, que a comunidade internauta prefire outros servizos máis especializados
que Facebook cando se trata de dedicarlle máis tempo ao visionado de contidos
en liña, deixando a rede social para consultar as pezas que lle chamaron a
atención aos seus “amigos”.