En marcha o mapa de franquiciados de España a través de Internet

O portal SoyFranquiciado.com vén de por en funcionamento o que segundo afirman os seus responsables é “o primeiro mapa de franquiciados de España a través de Internet”, onde os emprendedores ou calquera interesado na materia poden comprobar a distribución dos establecementos das principais marcas de franquicias de toda a xeografía española de xeito aberto e totalmente de balde.
A páxina permítelle ó internauta escoller o sector que máis lle interese e a ferramenta sitúa de xeito automático tódolos establecementos dese eido que están a funcionar hoxe en día no Estado, ofrecendo ademais datos de contactos de franquiciados próximos e información sobre o investimento preciso para constituír un proxecto semellante.
Polo de agora, no mapa da web están rexistrados máis de 6.000 locais de distintas franquicias pero os responsables da iniciativa agardan poder cubrir a totalidade da oferta “en arredor de seis meses”, para o que contarán coa colaboración dos propios franquiciados, os que se poden anotar sen ningún custo.
O lanzamento do “primeiro mapa web de franquiciados de España” inclúese na aposta de SoyFranquiciado.com por ofrecer servizos ós emprendedores e o seu principal valor é a contribución ó intercambio de información entre os membros do sector xa que, segundo afirman, “o seu foro foi o primeiro do sector e mantense como o máis activo con máis de 1.600 mensaxes acumuladas”.