Convocada dende Compostela a primeira edición do Concurso de Outfits en Facebook

A axencia compostelá Somos Asesores de Imagen vén da lanzar a primeira edición do seu Concurso de Outfits en Facebook. O certame, presentado baixo o epígrafe Ser fashion ten premio, desenvolverase ao longo dos meses de maio e xuño, tempo fixado para recibir e valorar as propostas que se envíen. A gañadora recibirá unha bolsa de formación valorada en 600 euros. O concurso, informa a axencia, consiste nun convite á creatividade dos nosos deseñadores publicitarios, que deberán enviar unha soa fotografía ilustrando a súa proposta de estilo para a tempada primavera-verán. O certame xestionarase integramente no Facebook, onde os seareiros poderán votar pola súa imaxe favorita.
Finalmente, a/o responsable do outfit que máis puntuación reciba terá á súa disposición, como dixemos, unha bolsa de 600 euros na plataforma de formación en liña da propia axencia, incluíndose as seguintes actividades: un curso de estilo e asesoría de imaxe persoal (240 euros), un curso de protocolo social (100 euros), o curso de community manager especial para blogueiros (200 euros) e o curso de empaquetado de agasallos (60 euros).
As inscricións e votacións están abertas ata o 16 de xuño de 2013 ás 20.00 horas. A publicación do gañador realizarase o luns 17 de xuño a través da páxina de Somos Asesores de Imagen en Facebook. Para participar deberemos enviar os nosos datos persoais á seguinte conta: comunicacion@somosasesoresdeimagen.com.