Caixa Galicia pon en marcha un concurso de fotografía para mozos e mozas

A entidade galega Caixa Galicia, que recentemente foi premiada polo Ministerio de Interior polo seu nivel de seguridade informática, non so emprega as novas tecnoloxías para mirar polos aforros dos seus clientes e o benestar dos seus empregados, senón que tamén fai o posible para que estas estean presentes na vida cotiá de todos os galegos e galegas.
É por isto que a última iniciativa en torno ás TIC levada a cabo por Caixa Galicia foi poñer en marcha o I concurso de fotografía Netclub Captura ese bit, dirixido a mozos de entre 14 e 26 anos, que poderán presentar, ata o vindeiro 31 de maio, fotografías relacionadas coas novas tecnoloxías.
As persoas interesadas en participar poderán presentar ata un máximo de cinco fotografías que terán que ser enviadas en formato JPG e RGB, cun peso entre 1 e 3 Mb e un tamaño mínimo de 21x29 cm. Cada concursante poderá subir as súas imaxes á web e consultar as súas propias estatísticas de votos recibidos, número de fotografías publicadas e as súas propias votacións.
O gañador do concurso recibirá unha cámara de fotos Olympus E-420 con dous obxectivos e as seguintes dez fotos máis votadas serán obsequiadas cun xogo TopSpin 3 para PlayStation3.
NetClub é unha iniciativa deseñada por Caixa Galicia en xullo de 2001 para fomentar o aforro entre a poboación máis moza. O portal web específico para os usuarios deste programa de Caixa Galicia rexistra unha media de 25.500 páxinas vistas mensuais, e os concursos desenvolvidos neste portal rexistraron en 2009 máis de 7.000 participantes.