BlackBerry pon á venda as súas patentes sobre tecnoloxías móbiles

Hai un ano anunciouse que TCL non tiña previsto renovar o seu contrato de fabricación de dispositivos coa marca BlackBerry, polo que a marca desaparecía do mercado, xurdindo unha empresa, OnwardMobility, que prometía lanzar en 2021 novos smartphones BlackBerry con conectividade 5G, o que non sabemos se chegará a ser realidade algún día, xa que Reuters vén de dar conta de que BlackBerry puxo á venda o seu catálogo de patentes relativas á telefonía móbil e mensaxería por 600 millóns de dólares.
Dado que hai poucas semanas BlackBerry pechou os servidores que permitían o funcionamento dos seus vellos terminais con sistema operativo propio da marca canadense, podemos dicir que agora a compañía está totalmente fóra do mercado móbil.
Chegaremos a ver un smartphone 5G coa marca BlackBerry da man de OnwardMobility? É unha incógnita que resolverase nos vindeiros meses, pero semella algo cada vez máis complicado.