As redes sociais e Internet fallan no fornecemento de contidos en galego á mocidade

O Consello da Cultura Galega vén de publicar un informe sobre as actitudes da nosa xuventude acerca da lingua galega. A investigación Prácticas e actitudes lingüísticas da mocidade en Galicia fíxose en base a entrevistas a mozas e mozos de entre 15 e 25 anos, sendo unha das súas máis salientables conclusións unha visión positiva da nosa lingua entre as persoas da devandita franxa de idade, tanto entre as galego-falantes como entre as castelán-falantes. Significa isto que o galego goza de boa saúde ou de agoiros positivos para o seu futuro? Pois non, xa que unha cousa é o que opina a xente del e outra ben diferente e o seu uso (cada vez máis minoritario). O estudo sinala, a respecto do devandito, que un dos principais problemas é a falta de transmisión xeracional. Este proceso de desgaleguización aplícase tamén ás redes e, en xeral, ás ferramentas da Sociedade do Coñecemento, que fallan á hora de garantir a achega de contidos no noso idioma.
Amais de todo o mencionado, no informe sinálase que a mocidade manifesta ter un “comportamento lingüístico acomodaticio” nos contactos coas súas amizades, o que significa que hai unha clara tendencia a empregar opcións maioritarias, ou sexa, neste caso en concreto, a opción do castelán. “Os mozos non se identifican co galego estándar dos medios de comunicación, chegando a dicir que na escrita séntense máis cómodos en castelán”, sinálase no estudo, achegando uns datos que son perfectamente aplicables aos ámbitos dixitais.
Respecto ao comportamento de quen tería na súa man garantir unha maior presenza do galego no día a día da rapazada, os medios, o estudo indica que o panorama actual “indica unha pobre exposición ao galego nos medios de comunicación desde a infancia ata o presente”. De feito, todo indica hai que existe máis predisposición cara ao emprego da lingua entre a mocidade que entre o ámbito mediático. Así, só a radio, a TV e os soportes escritos en papel chegan a unha media de cinco, nunha escala de 0 a 10, estando os concertos e o teatro no 4,5. Pola contra, a presenza do galego na música, nas redes sociais e na Internet apenas supera os 3 puntos. “Isto”, explícase, “confirma a pequena presenza e significado do galego nos medios de comunicación e nas redes sociais, incluso entre os segmentos da mocidade que teñen maior contacto social con eles ou que os utilizan máis”.
Outro capítulo da investigación indica que, tomada en conxunto, a mocidade galega manifesta “un consumo baixo de medios en galego (radio, televisión, música, libros, xornais, redes sociais, Internet)”, especialmente aqueles mozos e mozas que usan menos esta lingua, mais tamén entre os/as que se declaran consumidores/as habituais de medios. O estudo engade que “algúns, sobre todo os/as monolingües en galego, critican a falta de autenticidade do galego que se emprega nalgúns casos”.