A web de MeteoGalicia habilita unha sección de consultas da climatoloxía en tempo real

Visto como está o tempo no que levamos de primavera, e logo de sufrir un dos peores invernos do último lustro, as persoas que tiñan previsto facer o Camiño de Santiago neste Ano Santo 2010, teñen que pensalo dúas veces antes de preparar o macuto e sair das súas casas rumbo á capital galega. Porén para evitar isto e permitir que os pelegríns poidan prever as inclemencias do tempo e iniciar o camiño preparados, a Consellaría de Medio Ambiente, Territorio e Infraestruturas, a través de MeteoGalicia, vén de por ao servizo dos cidadáns, a través da súa páxina web, unha zona de consultas sobre as condicións meteorolóxicas das diferentes rutas que conforman o camiño de Santiago.
A través destas consultas os internautas poderán coñecer en tempo real a situación climatolóxica de tódalas rutas do Camiño, así como ter datos sobre a predición para o día da consulta e o seguinte.
Trátase dun servizo de mellora que, segundo informan dende o Executivo, “ademais de representar unha actividade de impulso e apoio ao Ano Xacobeo, ofrece unha nova variante de consulta do estado meteorolóxico”.
Deste xeito, os cidadáns que están a facer o Camiño de Santiago e a sociedade en xeral poderán consultar os valores de temperatura, sensación térmica e un informe meteorolóxico coa situación actual. Non obstante, para a predición, ademais da información anterior, ofrecese a posibilidade de coñecer a temperatura máxima e mínima e o vento previsto.
Asemade, os responsables desta ferramenta en liña apostaron por levar a cabo actividades e accións de divulgación e concienciación da meteoroloxía. Neste senso, na páxina web de MeteoGalicia habilitouse un portal dedicado ás novas actividades en formación meteorolóxica coa posibilidade de descargarse arquivos con recursos educativos.
Un dos obxectivos dos responsables de MeteoGalicia é, segundo afirman, “achegar o mundo da meteoroloxía aos cidadáns” e por iso, a través da páxina web, os colexios e os institutos de Galicia poden descargar os formularios para solicitar unha visita ás instalacións a este centro de predicións da Comunidade galega.
Outra das iniciativas dirixidas á comunidade escolar de Galicia é a mostra ExpoMeteoro, que tamén se pode consultar (a través dun documento pdf) no portal web de MeteoGalicia.