A vela galega crea unha regata virtual

A Real Federación Galega de Vela puxo en marcha un campionato virtual, en monotipos J70/ J80, que está a contar coa participación de case 200 regatistas galegos representando a trinta clubs da nosa terra. Baixo o nome de Regata Galicia contra o COVID-19, o director técnico da RFGV, Bruno Gago, deseñou un evento para deportistas, adestradores e xuíces con licenza galega activa en tres fases: regatas clasificatorias, semifinais e a gran final deste sábado 11. Utilizando a aplicación Virtual Regatta Inshore, os patróns foron situados en dez grupos.
Para adaptarse ao xogo, a RFGV organizou un adestramento previo que se adxudicou César Ferreiro (RCN Coruña), que sumou 6 puntos en cinco regatas, con Jacobo García (RCN Sanxenxo) e o técnico Ero Pons como segundo e terceiro, respectivamente, empatados estes con Fernando Sánchez (CN Arousa Norte) a 7 puntos. Cada proba, cuxo campo de regatas establece a RFGV, dura entre 8 e 10 minutos, e a competición celebra un total de cincuenta (cinco por grupo), o que implica máxima atención dos patróns e enorme pericia.
A medida foi tomada pola Real Federación Galega de Vela para manter activos aos deportistas, dentro do confinamento do Estado de Alarma. Ata o momento foron numerosas as regatas locais, clasificatorias e autonómicas que se suspenderon desde que o pasado 12 de marzo a RFGV decidise a cancelación de calquera actividade e, entre elas, dúas de rango nacional: a Copa de España de 6 M, en Sanxenxo, e a Copa de España de Snipe-Memorial Cholo Armada en Vigo.
Nesta regata virtual hai rexistrados recoñecidos regatistas, entre eles a xeración dourada da clase 420, co vigués Martín Wizner (RCN Vigo), o arousán Jacobo García (RCN Sanxenxo) e o coruñés Toni Ripoll (RCN Sanxenxo).