A propiedade intelectual no sector TIC, a exame en Compostela

A empresa multinacional Clarke, Modet & Cº, en colaboración coa Asociación Galega de Empresas Adicadas a Internet e ás Novas Tecnoloxías (EGANET) veñen de convocar un almorzo de traballo no que abordar a cuestión da propiedade intelectual no novo ámbito dixital, unha das disciplinas xurídicas que maior controversias está a suscitar no panorama actual e que máis puntos de vista presenta á hora de ser tratada.
Trátase dunha xornada que vai dirixida, entre outros, aos profesionais do sector das Tecnoloxías da Información e a Comunicación (TIC), do eido audiovisual e das axencias de publicidade en liña; así como ao persoal responsable de centros de formación e tamén de compañías de negocios 2.0. nos que as Tecnoloxías da Información e a Comunicación se fan imprescindibles de cara ao traballo diario.
A actividade terá lugar o vindeiro 2 de decembro ás 09:00 no Instituto Tecnolóxico Empresarial Caixa Galicia de Santiago de Compostela, e nela exploraranse (desde a óptica da propiedade intelectual) as medidas para a protección da web 2.0, os proxectos Open Source como vía para a implantación dunha política de Propiedade Industrial e Intelectual no sector TIC e a protección do continente e do contido nas plataformas e-learning.
O presidente de Eganet, Víctor López García, e o xerente de Clarke, Modet & C° en Santiago de Compostela, José Manuel Freire, serán os encargados de darlle a benvida ás persoas asistentes e inaugurar a xornada, á que lle seguirá unha exposición de aproximadamente unha hora sobre a propiedade intelectual no novo ámbito dixital por conta da directora da área de Propiedade Intelectual e Novas Tecnoloxías de Clarke, Modet & C°, Dolores Carmona.
Posteriormente, co propósito de facilitar a reflexión, o debate e o intercambio de experiencias e opinións, o moderador dará paso a un coloquio no que poderán participar coas súas opinións e preguntas as persoas asistentes ao acto.
Nesta xornada, asemade, abordarase a cuestión das diferentes licenzas (licenza propietaria fronte a software de fontes abertas) e as alternativas ao sistema tradicional de explotación de contidos, como son Creative Commons e ColorIURIS.
As persoas interesadas en asistir a esta xornada poden inscribirse a través da web www.clarkemodet.comoficial do evento ou ben chamando ao teléfono 91 806 56 00.