A privacidade, o potencial anti-COVID das tecnoloxías e os dereitos dixitais centraron o ciclo 2020 das Distopías Cotiás

O ciclo Distopías Cotiás, impulsado polo Concello da Coruña a través da iniciativa tecnolóxico-social Coruña Dixital, pechou os días pasados a súa edición 2020, unha edición que veu condicionada pola COVID-19 e que, malia as moitas consecuencias que trouxo a pandemia, non impediu que se celebrasen estes encontros distópicos sobre como están a influír as novas ferramentas no noso quefacer diario. O ciclo 2020 pechou en decembro cun interesante debate sobre a Carta de Dereitos Dixitais impulsada polo Goberno. Nel participaron Sofía Prósper, Santiago Saavedra e Pablo Castro, do colectivo Trackula, pero tamén, a través do chat, as persoas conectadas en directo á canle de YouTube das Distopías, onde se pode ver a sesión por enteiro.
Segundo lembran dende Coruña Dixital, Distopías Cotiás é un ciclo de encontros mensuais co-organizados pola Rede Municipal de Bibliotecas para reflexionar sobre “o impacto das tecnoloxías nas nosas” vidas. Botou a andar de maneira presencial en xaneiro de 2020 na biblioteca do centro Ágora, pero, tras declararse o estado de alarma pola COVID-19, trasladouse ao espazo dixital.
A primeira das sesións foi adicada, da man de Pablo Castro, a falar de ética, privacidade e tecnoloxía. No mes de febreiro, coa avogada María Cerviño, achegouse unha reflexión sobre como recuperar a nosa privacidade. Xa en liña, trala pausa que provocou a situación xerada pola pandemia, tomaron a palabra a analista Gema Galdón, que afondou no emprego das TIC ante a crise da COVID-19, e máis Pietro Marini, que falou sobre información a gran escala (Big Data) e Intelixencia Artificial. Tamén participou en Distopías Cotiás o profesor de comunicación política Víctor Sampedro coa súa Dietética Digital ata chegar a sesión desta semana sobre a Carta de Dereitos Dixitais.
Todas as sesións de Distopías Cotiás, tanto presenciais como en liña, están dispoñibles en Youtube.