A consecución da administración electrónica, un paso máis cara o eGoberno

A subdirectora xeral de Sistemas de Información e Modernización da Administración Pública, María José García Sexto, vén de participar na Xornada sobre a Modernización da Administración Autonómica de Galicia, organizada pola Dirección Xeral de Avaliación e Reforma Administrativa na que apuntou que a Administración electrónica é unha demanda “xa recoñecida como unha necesidade na nosa sociedade”.
Deste xeito, indicou que, a Xunta de Galicia entende a Administración electrónica como unha actuación “orientada a ofrecer a cidadáns e empresas uns servizos públicos máis eficientes e máis próximos utilizando as novas tecnoloxías da información e das telecomunicacións”.
Nesta liña, o Consello da Xunta aprobou o pasado mes de abril, o Plan de Modernización da Administración Pública da Xunta de Galicia, dotado con 26 millóns de euros ata o 2013 co obxectivo de acadar o desenvolvemento da Administración electrónica estendendo o uso das tecnoloxías para ofertar novos servizos e mellorar os actuais, acelerando a tramitación de procedementos e facilitando a participación e a información da cidadanía en tempo real. O Plan, que recolle as accións previstas para acadar o despregamento da eAdministración estrutúrase en catro eixos de actuación, 12 áreas de traballo e 33 programas.
García Sexto indicou, asemade, que o plan contempla como obxectivos prioritarios para este ano a regulación normativa da eAdministración, a formación en TIC do persoal da administración, a creación dunha oficina virtual institucional, e a configuración dunha sede electrónica na que tramitar telematicamente tódolos procesos administrativos.
Por outra banda, as prioridades para o vindeiro 2011 son acadar que o 100 por cento dos procedementos da directiva de servizos (aqueles procedementos vinculados a emprendedores) e o 20 por cento das subvencións se xestionen telematicamente. A consolidación da carpeta do cidadán e as empresas, que permite o acceso aos trámites e documentación en poder da Administración son tamén obxectivos para o vindeiro ano. Ademais, consolidarase o Sistema de Xestión de Persoal Unificado, a Intranet, a Oficina do Empregado Público e os procedementos SERI (servizos de resposta inmediata) telemáticos. As xestións coa Administración a través de Internet preséntase como vía alternativa para axilizar os tempos de resposta ao cidadán.
A consecución da eAdministración suporá, segundo afirmou, “un paso máis cara o eGoberno, un concepto máis global que implica un novo modelo de relación entre Administración, cidadanía e empresas que inclúe o soporte completo a todos os procesos entre dispoñibles para os usuarios independentemente do lugar, momento ou canle de comunicación”.

Sociedade da Información
A estratexia en materia de novas tecnoloxías da Xunta de Galicia abarca un importante número de actuacións para situar á Comunidade no núcleo avanzado da sociedade da información. Entre as medidas que se están a desenvolver, María José García Sexto enumerou na súa intervención o Plan de Acción para o Desenvolvemento da Sociedade da Información no 2010, que engloba o Plan de Banda Larga, o desenvolvemento do eGoberno, a dinamización do uso das TIC e o Plan Integral de Apoio ao sector TIC. Todas elas enmarcadas en 2014.gal Axenda Dixital de Galicia, que aglutina a estratexia en materia de novas tecnoloxías da Xunta e define as actuacións para maximizar o potencial social e económico das TIC como peza clave que axude a converter a economía actual nunha economía intelixente, sustentable e integradora cun alto nivel de emprego, cohesión social e territorial.