A UDC celebra o quinto Foro de Interacción matemática aplicada á industria

A Universidade da Coruña, en colaboración co Centro de Supercomputación de Galicia (CESGA) e co grupo de investigación M2NICA veñen de inaugurar esta mesma mañá (venres, 25 de abril) o V Foro de interacción matemática aplicada á industria que se está a levar a cabo no Paraninfo da UDC.
Neste foro anual, as empresas convidadas propoñen problemas que xorden no seu ámbito de traballo e que son susceptibles de ser tratados mediante métodos matemáticos e numéricos como o modelado, simulación de procesos e dispositivos, enxeñería asistida por ordenador (CAE)...
Entre os relatores convidados destaca a presenza de Adrián Sarasquete Fernández, director de Vicus desenvolvementos tecnolóxicos; Carlos Vázquez Cendón, catedrático de Matemática aplicada da UDC; Alfredo Bermúdez de Castro, catedrático da USC; Pilar Pintor, directora da OTRI e Miguel Ángel Jiménez Caballero, responsable de I+D en materiais do Instituto Tecnolóxico de Aragón, que dará un relatorio sobre o Modelizado de materiais para o prototipado virtual de produtos e procesos.
O Foro rematará ás 18:00 horas cun relatorio dun responsable da área de cálculo do grupo Tekplus denominado, Cálculo dinámico, fluidometría e elastodinámica aplicada.