A Coruña achega formación en capacitación dixital e ofimática básica

O Concello da Coruña a través do Centro Municipal de Emprego dos Rosales vai iniciar un curso de capacitación dixital e procura de emprego a través da Rede e un curso de ofimática básica.
En concreto, dentro da programación de accións formativas para persoas desempregadas ou en mellora de emprego do primeiro semestre deste ano, o Concello da Coruña comezará un curso de Ofimática Básica: Write (procesador de textos) e Calc (hora de cálculo) de 100 horas de duración.
O obxectivo é “proporcionar as habilidades necesarias para utilizar o software Libre Office nun sistema operativo Linux, o que lle permitirá ao alumnado crear, editar e xestionar documentos e follas de cálculo”.
Tamén comezará un curso de capacitación dixital de 30 horas de duración cuxo obxectivo é mellorar a inserción laboral, abranguendo coñecementos básicos sobre o uso do ordenador e as diferenzas entre o hardware e o software, coñecementos sobre o manexo de ferramentas dixitais esenciais para procurar emprego como o correo electrónico, os portais de emprego ou as redes sociais.
As persoas interesadas deben chamar ao Centro Municipal de Emprego ao 981 184 399 antes do luns 25 para anotarse. A admisión será por orde de chamada.
O curso de capacitación dixital comezará o martes 2 de xuño no Centro Cívico do Birloque e finalizará o 11 de xuño, en horario das 9.00 ás 14.00 horas. O curso de ofimática comezará en luns 25 de maio e finalizará o 6 de xullo das 15.30 ás 19.30 horas no Centro de Emprego dos Rosales.