A CEL e o CTIC convocaron aos empresarios de Lugo para achegarlles oportunidades colaborativas de innovación

A Confederación de Empresarios de Lugo (CEL) en colaboración con CTIC Centro Tecnolóxico da Información e a Comunicación celebraron este luns unha xornada informativa co obxectivo de difundir novas solucións tecnolóxicas para empresas e avaliar a fondo a convocatoria Innterconecta. Na xornada, na que participaron ducias de empresarios de Lugo e provincia, fíxose fincapé na finalidade de Innterconecta (financiar proxectos de I+D promovidos por consorcios empresariais) e os escenarios concretos aos que se dirixen as súas axudas (en boa medida PEME e microempresas).
Máis en detalle, no encontro puxéronse de manifesto os atrancos das empresas de pequeno e moi pequeno tamaño á hora promover procesos innovadores, e a importancia das iniciativas de carácter cooperativo e colaborativo con vistas a non ficar atrás no acceso ás novas tecnoloxías e na actualización dos seus negocios.
A xornada incluíu unha sección chamada Oportunidades tecnolóxicas que forneceu aos asistentes a posibilidade de achegarse ás tendencias tecnolóxicas (tendencias tecnolóxicas concretas) que marcan o 2015. Nesta parte do encontro emprestouse especial atención a solucións de realidade virtual e aumentada, análise de información, grandes cantidades de datos (xeitos de xestionalos, gardalos, tratalos e recuperalos), ou visión por computador.
Jaime López, secretario xeral da CEL, foi o encargado de abrir este encontro, no que participaron como relatores Pablo Coca, director de Negocio e Operacións de CTIC, e Fidel Díaz, responsable de Innovación deste centro tecnolóxico, situado en Xixón. O secretario da CEL salientou a importancia de estreitar ligazóns con comunidades como Asturias, “que están a desenvolver proxectos moi interesantes trasladables a esta provincia”.
Como remate, informar que con vistas ao estudo de posibles accións a desenvolver no futuro de forma colaborativa, os técnicos de CTIC tiveron a oportunidade de visitar con anterioridade á celebración da xornada as instalacións do CETAL (Centro Tecnolóxico Alimentario), que percorreron acompañados do subdirector deste centro e de representantes da CEL e da Fundación CEL.