Código Cero - Diario Tecnolóxico de Galicia

As redes sociais agravan os trastornos alimentarios, segundo a investigadora Paula Frieiro (UVigo)

Lucía Villaverde — 2023-03-29T19:01:36Z

Na súa tese de doutoramento, a investigadora e traballadora social Paula Frieiro analizou a influencia das redes sociais e da autoestima sobre os crecentes trastornos da conduta alimentaria (TCA) na adolescencia e a posíbel resposta desde o traballo social a estas enfermidades, que están influenciadas por múltiples factores: biolóxicos, psicolóxicos e socioculturais.
A tese, con mención internacional, foi dirixida desde a Facultade de Educación e Traballo Social do Campus de Ourense polo profesor Rubén González e realizada no marco do Grupo de Estudos en Traballo Social: Investigación e Transferencia (GETS-IT) da Uvigo.
Segundo explica a xa doutora, é “transcendental o estudo da autoestima relacionada cos TCA, por vincularse de maneira central coa construción da propia imaxe corporal e por ser un factor mediador no risco de condutas asociadas aos trastornos da conduta alimentaria”. De igual forma, engade, a crecente socialización a través de redes sociais xera situacións de comparativa social, que “caracterízanse por ser frecuentes na adolescencia, oscilando nesta etapa entre un 6% e un 8%”.
Na tese identificouse que o 90% das persoas ás que se diagnostican TCA son mulleres. Froito da investigación, indica que “conclúese necesario impulsar a prevención relacionada co uso das redes sociais, de forma que se fomenten habilidades como o pensamento crítico sobre a información que se percibe a través destes medios. Os primeiros cursos de Educación Secundaria Obrigatoria son determinantes para a prevención-intervención dos TCA”.
Co obxectivo de contribuír positivamente no senso da autoestima, no marco desta tese e do proxecto Inou Dixitou, no que participa un equipo multidisciplinar da Facultade de Educación e Traballo Social e da Escola Superior de Enxeñaría Informática do Campus de Ourense, creouse unha ferramenta en formato xogo de aplicación móbil, actualmente en fase de probas, para que a adolescencia poda enfrontarse de forma autónoma e responsable ás situacións de risco que potencialmente poden producirse en redes sociais.
Por último, a tese subliña que a intervención e acompañamento social pode conducir a “unha mellora substancial a nivel individual e familiar dos TCA”, polo que o traballo social “pode formar e realizar grupos de apoio, desenvolver e promover obradoiros socioeducativos, utilizar ferramentas de resolución de conflitos e mediación familiar, etc.”.

A Deputación de Ourense impulsará a dixitalización dos servizos sociais municipais

Lucía Villaverde — 2023-03-28T20:39:44Z

A Deputación de Ourense impulsará e co-financiará a dixitalización dos servizos sociais municipais a través dunha liña de axudas para os concellos, que será posta a disposición dos municipios nas vindeiras semanas e que terá co primeiro obxectivo o Servizo de Axuda no Fogar (SAF).
Este novo programa de cooperación provincial busca que as administracións locais poidan realizar unha importante transformación na forma de proporcionar os seus servizos, constituíndo un salto cualitativo e cuantitativo con repercusión positiva na cidadanía e propiciando melloras entre as que estará a redución das lista de espera municipais.
Manuel Baltar define estas axudas como "un paso máis na transformación da provincia, entendendo a dixitalización das administracións locais como un piar do desenvolvemento do territorio". O presidente provincial salienta tamén que “esta iniciativa mostra a labor da Deputación, como concello dos concellos, traballando sempre a carón das administracións locais desde a perspectiva de colaboración absoluta", salienta o presidente provincial”.
O primeiro ámbito no que a Deputación de Ourense quere impulsar a dixitalización é no Servizo de Axuda no Fogar (SAF), un dos principais programas sociais xestionado polas administracións locais o cal permite que en miles de fogares da provincia se axude ás persoas maiores e/ou dependentes a realizar as súas actividades diarias. A prestación do SAF ten un custo anual duns 20 millóns de euros, dos que en torno a 15 millóns son aportados pola administración estatal, autonómica e provincial, aos que se lle suma o co-financiamento de cada municipio e o co-pago dos beneficiarios.
Desde a administración provincial tense observado durante os últimos anos que o avance na dixitalización dos procedementos administrativos e da xestión diaria do Servizo de Axuda no Fogar é moi dispar entre concellos. A maioría de administracións locais non dispoñen de ningún soporte e demandan ferramentas de mellora, importantes para os profesionais pero, sobre todo, para a cidadanía.

Un alumno do CEIP Rosalía de Castro (Xinzo) gaña o concurso de deseño da camiseta de Galiciencia 2023

Lucía Villaverde — 2023-03-27T18:57:30Z

Galiciencia, a maior feira científica que se celebra na nosa comunidade, promovida polo Parque Tecnolóxico de Galicia-Tecnópole desde o ano 2006, inclúe na súa nova edición (a 18, en maio), amais do tradicional concurso de proxectos o xa habitual concurso de deseño da camiseta oficial de Galiciencia. Este certame ía dirixido a todo o alumnado de Primaria dos centros educativos de Galicia. As propostas debían ter como punto de referencia calquera obxecto ou contorna relacionada coa temática desta edición da feira, Aeronáutica e Aeroespacial.
O gañador do certame foi Manuel Ángel Díaz Rodríguez, alumno de sexto curso do CEIP Rosalía de Castro de Xinzo de Limia (Ourense). O seu debuxo amosa a un astronauta pensativo, sentado sobre a Lúa. Un xurado de expertos decidiu a proposta gañadora, da que se valorou a súa orixinalidade e a conexión coa temática desta edición da feira.
Ao certame presentáronse un total de 352 debuxos procedentes de 23 centros educativos de Primaria de toda Galicia, incrementándose cada ano o número de alumnos e centros participantes neste certame. O rapaz premiado recibirá camisetas para toda a súa clase, con exemplares tamén para os seus profesores e familiares. Así mesmo, distribuiranse camisetas entre o persoal da organización de Galiciencia e entre o alumnado que presente os seus proxectos na feira.

Ideaspropias Editorial gaña o premio á Mellor Comunicación en Expoelearning

Lucía Villaverde — 2023-03-27T18:35:54Z

A editorial galega Ideaspropias foi recoñecida co premio Expoelearning na categoría Mellor Comunicación polo “seu destacado labor na difusión do propio evento”. Este galardón, outorgado polo comité organizador, recoñece a excelencia na xestión e promoción de eventos e actividades relacionadas coa educación en liña.
"Este premio é un gran recoñecemento ao noso esforzo e dedicación na promoción da educación en liña", afirma Pedro López, director xeral de Ideaspropias Editorial, engadindo que "estamos moi agradecidos por este galardón e seguiremos traballando duro para continuar mellorando a nosa labor na difusión de eventos como Expoelearning".
Expoelearning é unha das feiras máis importantes no ámbito da educación e formación en España, e reúne a expertos, profesionais e empresas do sector. A edición deste ano levouse a cabo os días 23 e 24 de marzo en IFEMA, dentro da Semana da Educación, e contou coa presenza de destacados poñentes e expositores.
Con este premio, Ideaspropias Editorial reafirma o seu compromiso coa promoción e difusión da formación en liña e consolídase, nas súas palabras, “como unha das empresas líder en contidos de formación para o emprego e servizos elearning”.

Innogando, a segunda empresa en recibir apoio do fondo emprendedor do Concello de Lugo

Lucía Villaverde — 2023-03-23T16:00:00Z

A alcaldesa de Lugo, Lara Méndez, deu a coñecer a semana pasada á segunda das empresas que contará co financiamento da Estratexia Lugo Transforma: Innogando. Unha iniciativa pioneira posta en marcha durante a pandemia por impulso da rexedora co obxectivo de favorecer a diversificación industrial do municipio tomando como base a creación de emprego de calidade e estábel. Acompañada polo conselleiro delegado de Torsa Capital, Jesús Torres, e polo interventor municipal, Manuel Vázquez, Lara Méndez deu a benvida a Innogando. “Trátase dunha startup que naceu no ano 2020 coa vocación de desenvolver solucións tecnolóxicas que permitan a monitoraxe en tempo real dos animais dunha explotación”, avanzou.
A rexedora afirmou que “co acompañamento de Lugo Transforma, do que recibirá 300.000 €, Innogando poderá afrontar o fortalecemento da súa rede comercial e contratar outros perfís profesionais para escalar en vendas en converterse en líderes do sector”. Segundo engadiu, a previsión coa que traballan é “realmente optimista”, permitindo sinalar un horizonte, en 2026, dun equipo de 55 persoas que multiplicará por case 3'5 o seu cadro de persoal formado por 16 gandeiro/as, veterinario/as e enxeñeiro/as informático/as e electrónico/as.
A este respecto, Elio López García e Daniel Pardo Rus (co-fundadores de Innogando) agradeceron o apoio do Concello e relataron que as súas expectativas da man do Lugo Transforma “pasan pola internacionalización, xa que vimos de pechar un acordo de distribución cunha multinacional para a comercialización en Portugal”, e o impulso deste fondo será un respaldo fundamental nese crecemento que tamén se dirixe cara a Irlanda e Sudamérica, avanzaron.
Jesús Torres quixo lembrar tamén que o fondo aterrará sobre aproximadamente 50 empresas e, extrapolando resultados de experiencias similares, se estima que favorecerá a creación de máis de mil postos de traballo directos e até o triplo de empregos indirectos, xerando un investimento inducido que superará os 60 millóns de euros por parte das empresas.
O Fondo Lugo Transforma está constituído polo Concello de Lugo (que mobilizou 12 millóns de euros) e polas compañías Lence, Norvento Enerxía, Torre de Núñez, Grupo Arenal, Alibos, Candelas, Grupo El Progreso, Dmanán e Torsa Capital, que incrementaron o fondo investidor con un millón de euros máis.

Isabel Rodríguez celebra que Lugo sexa a provincia máis participativa en A Administración preto de ti

Lucía Villaverde — 2023-03-22T16:39:17Z

A subdelegada do Goberno en Lugo, Isabel Rodríguez, avanzou este mércores 22 de marzo que Lugo é a provincia de España con máis municipios adheridos a A Administración cerca de Ti, o plan do Goberno que achega os trámites administrativos dixitais á veciñanza, cun total de 45 concellos lucenses. “Beneficiamos aos case 100.000 veciños e veciñas que viven nestas localidades do rural”, afirmou a subdelegada, quen informou das novidades deste programa durante a inauguración na UNED da Xornada A Administración a un clic, no teu móbil, organizada pola Subdelegación do Goberno con motivo da Semana da Administración Aberta 2023.
Funcionarios públicos levaron a cabo máis de 500 trámites, entre certificados dixitais e cl@ves permanentes, aos asistentes ás sesións organizadas en 59 localidades. A día de hoxe, o 76% dos municipios asinaron o convenio coa Federación Española de Municipios e Provincias (FEMP) para acollerse a este programa.
“Unha ferramenta fundamental para loitar contra o despoboamento, especialmente nunha provincia tan dispersa e envellecida coma a de Lugo, eliminando as desigualdades sociais, mellorando a cohesión social e evitando desprazamentos á cidade”, destacou a subdelegada durante a súa intervención, na que explicou que este acordo permitirá a estes concellos solicitar visitas para que persoal da Subdelegación se desprace periodicamente e realice in situ as xestións que a cidadanía demande previamente.
Isabel Rodríguez, acompañada da directora do Centro Asociado en Lugo da UNED, Ana Traseira, deu comezo á xornada onde responsábeis dos diferentes departamentos explicaron ao alumnado universitario o catálogo de prestacións do organismo, facendo especial fincapé en servizos e ferramentas como a carpeta cidadá, o certificado dixital e a cl@ve permanente. O catálogo de servizos electrónicos ofrece 125 trámites de xeito telemático, destacou, salientando operacións como as xestións relacionadas cos servizos de Estranxeiría; o pago de taxas; a comunicación de mobilizacións; a validación de títulos universitarios estranxeiros ou a presentación de queixas ou suxestións ante a administración.

Aerocamaras, seleccionada para o proxecto europeo destinado a controlar o tráfico aéreo de drons

Lucía Villaverde — 2023-03-22T09:29:26Z

A compañía galega Aerocamaras, con sede en Lalín e no Parque Tecnolóxico de Galici a (Tecnópole), foi seleccionada para formar parte do consorcio europeo de empresas, liderado por Indra, que desenvolve o denominado Proxecto Ensure. Este está dirixido ao control do tráfico aéreo de drons mediante unha plataforma intelixente coñecida como U-Space.
U-Space é o conxunto de novos servizos e procedementos específicos que se está a desenvolver de maneira coordinada entre unha vintena de países de Europa para posibilitar un alto número de operacións con drons, dunha maneira ordenada, fluída, segura e accesíbel. Prevese que o proxecto remate en 2024 e que o U-Space se poña en marcha en 2025.
A firma galega encargarase de planificar, supervisar e executar, tanto en Galicia como en Madrid, as probas de operacións reais que se efectúen no transcurso do proxecto. A responsabilidade directa sobre unha fase tan sensíbel e complexa dos traballos débese a que, segundo as condicións que demanda o proxecto, Aerocamaras cumpre cos máis altos parámetros de esixencia, tanto pola alta capacidade técnica dos seus equipos de persoal como polo seu dominio das ferramentas.
Aerocamaras é unha empresa de drons referente en España, pioneira no desenvolvemento, formación, vendas e servizos profesionais con aeronaves non tripuladas. Na actualidade é unha empresa sobranceira na formación de pilotos de drons, avalada por máis de 35.000 alumnos. Conta con centros de formación de pilotos que xa se converteron nunha referencia nacional, con máis de 15 escolas repartidas ao longo de todo o país.

O Concello da Coruña renova a Oficina Virtual do Contribuínte

Lucía Villaverde — 2023-03-20T21:00:00Z

O Concello da Coruña puxo en marcha a nova Oficina Virtual do Contribuínte (OVC), unha ferramenta deseñada para simplificar trámites administrativos. Actualízase a anterior versión da sede electrónica para os procesos de carácter tributario, cunha versión responsive (adaptada ás pantallas dos dispositivos móbiles, como é o caso dos teléfonos e as tabletas) que facilita a realización dos trámites dixitais.
Ademais, a nova OVC tamén inclúe avances no referente á súa integración coa pasarela de pagamento da entidade bancaria: cada usuario poderá xestionar estes trámites sen verse na obriga de descargar os ficheiros para, posteriormente, acceder á web da entidade bancaria, xa que o novo sistema está directamente sincronizado co TPV virtual das entidades bancarias.
O concelleiro de Economía, Facenda e Réxime Interior, e voceiro do Goberno municipal, José Manuel Lage, puxo en valor as novidades implementadas a través da OVC: "O que buscamos é mellorar os servizos que lles ofrecemos aos cidadáns, eliminar burocracia e facilitar a relación das persoas coa Administracións, unha directriz establecida por Inés Rey e que aplicamos tamén nas oficinas físicas do Concello cos novo sistemas de apoio e atención personalizada".
Para acceder á nova OVC, á que se pode chegar da ligazón habilitada na sede electrónica municipal, é preciso identificarse a través do rexistro Cl@ve. Todo usuario pode acceder e modificar os seus datos persoais, así como consultar o calendario fiscal anual. Tamén se facilita a disposición de notificacións automáticas para configurar recordatorios previos aos prazos de pagamentos.
Ademais, existe un acceso directo aos expedientes persoais e tamén aos documentos xerados a través da app, de forma permanente. A este respecto, tamén será posíbel xestionar a descarga dos certificados do padrón municipal, así como todo tipo de recibos asociados a trámites administrativos municipais.

R leva a súa experiencia en Intelixencia Artificial ao sector seguros no congreso Data4Insurance

Lucía Villaverde — 2023-03-17T22:18:38Z

O congreso Data4Insurance, organizado por Big Data Magazine (publicación especializada en temas de IA e datos) reuniu este xoves 17 de marzo, no madrileño auditorio La Matriz, a expertos de R xunto a especialistas do máis alto nivel de toda España, que ofreceron o seu coñecemento, visión estratéxica e experiencia relativas ás aplicacións da Intelixencia Artificial no sector dos seguros.
Adrián Bertol, responsábel de vendas de IA e Analítica de R, incidiu no momento clave que afrontan hoxe en día as empresas de seguros: “Dispoñen de datos con moito valor e aínda non é tarde para que comecen a usalos, mais corren o risco de non ser tan competitivas se non implantan unha estratexia de uso do dato xa. As principais aseguradoras xa o fixeron”.
No congreso desenvolvéronse catro mesas redondas que abordaron os temas da automatización do uso de Machine Learning; ata que punto poden revolucionar este sector asegurador a IA e os datos; cales son as claves do tratamento dos datos (goberno e cultura) nas compañías aseguradoras e, finalmente, como articular ética e transparencia nas decisións do algoritmo en seguros.
Alberto Díaz Freire, responsábel de Alianzas e Transformación Dixital de empresas de R, participou na mesa redonda sobre a Automatización do uso de modelos de Machine Learning no sector seguros, e falou das vantaxes do AutoML, que permite ás pemes desenvolver un sistema propio de IA preciso, seguro e rendíbel.
En Data4insurance falouse, en suma, de funcionalidades e aplicacións da IA que lles permitirán ás compañías resolver algunhas das súas preocupacións principais. Como se explicou no foro, a IA axudaraos, entre outras cousas, a predicir provisións segundo o custo dos sinistros e en función de cada tipo de póliza, ou a anticipar a fraude en reclamacións para automatizar os pagos desas demandas.

A UVigo participa nun proxecto cuántico europeo para mellorar a seguridade das comunicacións

Lucía Villaverde — 2023-03-16T21:35:52Z

O proxecto Quantum Secure Networks Partnership, QSNP, impulsado por un consorcio de máis de 40 socios, entre eles a Universidade de Vigo, e liderado polo Instituto de Ciencias Fotónicas, ICFO, con sede en Barcelona, conta cun orzamento de 25 millóns de euros e unha duración de tres anos e medio. Nesta iniciativa están implicados socios de toda Europa, entre os que hai 23 institucións académicas, cinco fundacións, sete pemes e spin-offs, tres integradores de redes e criptografía e catro operadores de telecomunicacións.
Segundo explican fontes da UVigo, QSNP nace con tres obxectivos: desenvolver tecnoloxía cuántica avanzada para redes de comunicación seguras contra o poder cada vez maior dos ordenadores e a sofisticación dos algoritmos; integrar esta tecnoloxía nos sistemas de telecomunicación clásicos existentes e nos protocolos poscuánticos; e entregar tecnoloxía europea crítica a infraestruturas gobernamentais como a European Quantum Communications Infrastructure (EuroQCI).


O investigador Marcus Curty

A UVigo está representada neste consorcio por un grupo de investigadores do Vigo Quantum Communication Center (VQCC) liderados polo catedrático Marcos Curty. Como explica o docente, participan en tres paquetes de traballo, un sobre sistemas cuánticos de distribución de clave con prestacións avanzadas, outros de clave baseados en entrelazamento e independentes dos seus dispositivos e un terceiro sobre protocolos de comunicacións cuánticas máis aló dos sistemas cuánticos de distribución de clave.
Este novo proxecto xorde ao abeiro do Quantum Flagship, un megaproxecto europeo que conta con 1.000 millóns de euros de orzamento e dez anos de duración no que están involucrados máis de 5000 investigadores, co obxectivo de levar a física cuántica do laboratorio ao mercado. Tras esta reunión de lanzamento en modalidade virtual, a primeira reunión presencial con todos os socios do consorcio celebrarase nas instalacións de ICFO en Barcelona, do 24 ao 25 de abril.