Complétase a operación que permitirá a TikTok seguir operando nos EE.UU.

TikTok anunciou hoxe a creación de TikTok USDS Joint Venture LLC, unha nova sociedade establecida para dar cumprimento ás esixencias reguladoras impostas polo Goberno dos EE.UU. a través da orde executiva asinada polo presidente Donald Trump o 25 de setembro de 2025. A posta en marcha desta entidade permite que máis de 200 millóns de usuarios estadounidenses e arredor de 7,5 millóns de empresas continúen a empregar a plataforma no marco dun modelo de maioría accionarial estadounidense e baixo un conxunto reforzado de garantías de seguridade nacional.
A nova joint venture nace coa misión de protexer os datos dos usuarios dos EE.UU., as aplicacións e o algoritmo de recomendación mediante medidas integrais de privacidade e ciberseguridade. Entre os seus obxectivos figura tamén a salvagarda do ecosistema de contidos nos EE.UU., asumindo a autoridade en materia de políticas de confianza e seguridade, así como de moderación, cun sistema de rendición de contas baseado na transparencia e en certificacións independentes.
A información dos usuarios estadounidenses será xestionada nunha infraestrutura de nube segura situada nos EE.UU. e operada por Oracle. O programa de privacidade e ciberseguridade estará sometido a auditorías externas e cumprirase cos principais estándares do sector, incluíndo os do Instituto Nacional de Estándares e Tecnoloxía (NIST), a norma ISO 27001 e os requisitos de seguridade da Axencia de Ciberseguridade e Infraestruturas (CISA).
A seguridade do algoritmo constitúe outro dos piares do proxecto. A joint venture será a encargada de volver adestrar, probar e actualizar o sistema de recomendación de contidos empregando datos de usuarios dos EE.UU., mantendo o algoritmo aloxado tamén na nube estadounidense de Oracle. Xunto a isto, aplicaranse protocolos específicos de seguridade de software, cunha revisión continua do código fonte e coa colaboración de Oracle como socio tecnolóxico de confianza.
A entidade terá capacidade decisoria plena sobre as políticas de moderación de contidos, co obxectivo de garantir un contorno seguro para usuarios, creadores e empresas. Ao mesmo tempo, manterase a interoperabilidade co ecosistema global de TikTok, de xeito que os creadores estadounidenses poidan seguir tendo visibilidade internacional e as empresas operar a escala global. As entidades estadounidenses de TikTok encargaranse, neste contexto, da interoperabilidade de produto e de determinadas actividades comerciais, como o comercio electrónico, a publicidade e o márketing.

Nova estrutura de mando

A sociedade estará gobernada por un consello de administración de sete membros, de maioría estadounidense, no que figuran o conselleiro delegado global de TikTok, Shou Chew, así como directivos e investidores de firmas como Silver Lake, Susquehanna International Group, MGX e Oracle. A presidencia do comité de seguridade recae en Raul Fernandez, con ampla experiencia en tecnoloxía, risco e seguridade nacional.

Adam Presser é o director executivo da nova sociedade

A dirección executiva da joint venture corresponderá a Adam Presser, nomeado conselleiro delegado polo consello como unha das súas primeiras decisións. Xunto a el, Will Farrell asumirá o cargo de responsable de seguridade, á fronte do programa integral de privacidade e ciberseguridade.
No apartado accionarial, Silver Lake, Oracle e MGX actúan como investidores xestores, cun 15 % cada un. O consorcio complétase con outros fondos e oficinas familiares de referencia no ámbito tecnolóxico e financeiro, mentres que ByteDance conserva unha participación do 19,9 %. As salvagardas establecidas pola nova entidade aplicaranse tamén a aplicacións como CapCut e Lemon8, ademais doutros servizos operados nos EE.UU.