Astro Bot chega a PlayStation 5

Cando se lanzou PlayStation VR, o xogo Astro Bot Rescue Mission pretendía servir de introdución á realidade virtual, de xeito que practicamente ofrecía unha experiencia obrigada para familiarizarse coa realidade virtual de PlayStation, pero agora que esta tecnoloxía parece ter fracasado, dende Sony queren seguir aproveitando o carismático protagonista de tal xogo, e hoxe mesmo estrea un xogo de seu que deixa de lado a realidade virtual.
O novo xogo non podía ter un título máis sinxelo, xa que se coñece directamente como Astro Bot, é compatible con consolas PlayStation 5, e a súa versión básica ten un prezo de venda de 69,99 euros, o que pode resultar rechamante por proceder dun xogo que normalmente se ofrecía de balde, e por achegar unha experiencia de xogo bastante limitada en horas de xogo (pois nunhas 8 horas poden percorrerse os seus 80 niveis repartidos en 6 galaxias).
En calquera caso, estamos ante un xogo do que non hai dúbida sobre a súa diversión, no que Astro ten que pilotar o seu Dual Speeder por unha chea de planetas cheos de perigos e sorpresas, buscando a tripulación perdida da súa destruída nave nodriza. Nesta ocasión Astro presentará novos poderes, variados inimigos e grandes xefes finais, nunha experiencia de plataformas que aproveita ao máximo o mando DualSense.
O xogo tamén pode verse como unha celebración dos 30 anos de PlayStation, xa que presenta versión de máis de 150 heroes emblemáticos dos xogos das consolas de Sony.