A Deputación e Ponteareas levan a realidade virtual ao Corpus Christi

A Deputación de Pontevedra e o Concello de Ponteareas asinarán un convenio de colaboración por valor de preto de 170.000 euros para levar a cabo un produto de Realidade Virtual (VR) e un museo ao aire libre arredor da festa do Corpus Christi. O organismo provincial acaba de dar luz verde a este convenio co que “queremos seguir promovendo o crecemento equilibrado e sostible do turismo e impulsar a modernización e dixitalización deste sector tan importante para a nosa economía”, asegurou o presidente Luis López.
O convenio enmárcase no Plan de Sostibilidade Turística do Condado-Paradanta. Unha terra entre ríos, dotado con 1,5 millóns de euros e financiado con fondos Next Generation da UE, e permitirá poñer en marcha novas ferramentas dixitais que consisten na implantación e mantemento dunha plataforma museográfica virtual para poñer en valor como recurso turístico a festa do Corpus Christi. Ademais, a actuación completarase coa creación e instalación de elementos para a divulgación e interpretación da festa, declarada de interese turístico internacional e que este ano se celebrará o 22 de xuño.
Esta iniciativa, explicaron as dúas entidades, “permitirá reforzar a interpretación do Corpus Christi, apoiar e poñer en valor o oficio das persoas alfombristas realizando un traballo de documentación e inventario fotográfico das alfombras florais e do seu proceso de creación, desestacionalizar a demanda turística e incrementar a sostibilidade do destino”. Deste xeito crearase un portal web que permitirá amosar a historia e orixe da festa, con experiencias audiovisuais a través dun percorrido polas rúas de Ponteareas amosando as alfombras e os traballos previos para a súa confección. Amais, dixitalizarase, xerarase e incorporase contido audiovisual relacionado co Corpus Christi e instalaranse tótems interactivos no percorrido no que habitualmente se sitúan as alfombras para poder coñecer estes elementos en calquera momento do ano.